HOT STORIES OF THE WEEK

Ganap nang batas ang panukala ukol sa mental health.

Ito ay matapos lagdaan ni Pangulong Rodrigo Duterte ang Republic Act 11036 o ang Mental Health law, isang araw bago ito nakatakdang mapaso bilang batas.

Ayon kay Senadora Risa Hontiveros, sa pamamagitan ng pagsasabatas nito, sakop na ng PhilHealth ang confinement, check up at gamot ng mga mental health patients.

Maliban dito, obligado na rin ang mga ospital na maglaan ng unit na para lamang sa mga pasyenteng may problema sa mental health. Tinatayang nasa dalawang dekada ring isinusulong ng ibat ibang advocacy groups ang magkaroon ng batas na nakatutok sa mental health ng mga Pilipino.

Batay sa datos, pitong Pilipino ang nagpapakamatay kada araw habang isa sa bawat limang adults ang nakakaranas ng mental disorder.

Sinuspinde na ng pamahalaan ang backchannel talks sa National Democratic Front o NDF.

Ayon sa government negotiator para sa backchannel talks na si Hernani Braganza, naipaalam nila ang naturang desisyon sa pulong na ginanap sa The Netherlands na dinaluhan nina NDF leaders Jose Maria Sison at Fidel Agcaoili.

Ipinaliwanag ni Braganza na layon nitong para bigyang daan ang tatlong buwang pag-review sa lahat ng mga nilagdaang kasunduang may kinalaman sa negosasyon.

Gayunman, nilinaw nito na mananatili pa rin ang komunikasyon ng pamahalaan sa mga rebeldeng komunista.

—-

Malinaw na pananakot ang ginagawa ng pamahalaan sa pahayag nitong maraming negosyo ang maaapektuhan kung ipipilit ang hirit ng mga labor groups na itaas sa 750 pesos ang minimum wage.

Sa panayam ng DWIZ, iginiit ni Associated Labor Unions-Trade Union Congress of the Philippines o ALU-TUCP Spokesman Alan Tanjusay na ekonomiya din ng Pilipinas ang makikinabang oras na itaas ang sahod ng mga manggagawa.

Ito ay dahil sa mas tataas aniya ang purchising power o kakayahang bumili ng mga manggagawa kung madaragdagan ang kanilang mga sahod.

“‘Yung pera po ay pupunta sa lokal na ekonomiya, lalago ang mga negosyop at makikinabang din naman ang mga kababayan natin, so ‘yung mga statement ni DTI Secretary Lopez ay pananakot sa ating lahat lalong-lalo na sa wage board na huwag magbigay ng significant fare increase.” Ani Tanjusay

Samantala, tinawag naman ni Tanjusay na panggulo ang mga economic managers ng administrasyon na malaking balakid aniya sa isinusulong nilang itaas ang minimum wage sa bansa.

“Malabo itong mga government officials natin eh, imbes na magdudulot sila ng pag-asa, magbibigay sila ng determinasyon para pagsumikapan nating lahat para maabot natin ang cost of living standard sila pa mismo ang nagsasabing magkakaproblema tayo, so anong gagawin natin.” Pahayag ni Tanjusay

Una nang sinabi ng Department of Trade and Industry o DTI na mapanganib para sa ekonomiya ng bansa ang inihihirit ng mga militanteng grupo na 750 piso na minimum wage kada araw.

Ayon kay Secretary Ramon Lopez, posibleng malaki ang maging negatibong epekto ng nasabing halaga na minimum wage para sa mga manggagawa.

Paliwanag ni Lopez, mas makakabuti kung ibabatay sa inflation ang pagbibigay ng umento sa sahod upang maiwasan na magkaroon ito ng epekto sa presyo ng mga produkto at sa ekonomiya ng bansa.

Gayunman nilinaw ni Lopez na ang Regional Tripartite Wages and Productivity Board pa rin ang magdedesisyon o magtatakda kung magkano ang dapat na idagdag sa sweldo ng mga manggagawa.

(Balitang Todong Lakas Interview)

Ipagpapaliban ni Communist Party of the Philippines o CPP Founder Jose Maria Sison ang naunang plano ng National Democratic Front na pag-uwi niya ng Pilipinas ngayong Agosto.

