HOT STORIES OF THE WEEK

(Updated)

Ipinag-utos na ng Bureau of Immigration (BI) ang pagpapa-deport kay Sister Patricia Fox.

Batay sa sampung pahinang order na inilabas ngayong Huwebes, lumalabas na nilabag ni Fox ang ilang mga panuntunan sa pagkakalaob sa kanya ng missionary visa.

Inatasan din ng BI na isama ang pangalan ni Fox sa Immigration blacklist. Dahil dito, hindi na maaaring bumalik ng bansa ang Awstralyanong madre.

Magugunitang inakusahan ng Pangulo si Fox na nakiki-alam sa mga usaping panloob ng Pilipinas kaya’t ipinag-utos ang pagpapaalis dito.

Paliwanag ng Pangulo, ipinapatupad niya lamang ang inilabas na kautusan ng noo’y kalihim ng Department of Justice o DOJ at ngayo’y Senadora Leila de Lima na nagbabawal sa sinumang dayuhan na makilahok sa mga kilos protesta.

Ulat ni Bert Mozo (Patrol 3)

Dismayado naman si Sister Patricia Fox sa naging desisyon ng Bureau of Immigration o BI na ipa- deport siya palabas ng bansa.

Ayon kay Sister Fox, itinuturing niyang tahanan ang Pilipinas sa loob ng tatlong dekada kaya buo ang kanyang pag-asang manatili pa rin dito.

Handa aniya ang kanyang mga abogado na i-apela ang naging desisyon ng BI.

Kasabay nito ay naninindigan pa rin kampo ni Sister Fox na hindi kailan man lumahok ang madre sa anumang kilos protesta at iba pang political activities.

Bukod sa deportation, ipinag-utos din ng BI na ilagay sa blacklist si Fox dahil sa pagiging undesirable alien. —Rianne Briones

____

(Updated)

Binaligtad ng panel of prosecutors ng Department of Justice o DOJ ang naunang desisyon kaugnay sa kaso laban kina Kerwin Espinosa at Peter Co.

Sa kanilang desisyon, nakakita ng probable cause ang panel para kasuhan sina Espinosa at Peter Co.

Dahil dito binuhay ng bagong prosecution panel ang nauang ibinasurang drug case complaint laban sa mga akusado.

Hindi naman kabilang si Peter Lim, negosyante mula sa Cebu sa desisyon dahil nananatiling pending ang kaso nito matapos ang mosyon para sa hiwalay na preliminary investigation na pinagbigyan ng DOJ panel.

DOJ, ipinag-utos na ang pagsasampa ng kaso laban kina Kerwin Espinosa, Peter Co at iba. Ang nasabing kaso ay may kaugnayan sa distribusyon ng iligal na droga sa Region 7 at 8 (Details to follow) | via @bert_dwiz882pic.twitter.com/2ZTzkMU2ut

— DWIZ Newscenter (@dwiz882) July 19, 2018

 

---

PNP

Samantala, welcome sa Philippine National Police o PNP ang desisyon ng Department of Justice na sampahan ng kaso si self-confessed drug lord Kerwin Espinosa at iba pa.

Ayon kay PNP Chief Director General Oscar Albayalde, mayroong matibay na ebidensya laban kay Espinosa at naging consistent rin ang case build-up na ginawa ng Criminal Investigation and Detection Group o CIDG.

Siniguro pa ni Albayalde na handa ang PNP na magbigay ng kaukulang mga ebidensya at impormasyon para mas mapatibay pa ang kaso laban kay Espinosa at mga kasama nito.

Matatandaang binaligtad ng bagong binuong panel ng DOJ ang naunang desisyon ng ahensya na ibasura ang mga kasong palabag sa Comprehensive Dangerous Drugs Act of 2002 laban sa mga akusado.— Rianne Briones

—-

Tiniyak ng mga senador at congressmen na papasa sa constitutionality test ang Bangsamoro Basic Law o BBL.

Ayon kay Congressman Celso Lobregat, miyembro ng Bicam, tiniyak nilang pasok sa konstitusyon ang lahat ng mga probisyon at mga salitang ginamit sa BBL kayat tumagal ang Bicam ng anim na araw.

