HOT STORIES OF THE WEEK

Sinimulan nang dinggin ngayon ng Korte Suprema sa oral arguments ang mga petisyong kumukuwestyon sa ikatlong pagpapalawig sa martial law sa Mindanao.

Apat ang petisyong naihain sa Supreme Court, kabilang dito ang sa Magnificent Seven ng House of Representatives, Makabayan Bloc, dating Comelec Chairman Christian Monsod at Lumad teachers na kinakatawan ng Free Legal Assistance Group (FLAG).

Iginiit ng mga petitioners na hindi na umiiiral ngayon sa Mindanao ang factual basis na natatanging basehan ng deklarasyon ng martial law, batay sa Saligang Batas.

Ang oral arguments ay magsisimula ngayong hapon at handa umanong ipagpatuloy bukas ng Korte Suprema kung kinakailangan.

Una rito, dalawang beses nang pinagtibay ng Korte Suprema ang deklarasyon ng martial law sa Mindanao.

—-

Nilinaw ng Department of Environment and Natural Resources (DENR) na maaari pa ring magpatuloy ng operasyon ang mga restaurants na natuklasan nilang nagtatapon ng maduming tubig sa Manila Bay.

Ayon kay DENR Undersecretary Jonas Leones, ang tanging ipinasara nila ay tubo ng mga restaurants kung saan dumadaloy ang madumi nilang tubig patungo sa Manila Bay.

Ipinaliwanag ni Leones na mayroong sinusunod na due process sa pagpapasara ng mga posibleng lumalabag sa environmental laws.

Kabilang sa mga restaurants na natuklasang naglalabas ng maruming tubig sa Manila Bay ang Aristocrat Restaurant, Gloria Maris Shark’s Fin Restaurant at San Miguel By The Bay.

Una nang napaulat na patuloy ang operasyon ng tatlong restaurants sa kabila ng pagpapasara sa kanilang water discharge point.

“Pinutol na natin ‘yung kanilang discharge point, at kung makikita natin na may mga violations pa rin ay maaari na nating putulin ang supply ng tubig, siguro naman itong mga gagawin natin ay mapipilitan siyang mag-sarado, ngayon kung hindi talaga siya sumusunod, gross violation na ang ginagawa, then that’s the time na we will be coordinating with the local government unit na talagang isarado na ‘yang establisyimento na ‘yan.” Pahayag ni Leones

(Balitang Todong Lakas Interview)

Dalawa na lamang sa dalawampu’t isang (21) nasawi sa Jolo bombing ang hindi pa nakikilala.

Ayon kay Philippine National Police (PNP) Chief, Director General Oscar Albayalde, natatagalan ang pagkilala sa dalawang labi dahil nagkalasog-lasog ang labi ng mga ito.

Sinabi ni Albayalde na mahalagang makilala ang dalawang labi upang makumpirma o maisantabi na ang anggulo na suicide bombing ang nangyari sa pagpapasabog sa Our Lady of Mount Carmel Cathedral.

—-

Ipinag-utos ni Pangulong Rodrigo Duterte ang all-out war laban sa teroristang grupong nasa likod ng malagim na pagpapasabog sa Our Lady of Mt. Carmel Cathedral sa Jolo, Sulu.

Ayon kay Western Mindanao Command Spokesperson Col. Gerry Besana, inihayag mismo ni Pangulong Duterte ang nasabing kautusan sa harap ng mga sundalo kasabay ng pagbisita nito sa Jolo Sulu matapos ng nangyaring pagsabog doon.

Aniya, inatasan sila ng Pangulo na habulin ang grupong nasa likod ng pag-atake at bigyan ng hustisya ang mga biktima ng insidente.

Samantala, sinabi ni Jolo Mayor Kherkar Tan na nagkasa na ng manhunt operations ang pulisya laban sa apat na lalaking nakunan ng CCTV bago ang pagsabog sa cathedral at itinuturing na persons of interest.

