HOT STORIES OF THE WEEK

Absuwelto na ang mga otoridad ang apat na tinukoy na persons of interest sa kambal na pagsabog sa Jolo Cathedral.

Sinabi ni Brigadier General Divino Rey Pabayo, commander ng 11th Infantry Division at Joint Task Force Sulu na nais ng mga nasabing persons of interest na malinis ang kanilang pangalan matapos makuhanan sa CCTV footage at tukuyin ng militar na mga miyembro umano ng Ajang-Ajang group.

Ipinabatid ni Pabayo na alas diyes ng umaga nang sumuko sina Alshaber Arbi, labing walong taong gulang at grade 11 student na siyang naka-ponytail sa kuha ng CCTV at Gerry Isnajil, guro sa Kalingalan Caluang High School.

Sina Arbi at Isnajil ay sinamahan nina Sulu Governor Abdusakur Tan at Mayor Peping Halun ng Kalingalan Caluang.

Ayon pa kay Pabayo, alas tres naman ng hapon nang sumuko rin sa Sulu Police Provincial Office sina Alsimar Mahamud at Julius Abdulzam na nagsabing bumili lamang sila ng gamot para sa inang naka confine sa Sulu Provincial Hospital nang maganap ang pagsabog.

Ang mga sumukong persons of interest ay “cleared” na.

Tinitignan na ng Department of National Defense (DND) ang posibilidad na mga dayuhang terorista ang siyang nasa likod ng pagpapasabog sa Jolo Cathedral.

Ito ay matapos na sabihin mismo ni Pangulong Rodrigo Duterte na mag asawang suicide bomber ang nagpasabog sa naturang simbahan.

Ayon kay Secretary Delfin Lorenzana, may ilang impromasyon silang tinanggap mula sa intelligence sources sa Mindanao region na ang pambobomba ay kagagawan ng mag-asawang Yemeni.

Kabilang sa isinasailalim sa validation ay ang nagkapira-pirasong bangkay sa may pinto ng simbahan na hinihinalang isang dayuhan.

AFP naniniwala na dayuhang terorista posibleng nasa likod ng pambobomba sa Jolo cathedral

Naniniwala ang Armed Forces of the Philippines (AFP) na kung suicide bombing nga ang naganap sa Jolo cathedral ay posibleng mga dayuhang terorista ang siyang gumawa nito para sa mga Abu Sayaf Group.

Ayon kay AFP Chief General Benjamin Madrigal, Jr.,  sa ngayon ay wala pang pilipinong maaring magsagawa ng suicide bombing dahil posibleng hindi pa ganuon kalalim ang indoktrinasyon ng naturang mga teroristang grupo.

Nilinaw din ni Madrigal na hindi pa tuluyang isinasantabi ng militar ang anggulong suicide bombing tulad ng naging pahayag ni Pangulong Rodrigo Duterte.

Aniya, malaki rin ang posiblidad nito lalo pa’t may sariling mga sources ng impormasyon ang pangulo.

Una nang tinukoy ng pangulo na mag-asawa ang siyang na sa likod ng marahas na pagpapasabog sa Jolo cathedral kung saan umabot sa mahigit 20 ang nasawi habang higit 100 iba pa ang nasugatan.

—-

Nagsimula na ang pagbagsak ng mga bomba mula sa attack helicopters ng militar sa mga hinihinalang kuta ng Abu Sayyaf.

Ipinadala na sa Sulu ang attack helicopters kasunod ng deklarasyon ng all-out war ng Pangulong Rodrigo Duterte laban sa Abu Sayyaf.

Ayon kay Col. Gerry Besana, Spokesman ng Western Mindanao Command (Wesmincom), bago pa man ang twin bombing sa Our Lady of Mount Carmel Cathedral ay puspusan na ang pagtugis nila sa Abu Sayyaf.

Samantala, kasabay ng airstrike ang pagsalakay naman ng militar at pulisya sa mga hinihinalang kuta ng mga suspects sa pagpapasabog na nakita sa CCTV.

Sa tahanan ng isang alias Kamah, napatay ang kamag-anak nito na nakilalang si Ommal Yusup matapos na di umano’y manlaban nang aarestuhin sana ng awtoridad.

Samantala, nakakatas naman di umano si Kamah at isa pang hindi kinilalang suspek.

—-

Naniniwala si Pangulong Rodrigo Duterte na suicide bombing ang nangyari sa Jolo cathedral.