Kasunod na rin aniya ito ng pasya ni Pangulong Rodrigo Duterte na kanselahin ang nakatakda sanang pagbabalik ng usapang pangkapayapaan sa pagitan ng pamahalaan at mga rebeldeng komunista sa Hunyo 28 hangang 30.

Ayon kay Sison, hindi siya uuwi ng bansa hangga’t hindi pa naisasapinal at nalalagdaan ng magkabilang panig ang comprehensive agreement on social and economic reforms.

Dagdag pa ni Sison, sakaling patuloy na hadlangan ni Pangulong Duterte ang pagbabalik ng peace talks, patuloy niya ring ipagpapaliban ang pag-uwi sa bansa hanggang sa araw na mapatalsik ng taumbayan sa puwesto ang aniya’y diktador na Pangulo.

Sinabi ni Sison, sa ngayon kanya pang pinag-aaralan kung babalik siya sa Pilipinas sa Setyembre o Oktubre.

—-

Inirekomenda ng Office of the Ombudsman ang pagsasampa ng kaso kay dating Pangulong Benigno Noynoy Aquino III sa Sandiganbayan kaugnay ng kontrobersiyal na pagpapatupad nito ng  Disbursement Acceleration Program o DAP.

Sa isang pahayag, sinabi ni Ombudsman Conchita Carpio Morales na may nakitang probable cause para kasuhan si Aquino ng usurpation of legislative powers sa ilalim ng Article 239 ng Revised Penal Code.

Kabaliktaran naman ito nang nauna nang desisyon ng Ombudsman noong nakaraang taon kung saan tanging si dating Budget Secretary Butch Abad lamang ang pinakakasuhan habang inabsuwelto naman si Aquino.

Ang panibagong desisyon ng Ombudsman ay tugon sa inihaing mosyon ng ilang mga grupong iginigiit ang pagpapanagot kay Aquino sa kontrobersiyal na DAP.

Sinabi naman ni Atty. Abigail Valte, tagapagsalita ni Aquino, wala pa silang natatanggap na kopya ng bagong desisyun ng Ombudsman pero nais aniya nilang malaman ang naging batayan nito sa pagbaliktad sa kanilang naunang pasya sa usapin.

Samantala, nirerespeto naman ni Abad ang nasabing pasya ng Ombudsman at tiniyak ang kanilang kahandaan na harapin ang kaso.

Dating Pangulong Noy ipinagtanggol ng Liberal Party

Ipinagtanggol ng Liberal Party ang naging hakbang ni dating Pangulong Noynoy Aquino sa implementasyon ng Disbursement Allocation Program.

Kasunod ito ng pagpapalabas ng panibagong desisyun ng Office of the Ombudsman na nagrerekomendang kasuhan sina Aquino at dating Budget secretary Butch Abad hinggil sa kontrobersiyal na DAP.

Sa ipinalabas na pahayag ng LP, sinabi ng partido na binuo ang DAP para mapadali ang pagbibigay ng serbisyo at programang imprastraktura na kinakailangan ng publiko.

Iginiit din ng LP na naayon sa batas ang pagpapatupad ni Aquino ng DAP.

Dagdag pa ng LP, iginagalang ng dating Pangulo ang naging pasya ng Ombudsman at umaasa itong mabibigyan ng pagkakataon na ipagtanggol ang sarili.

—-

Pumalo 246 na religious leader ang nag-apply ng Permit to Carry Firearms Outside of Residence ayon sa Philippine National Police.

Sinabi ni PNP Chief Oscar Albayalde, na 188 sa nasabing bilang ay mga pari habang 58 naman ang mga ministro at pastor.

Paliwanag ni Albayalde, posibleng nag-apply ang ibang religious leaders para sa proteksyon ng kanilang buhay at ang iba naman ay maaaring libangan lamang.

Kasabay nito, nilinaw ni Albayalde na mababang kalibre lang ang kanilang pinapayagang dalhin ng mga sibilyan kabilang na rito ang mga religious leaders.

Samantala, hindi naman nakukumpirma pa ng PNP kung armado rin ba si Father Richmond Nilo na pinatay sa Nueva Ecija.