Sa ilalim anya ng Bicam, tinanggal nila ang anumang salita tulad ng self-determination o independence at binigyang diin na mahalagang bahagi ng Pilipinas ang Bangsamoro kaya’t hindi ito puwedeng humiwalay sa bansa.

Tinatayang 60 bilyong piso kada taon o limang porsyento ng koleksyon ng buwis ang pondo ng Bangsamoro subalit gagastusin ito ng nang naaayon sa panuntunan ng Department of Budget and Management o DBM.

Sakop pa rin sila ng Commission on Audit o COA at ng Office of the Ombudsman.

Sinabi ni Lobregat na tiniyak rin nilang naaayon sa konstitusyon ang paglalagay ng pulis at militar sa Bangsamoro.

Gayunman, hindi inaalis ni Lobregat na makuwestyon sa Korte Suprema ang sistema ng pagbibilang ng boto kapag isinalang sa plebisito ang BBL.

Sa ilalim anya ng BBL, isang boto lamang ang bilang sa mga lalawigang isasama sa bagong Autonomous Region.

Ibig sabihin, kahit manalo ang no vote sa isang lalawigan at ayaw nila sa BBL, isasama pa rin sila sa bagong rehiyon kapag mas maraming lalawigan ang bumoto ng yes.

MILF

Samantala. umaasa ang Moro Islamic Liberation Front o MILF na mananalo sa plebisito ang Bangsamoro Basic Law o BBL.

Sa Lunes, inaasahang isasabatas ng Pangulong Rodrigo Duterte ang BBL upang maisalang sa plebisito sa Nobyembre.

Ayon kay Mohaguer Iqbal, dating chief negotiator ng MILF sa peace talks, 85 hanggang 90 porsyentong naaayon sa nilagdaan nilang peace agreement noong 2014 ang BBL.

Masaya anya ang MILF sa bersyon ng BBL na ipinasa ng mga mambabatas kaya’t umaasa silang susuportahan rin ito ng kanilang mga mamamayan sa plebisito.

Panahon ni dating Pangulong Noynoy Aquino nalagdaan ang peace agreement sa MILF subalit nabigo ang Kongreso na maipasa noon ang BBL.

—-

Lusot na sa Bicameral Conference Committee ang panukalang Bangsamoro Basic Law o BBL.

Napagtibay ito sa Bicam matapos ang anim na araw na mga pagpupupulong upang mapagkasunduan ang ilang probisyon na nakapaloob sa nasabing panukala.

Tumutok din sa pagtalakay ang mga miyembro ng Bangsamoro Transition Commission at liderato ng Moro Islamic Liberation Front.

Inaasahang raratipikahan na ng Senado at Kamara ang final committee report sa Lunes, Hulyo 23 bago ang pagbubukas ng ikatlong sesyon ng 17th Congress.

Posibleng mapirmahan na rin ang final draft ng Pangulong Rodrigo Duterte para tuluyang maging batas ilang oras lamang bago ang nakatakdang State of the Nation Address o SONA.

Kapag tuluyang naisabatas, tatawagin na itong Basic Law for the Bangsamoro Autonomous Region.

WATCH: Senator Migz Zubiri and Congressman Rodolfo Fariñas on the passage of proposed BBL | via @blcb pic.twitter.com/guzqrvd4fz

— DWIZ Newscenter (@dwiz882) July 18, 2018

Ayon naman kay Senator Sonny Angara, ang BBL ang natatanging hakbang para sa wakas ay magkaroon na ng katuparan ang layuning maresolba ang mga hindi pagkakaunawaan para umusad ang kapayapaan at kaunlaran sa Bangsamoro region na ilang dekada nang binabalot ng sigalot.—AR

—-

Nabunyag na tahimik ang federal constitution na ginawa ng consultative committee sa West Philippine Sea.

Ayon kay dating Supreme Court Chief Justice Hilario Davide, hindi man lamang nabanggit ang West Philippine Sea sa mga probisyon ng federal constitution hinggil sa national territory gayung binanggit doon ang Philippine Rise.

Posible anyang dahil sa takot o pagmamahal ng Duterte administration sa China kaya’t tuluyang naisantabi ang West Philippine Sea sa binubuong bagong konstitusyon.

