HOT STORIES OF THE WEEK

Mahigpit nang i-mo-monitor ng Commission on Elections ang mga social media at online advertisements para sa 2019 midterm polls.

Alinsunod sa Comelec resolution 10488, dapat nang iparehistro ng mga kandidato at political party sa Education at Information Department ng poll body ang lahat ng kanilang website at social media page na ginagamit o gagamitin sa kampanya.

Ito ang unang beses na i-re-regulate ng Comelec ang mga campaign blog at social media post.

Ikinukunsidera ng poll body na karagdagang campaign blogs o pages ang mga blog o social media page na hindi direktang pinangangasiwaan ng isang partido o kandidato subalit nag-eendorso naman ng kandidato o partido.

Bagaman ‘unregulated’ ang paggamit ng social media sa bansa at libre ang distribusyon ng mga campaign material sa internet, tanging magagawa ng comelec ay i-monitor ang mga magastos na website na may maayos na production video o may mga artista bilang endorsers.

Una nang tiniyak ni Comelec spokesman James Jimenez na hindi naman i-re-regulate sa bagong polisiya ang content ng social media bagkus ay nais lamang nilang matiyak ang maayos na halalan.

Tumaas ang bilang ng mga Pinoy na nag-iimpok sa bangko.

Ayon sa Bangko Sentral ng Pilipinas (BSP), umakyat sa 6.8 percent o katumbas ng 57.1 million ang bilang ng deposit accounts sa bansa.

Mas mataas ito kumpara sa 53.5 million accounts na naitala nuong 2016.

Paliwanag ng BSP, bunga ito ng patuloy na paghikayat ng ahensya  sa publiko na mag-impok  sa mga bangko.

Plantsado na ang mga ilalatag na seguridad sa Chinatown sa Binondo, Maynila para sa selebrasyon ng Chinese New Year sa Pebrero 5.

Ayon sa Manila Police District (MPD), asahan na ang mas mahigpit na seguridad gaya ng mga checkpoint at mga gagawing inspeksyon ng mga otoridad.

Magpapakalat ang MPD ng mga pulis sa mga mall at kalsada ng Binondo sa bisperas at sa mismong Chinese New Year.

Inaasahang nasa isang milyon ang bibisita sa Chinatown para sa taunang Chinese New Year.

Nakatakdang ipasara ng pamahalaan ang ilang mall at hotel sa palibot ng Manila Bay.

Ayon kay Department of Interior and Local Government (DILG) Secretary Eduardo Año, masusundan pa ang ipinatupad nilang closure sa mga establisimiyento gaya ng Aristocrat at Gloria Maris.

Sinabi ng kalihim na inaasahang hanggang sa susunod na linggo ay maipapasara ang ilang hotel at mall na diretsong nagtatapon ng kanilang dumi sa Manila Bay.

Kamakailan ay nagpalabas ng cease and desist order ang Laguna Lake Development Authority (LLDA) laban sa tatlong establisimiyento malapit sa Manila Bay.

Tatakbong alkalde ng Daraga, Albay ang asawa ng pinaslang na si Ako Bicol Party list Representative Rodel Batocabe.

Ayon sa ulat, kumpirmado nang si Ginang Gertie Duran-Batocabe ang papalit sa kandidatura ng kanyang asawa.

Makikita rin sa Facebook post ang larawan kung saan itinataas ni Pangulong Rodrigo Duterte ang kamay ni Ginang Batocabe.

Kasabay nito, nagpasalamat ang asawa ng mambabatas sa pangulo sa paghikayat sa kanyang tumakbo sa nalalapit na halalan.

Umatras na bilang kandidato sa pagka-senador si dating Presidential Spokesman Harry Roque.

Ayon kay Roque, nakapagsumite na siya ng withdrawal sa Commission on Elections (Comelec).

Sinabi ni Roque na pinayuhan siya ng kanyang doktor na umatras na sa kanyang kandidatura dahil baka hindi kayanin ng kanyang puso ang stress at iba pang aktibidad sa kampanya para sa eleksyon.

Bagamat hindi direktang tinukoy ni Roque ang kanyang sakit, sumailalim aniya siya sa isang procedure na may kaugnayan sa kanyang puso nang itakbo siya sa ospital noong Lunes.

Kasabay nito, buong pusong nagpasalamat si Roque sa lahat ng sumuporta sa kanyang plano sanang pagtakbo bilang senador.

—-