HOT STORIES OF THE WEEK

Mas tumibay ang anggulong suicide bombing ang nangyari sa Jolo cathedral dahil sa natagpuang iba’t ibang bahagi ng katawan sa pinangyarihan ng pagsabog.

Ayon kay National Bureau of Investigation (NBI) Western Mindanao Regional Office Chief Moises Tamayo, natuklasan sa loob ng simbahan ang hibla ng buhok, parte ng bumbunan at bahagi ng spinal cord na posibleng galing sa iisang tao.

Aniya, natagpuan ito sa puwesto ng choir na mas mataas sa bahagi na kinaroroonan ng mga nagsisimba.

Sa pahayag ng isang testigo, napansin niya ang isang hindi mapakaleng babae na naka-backpack sa center aisle ng simbahan ngunit hindi na niya ito nakita matapos ang kambal na pagsabog.

Samantala, nagpahayag ng pakikiramay ang mga ambassador ng Russia at Israel sa Pilipinas sa mga pamilya ng nasawi sa Jolo cathedral bombing.

Ayon kay Presidential Spokesperson Salvador Panelo, magkahiwalay na humarap kay Pangulong Rodrigo Duterte ang dalawang ambassador para ipahayag ang kanilang pakikipagdalamhati.

Kinilala ng naturang mga bansa ang laban ng Pilipinas laban sa terorismo at karahasan na hatid ng mga extremist group.

Dito ay muli namang inulit ng Russian ambassador ang commitment ng Russia na tumulong sa Pilipinas sa paglaban nito sa terorismo.

Nagpasalamat naman ang Pangulo sa dalawang envoy dahil sa pakikiisa nito sa pagdadalamhati ng buong bansa.

—-

Nangunguna ang Pilipinas sa mga bansa sa mundo na pinakababad sa paggamit ng internet.

Batay ito sa inilabas na Digital 2019 Report ng Social Media Form Hootsuite at We Are Social.

Sa ginawang pag-aaral, umaabot sa sampung (10) oras ang average na oras na online ang mga Pinoy kumpara sa siyam (9) na oras at dalawampu’t siyam (29) na minuto noong taong 2017.

Pangunahing binababaran ng mga Pinoy ang social media sites sa average na apat na oras at labing dalawang (12) minuto kada araw.

Pinakamadalas naman na ginagamit ng mga Pilipino para maka – access sa world wide web ay ang mobile internet data.

Noong taong 2017, Thailand ang siyang may hawak na titulo sa mga bansang pinakababad sa paggamit ng internet.

—-

Sumalubong ang taas presyo sa liquefied petroleum gas (LPG) ngayong unang araw ng Pebrero.

Epektibo kaninang alas-12:01 ng madaling araw, nagtaas na ang Petron sa presyo ng kanilang LPG ng 3.88 pesos sa kada litro o higit 42 pesos sa bawat 11 kilos na tangke.

Habang dagdag na 2.17 pesos naman sa kada litro ng Auto LPG.

Epektibo naman kaninang alas-sais ng umaga, naramdaman na ang dagdag na 3.14 pesos sa kada litro ng Solane LPG.

—-

Aabot na sa apatnapu’t limang (45) toneladang basura ang nahahakot na basura sa clean-up drive sa Manila Bay.

Ayon sa mga residente, unti-unti nang nagkakaroon ng improvement ang amoy ng Manila matapos unti-unting makolekta ang mga basura.

Matatandaang Linggo nang simulan ng pamahalaan sa pangunguna ng Department of Environment and Natural Resources (DENR) ang rehabilitasyon sa Manila Bay.

—-

Binitay ang isang Pinay domestic helper sa Saudi Arabia matapos mapatunayang guilty sa kasong murder.

Hindi na nagbigay ng detalye si Foreign Affairs Assistant Secretary Elmer Cato sa pagkakakilanlan ng OFW dahil sa kahilingan na privacy ng kanyang pamilya.

Ayon kay Cato, naibigay naman ng embahada ng Pilipinas sa Saudi ang lahat ng ayuda habang dinidinig ang kaso ng OFW.

Hindi umano nila napapayag ang judicial council ng Saudi Arabia sa alok na blood money kapalit ng buhay ng OFW.

Sa ngayon ay isinasaayos na ang mga dokumento upang maiuwi sa bansa ang labi ng binitay na Pinay.

—-

Nanganganib na ma-delay pa ng mahigit isang taon ang pagsisimula ng operasyon ng Mislatel bilang ikatlong telco ng bansa.

Babala ito ni Information Communications Technology Secretary Eliseo Rio sakaling mabigo ang Senado na aksyunan ang post evaluation ng Mislatel bago matapos ang 17th Congress.

Ayon kay Rio, walang magagawa ang Mislatel kundi antayin ang 18th Congress upang makakuha ng approval o rejection, na nangangahulugang pagkabinbin pa rin ng kanilang operasyon.

Sakali aniyang rejection ang makuha ng Mislatel, magsasagawa uli ng bidding ang DICT.

Gayunman, kung maaprubahan naman sila ng Senado, makukuha na ng Mislatel sa DICT ang kanilang permit to operate at frequency sa loob ng labing limang (15) araw at maaari na silang magsimula ng operasyon.

Batay sa pagtaya ni Rio, posibleng abutin pa ng sampung buwan bago tuluyang maka-arangkada at makakuha ng subscribers ang Mislatel.

“Kailangan silang mag-certification from SEC na wala silang nilalabag na batas especially ‘yung anti-dummy law, marami ‘yan at ang pinaka-importante kailangan nilang makuha ang approval ng Kongreso na ‘yung prangkisa ng Mislatel ay mapapapunta sa consortium, ‘yan ngayon ang pinag-uusapan sa Congress, sa House of Representatives ay okay na, nakuha na nila ang approval ng Lower House, ito ngayon ay inakyat na sa Senate at dito na nagde-debate ngayon.” Pahayag ni Rio

(Balitang Todong Lakas Interview)