Kinontra naman ng Consultative Committee na bumuo ng draft federal constitution ang pahayag ni dating Supreme Court Chief Justice Hilario Davide na hindi sinama ang West Philippine Sea sa panukalang bagong konstitusyon.

Ayon kay Conrado Generoso, Spokesman ng Con-com, kasama ang West Philippine Sea sa probisyon para sa national territory kung saan binibigyang diin ang karapatan ng Pilipinas sa maritime expanse sa labas ng teritoryong pangkaragatan ng bansa hanggang sa bahaging inirereserba ng international law.

Ipinaliwanag ni Generoso na ang mga katagang reserved by international law ay tumutukoy sa United Nations Convention on the Law of the Sea o UNCLOS at ang maritime expanse ay sa 200-mile exclusive economic zone na sumasakot sa West Phlippine Sea sa kanluran at sa Pacific Ocean sa silangan.

Hindi aniya puwedeng ilagay ang katagang West Philippine Sea o ang Pacific Ocean dahil wala namang nakakaalam sa hangganan ng mga karagatang ito.

Sinabi ni Generoso na kung ilalagay ang West Philippine Sea sa bagong konstitusyon, kailangan ring ilagay ang Pacific Ocean.

—-

Nagbabala ang ilang senador na hindi malayong magalit ang taumbayan sa oras na ipilit ang Charter change o Cha-cha.

Ayon kay Senador Kiko Pangilinan Presidente ng Liberal Party, maaaring mas lalong hindi makakuha ng suporta ang naturang panukala kung ipipilit ito kahit ano pang gawing paliwanag ng gobyerno.

Naniniwala naman si Senate Majority Leader Juan Miguel Zubiri na magkakagulo at posible pang mag-walk out ang mga senador kung gagamitin ang joint session ng Kongreso sa Lunes para ideklara silang Constituent Assembly na aamyenda sa konstitusyon.

Sinabi naman ni Senate Minority Floor Leader Senador Franklin Drilon na dapat bigyang halaga ng pamahalaan ang boses ng publiko kung saan lumabas sa survey na dalawa sa bawat tatlong Pilipino ang tutol sa Cha-cha.

Kaugnay nito, nagsimula na ang Senado na himayin ang draft federal constitution na ginawa para sa isinusulong na federal system ng pamahalaan.

Sa hearing ng Senate Committee on Constitutional Amendments and Revision of Codes at Committee on Electoral Reform, tinukoy ng Con-com o Consultative Committee hindi na matatapos ni Pangulong Rodrigo Duterte at Vice President Leni Robredo ang kanilang termino sakaling maisabatas na ang pagbabago sa konstitusyon.

Tinukoy sa draft na magpapatawag ng eleksyon ang naupong pangulo para maghalal ng transition president at transition vice president na tatapos sa termino ni Duterte at Robredo hanggang Hunyo 2022.

Batay sa draft ay hindi na maaring kumandidato sa 2022 si Pangulong Duterte.

Matatandaang mismo ang Pangulo ang humiling sa Con-com na ilagay ang probisyon na magbabawal sa kanya sa pagkandidato sa susunod na presidential elections.

Ngunit duda dito si dating Chief Justice Hilario Davide Jr.

Kung susuriing mabuti, hindi aniya ipinagbabawal sa naging draft ang muling tumakbo ang Pangulo bilang transition president at malaki rin ang tiyansa na maging transition vice – president si dating Senador Bongbong Marcos sakaling kunin siyang ka-tandem ng Pangulo.

Malacañang

Kinontra ng Malacañang ang mga espekulasyon na lalagpas sa kanyang termino si Pangulong Rodrigo Duterte sa ilalim ng isinusulong na transition form of government patungo sa pederalismo.

Ayon kay Presidential Spokesman Harry Roque, mapanlinalang ang pahayag na lalampas sa termino ang Pangulo.

Paulit ulit na aniyang sinabi ng Pangulo na mas maaga siyang bababa sa puwesto ngunit hindi niya palalawigan ang kanyang termino.

Kasabay nito nagpasalamat ang Malacañang sa constitutional committee sa paglagay ng probisyon na nagbabawal kay Pangulong Duterte na tumakbo sa 2023.—Rianne Briones

—-