Taliwas ito sa unang pahayag ng militar kung saan isinantabi ang anggulong suicide bombing.

Sa ground breaking ng San Lorenzo Hospital sa Malabon City kahapon, sinabi ng Pangulo na mag-asawa ang mga suicide bomber kung saan ang babae ang siyang nagpasabog sa loob ng simbahan habang ang lalaki naman ang siyang nagpasabog sa labas.

Kumbinsido ang Pangulo na Abu Sayyaf Group (ASG) ang siyang nasa likod ng pag-atake batay na rin sa babala na ibinigay ng Indonesian authorities.

All-out war

Samantala, ipinag utos ni Pangulong Duterte ang all-out war laban sa Abu Sayyaf Group kasunod ng kambal na pagsabog sa Jolo, Sulu.

Una nang sinabi ng Pangulo sa kanyang naging pagbisita sa Jolo na dapat na pulbusin na ang Abu Sayyaf Group at iba pang grupong kalaban ng pamahalaan.

Kaugnay nito, agad na naglunsad ng intense military operation ang Armed Forces of the Philippines (AFP).

Kinanyon ng militar ang lokasyon ng kalaban sa Patikul at naglarga pa ng airstrike.

Matatandaang umabot na sa 21 ang namatay habang higit 100 ang nasawi sa ginawang pag-atake sa Jolo cathedral noong Linggo ng umaga.

—-

Ang kambal na pagsabog sa Jolo Cathedral ay malaking patunay na nananatili ang banta ng terorismo sa Mindanao.

Ito ang iginiit ni Solicitor General (SolGen) Jose Calida bilang pag-depensa sa extension ng martial law declaration sa Mindanao sa isinagawang oral argument sa Korte Suprema.

Sinabi ni Calida na pinalakas lamang ng nasabing insidente ang aniya’y factual basis nila para palawigin pa sa ikatlong pagkakataon ang pagpapatupad ng batas militar sa mindanao hanggang sa December 2019.

Sinuportahan naman ni AFP Deputy Chief for Intelligence Major General Pablo Lorenzo ang nasabing pahayag ni Calida matapos bigyang diin na ang naturang pag-atake ay malinaw na ebidensya para matutukan ang kaligtasan ng publiko.

Gayunman, kinontra ni Congressman Edcel Lagman ang mga nasabing argumento at sinabing hindi dapat gamiting basehan para sa martial law extension ang nangyaring pagsabog sa Jolo dahil itinuturing itong kagagawan ng terorista.

Inilatag din ni Calida sa high tribunal ang report ng AFP hinggil sa bilang ng mga aktibong miyembro ng mga teroristang grupo tulad ng Abu Sayyaf, BIFF, Maguid Group at Turaifie Group.

Mag-resign o kakasuhan.

Ito ang hamon ng Pangulong Rodrigo Duterte sa dalawang opisyal ng Conversion Office ng Department of Agrarian Reform na una nang binantaang sisibakin.

Sinabi ng pangulo na may ranggong director ang kaniyang sisipain sa puwesto at hindi na rin mahalagang tukuyin pa niya kung sino ang mga nasabing opisyal ng Land Conversion Office.

Dismayado ang pangulo dahil inabot ng dalawang taon ang pag-proseso sa land conversion sa isang proyekto hanggang sa isumbong sa kaniya ang nasabing reklamo.

Iginiit ng pangulo na maituturing na korupsyon kung pababalik-balikin ng opisyal ng gobyerno ang mga aplikante na nag aayos ng mga papeles sa alinmang opisina ng pamahalaan.

Maglalabas ng show cause order ang Kamara laban kay Department of Budget and Management Secretary Benjamin Diokno.

Kasunod na rin ito ng nasabing kahilingan ni Congressman Vicente Veloso sa pagdinig ng House appropriations committee dahil sa patuloy na pang-iisnab ni Diokno sa budget hearing.

House Appro.Committee to issue show cause order vs DBM Sec.Diokno # Probe P75B GAA insertion#Flood Control scam -Andaya @dwiz882 pic.twitter.com/Ln4pBrnef5

— JILL RESONTOC – DWIZ -882 AM radio (@JILLRESONTOC) January 29, 2019

Nais pagpaliwanagin ng Kamara si Diokno kung bakit hindi ito dapat i-cite for contempt sa hindi pagsipot sa House hearings sa ika-apat na pagkakataon, sa kabila ng ilang beses ding pag imbita rito.

(with report from Jill Resontoc)