AFP hindi pinatulan ang pag-ako ng ISIS sa pagpapasabog sa Jolo

Isinasantabi ng Armed Forces of the Philippines (AFP) ang posibilidad na Islamic State of Iraq and Syria (ISIS) ang nasa likod ng madugong pagpapasabog sa Jolo Sulu.

Ito ay matapos na akuin ng ISIS ang nangyaring kambal na pagsabog sa Our Lady of Mt. Carmel Cathedral kamakalawa.

Ayon kay AFP Spokesman Brig. General Edgard Arevalo posibleng bahagi lamang ng propaganda ng ISIS ang ginawa nitong pag-ako sa nasabing madugong pagsabog.

Aniya, dati nang ginagawa ng ISIS ang pagkukunwaring sila ang may pakana sa ilang mga nagaganap na insidente tulad ng nangyari noon sa Resorts World.

Batay sa post ng website na site intelligence group, inamin ng Islamic State East Asia Province na dalawa nilang miyembro umano ang nasa likod ng suicide bombing sa cathedral sa Jolo.

—-

Kumilos na rin ang Commission on Human Rights (CHR) para imbestigahan ang kambal na pagpapasabog sa Jolo Cathedral.

Ipinabatid ito ni CHR spokesperson Atty. Jacqueline De Guia matapos kundenahin ang nasabing pagpapasabog na ikinasawi ng halos 20.

Sinabi ni De Guia na walang lugar ang karahasan sa Mindanao lalo na’t isinusulong ang kaayusan sa rehiyon sa pamamagitan ng plebisito kaugnay sa Bangsamoro Organic Law (BOL).

Business as usual pa rin sa ilang establishment na una nang pinuna ng mga otoridad na direktang nagtatapon ng basura sa Manila Bay.

Kabilang dito ang Aristocrat Restaurant sa Roxas Boulevard at Gloria Maris Restaurant malapit sa Folk Arts Theater, 14 pang kainan sa The Esplanade o San Miguel by the Bay at Universe Disco sa Pasay City.

Una nang ipinag utos ng Department of Environment and Natural Resources (DENR) ang temporary closure sa mga naturang establishment maliban sa Universe Disco na nuong Disyembre pa naisyuhan ng cease and desist order subalit nag-ooperate pa rin.

Aminado ang Malakanyang na ikinagalit at ikinadismaya ni Pangulong Rodrigo Duterte ang magkasunod na pambobomba sa isang simbahan sa Jolo, Sulu.

Ayon kay Presidential Spokesman Salvador Panelo, hindi naiwasang magalit ang pangulo dahil sa kabila ng martial law at pagpupursige na magkaroon ng kapayapaan sa Mindanao ay mayroon pa ring mga naghahasik ng gulo.

Hindi naman mabatid ni Panelo kung may mga opisyal na mapaparusahan o masisibak sa pwesto lalo’t malinaw na nagkaroon ng security lapse.

Gayunman, hihintayin pa aniya ni Pangulong Duterte ang resulta ng imbestigasyon bago mag-desisyon.

Tukoy na ng Philippine National Police ang suspek sa magkasunod na pambobomba sa Mount Carmel Cathedral sa Jolo, Sulu.

Kinilala lamang ni PNP Chief, Dir. Gen. Oscar Albayalde ang suspek na si Alyas Kamah, kapatid ng napaslang na Abu Sayyaf sub-leader na si Surakah Ingog.

Batay anya sa CCTV footage, nakitang umaaligid si Kamah sa simbahan kasama ang iba pang suspek bago ang magkasunod na pagsabog.

Kilalang gumagawa ng bomba si Kamah at batay sa inisyal na imbestigasyon ay nasa dalawang kilo ng pampasabog ang ginamit ng mga suspek.

Gayunman, isinasailalim pa sa pagsusuri ang bomb fragments na narekober sa blast site upang mabatid kung anong uri ng pampasabog ang itinanim sa nabanggit na lugar.

Samantala, hindi rin inaalis ng PNP ang posibilidad na islamic state ang nasa likod ng pag-atake kahit pa malinaw na mga miyembro ng Abu Sayyaf ang nagsagawa ng pambobomba.