HOT STORIES OF THE WEEK

Ilang bansa sa Europa ang posibleng maging bagong destinasyon ng mga Overseas Filipino Workers o OFWs.

Ayon sa Philippine Association of Service Exporters Inc. (PASEI), lumalaki kasi ang demand ng mga manggagawang Pinoy sa Europa partikular sa apat na bansa.

Sinabi ni PASEI President Elsa Villa na nakatakda silang magtungo sa Czech Republic, Poland, Germany at Austria upang alamin ang mga posibleng oportunidad na maaaring magbukas para sa mga OFW.

Ilang umano sa mga pangunahing kailangan ng mga nabanggit na bansa ang mga healthcare professional tulad ng nurse at caregiver maging mga karpintero at construction worker.

Nagpaalala naman si Philippine Overseas Employment Administration o POEA Administrator Bernard Olalia na dapat magkaroon ng bilateral agreement sa Pilipinas ang mga nabanggit na bansa bago magpadala ng mga OFW.

Ito ay upang matiyak umano ang kaligtasan ng mga Pilipinong manggagawa habang nagtatrabaho sa kanilang bansa.

—-

Arestado si Ozamiz City Councilor Ricardo “Ardot” Parojinog kapatid ng napatay na si Ozamiz City Mayor Reynaldo Parajinog sa Pingtung County, Taiwan kagabi.

Ayon sa ulat, ang Philippine National Police o PNP ang nagbigay ng tip sa Taiwan authorities na nagbunsod ng pagkakaaresto kay Parojinog.

Nakuha ang detalye sa kinaroroonan ni Parojinog mula sa naarestong tauhan nito kamakailan.

Naghahanda na ang PNP para sunduin si Parojinog at ibalik sa bansa para kaharapin ang mga kasong nakasampa laban sa kanya.

Si Parojinog ay sampung buwan nang nagtatago sa batas matapos ang madugong raid na isinagawa sa tahahan ng mga Parojinog kung saan napatay ang kanyang kapatid na alkalde at naaresto naman ang mga pamangkin nitong sina Vice Mayor Nova Parojinog at Reynaldo Parojinog Jr.

Natagpuan sa mga tahanan ng mga Parojinog ang matatas na kalibre ng baril, bomba, pera at iligal na droga.

Matatangdaang mismong si Pangulong Rodrigo Duterte pa ang naglaan ng 5 milyong pisong reward sa makakahuli kay ‘Ardot’ buhay man ito o patay.

Una na ring tinukoy ng Malacañang na ang nasa drug list ng Pangulo ang pamilya Parojinog.

Puganteng si Ozamiz City Councilor Ricardo “Ardot” Parojinog, naaresto sa Taiwan ayon kay PNP spokesman CSupt John Bulalacao.

10 buwan nagtago si Ardot matapos mapaslang sa isang raid ang kapatid na si dating Ozamiz Mayor Reynaldo Parojinog na isinasangkot sa droga @dwiz882 pic.twitter.com/wYFpATtjIu

— Jonathan Andal (@JonathanAndal_) May 24, 2018

—-

Nanindigan ang Malacañang na mananatili pa rin ang martial law sa Mindanao.

Matatandaang nanawagan ang ilang Party-list Congressman na bawiin na ng Pangulong Rodrigo Duterte ang martial law       isang taon matapos na pagsiklab ng giyera sa Marawi City.

Ayon kay Presidential Spokesman Harry Roque, mahalaga ang pag-iral ng martial law para sa mabilis na rehabilitasyon sa syudad.

Aniya, pinapawi rin nito ang takot ng mga residente sa muling pag-atake ng natitira pang miyembro ng Maute-ISIS.

Siniguro naman ni Roque na agad ding tatanggalin ng Pangulo ang deklarasyon ng batas militar sa oras na matiyak na matatag na ang sitwasyong pang-seguridad sa rehiyon.

—-

Umapela ng pang-unawa ang pamahalaang lokal ng Lanao del Sur para tugunan ang mga pangangailangan ng mga residente ng Marawi City, isang taon magmula nang umatake ang mga teroristang Maute-ISIS sa lungsod.

Ayon kay Autonomous Region in Muslim Mindanao o ARMM Assemblyman Zia Alonto Adiong, unti-unti nilang tinutugunan ang mga pangangailangan ng mga biktima ng Marawi seige lalo’t hindi aniya simpleng kalamidad ang nangyari sa Marawi.

Sa ngayon sinabi ni Adiong na nasa short term phase pa lamang ang isinasagawang rehabilitasyon sa Marawi.

“’Yung rehabilitation po na sinasabi ninyo kasi ano po ‘yan three phases po ang coverage niya, may pang-emergency response, short term, mid-term at pati na rin ang long term. Pagdating po sa short term comprehensive recovery program, nag-identify na po ng budget ang NEDA para gamitin sa mga immediate assistance na ibibigay sa mga nasalanta at naapektuhan ng giyera, sa ngayon po nasa short term pa rin tayo, in fact meron pa ring mga pamilya na hanggang ngayon ay nasa evacuation centers so in a way nasa emergency response pa rin tayo ngayon, wala po tayo doon sa long term.” Ani Adiong

Samantala, nilinaw naman ni Adiong na hindi pa nagsisimula ang reconstruction ng mga pabahay para sa mga taga-Marawi.

“Ang reconstruction po doon sa damaged area ay hindi pa po talaga nagsisimula dahil sa ngayon nagsu-submit pa rin po ng mga proposal, designs, master planning ang mga involved na contractors and developers. Alam natin na ang Chinese developers ang na-awardan na magco-construct diyan sa most affected area, sa ngayon ay nagsasagawa pa rin sila ng mga meeting and discussion sa Task Force Bangon Marawi, so hindi pa rin po talaga nagsisimula ang reconstruction.” Pahayag ni Adiong

(Balitang Todong Lakas Interview)

Aabot sa 4 billion pesos sa halip na 8.9 billion pesos ang lugi sa pondo ng PhilHealth.

Sa pagdinig ng Joint Congressional Oversight on the National Health Insurance, inihayag  ni PhilHealth officer-in-charge Celestina Maria  Jude Dela Serna  na nagkaroon lang ng double entry kaya’t napabalita  na higit 8 billion pesos ang lugi pero sa katunayan ay  4  billion pesos lamang.

Pero ayon kay Senate Committee on Health  Chairman  JV Ejercito, malaking lugi pa rin ito kaya’t nakakabahala dahil nakatakda pa naman silang magpasa ng Universal Health Care Law kung saan ang PhilHealth ang pangunahing ahensya na magpapatupad nito.

Ayon kay Ejercito, isa sa tinitingnan ng Joint Congressional Oversight Committee ay ang posibleng mafia o kuntsabahan kaya’t nakalulusot ang mga fraudulent claims sa Philhealth.

Iginiit pa ng Senador  na malinaw na may financial mismanagement sa PhilHealth kaya’t nagkaroon ito ng malaking lugi at dapat anyang managot ay mga Board of Director.

Samantala,  hiniling  ni  Ejercito sa Palasyo na magtalaga na ng permanenteng PhilHealth President na financial expert at eksperto rin pagdating sa health insurance.

—-