HOT STORIES OF THE WEEK

Muling magpapatupad ng taas presyo sa produktong petrolyo bukas, January 29.

Ayon sa report, sa ika-apat na linggo ng oil price hike ngayong buwan, nasa pagitan ng limampu (P0.50) hanggang anim napung (P0.60) sentimo kada litro ang dagdag sa presyo ng diesel at kerosene samantalang beinte (P0.20) hanggang trenta (P0.30) sentimos naman sa gasolina.

Sa pagsisimula ng taong 2019, mahigit tatlong piso (P3.00) na ang itinaas ng presyo ng diesel habang mahigit dalawang piso (P2.00) naman sa gasolina at kerosene.

Bukod sa paggalaw ng presyo ng petrolyo, nagdagdag na ang ilang gasolinahan ng mahigit dalawang piso kada litro bilang excise tax.

Kung susumahin ang taas presyo at dagdag buwis, nasa mahigit limang piso (P5.00) na ang iminahal ng diesel, mahigit 4.50 naman sa gasolina at lampas tatlong piso (P3.00) sa kerosene.

—-

Mariing kinondena ni Pope Francis ang nangyaring pagpapasabog sa cathedral sa Jolo Sulu na ikinasawi ng hindi bababa sa labing walo (18) katao.

Ayon kay Pope Francis, hindi katanggap-tanggap ang nangyaring karahasan na nagdulot ng pagdadalamhati sa Christian community.

Kasabay nito nagpaabot ng panalangin si Pope Francis sa mga nasawi at nasugatan sa insidente gayundin para sa pagpapanibago sa puso ng mga nasa likod ng pag-atake.

Hindi bababa sa labing walo (18) ang nasawi habang mahigit walumpung (80) iba pa ang sugatan sa kambal na pagsabog sa Our Lady of Mount Carmel Cathedral pasado alas-8:30 ng umaga, kahapon.

Batay ito sa tala ng WESMINCOM o Western Mindanao Command, bagama’t mas mataas ang bilang ng Police Regional Office–ARMM kung saan dalawampu (20) na ang patay at isang daan at labing isa (111) naman ang sugatan sa insidente.

Kabilang sa mga nasawi ang isang tauhan ng Philippine Coast Guard at limang sundalo.

Ayon kay Wesmincom Spokesperson Col. Gerry Besana, nangyari ang unang pagsabog sa loob ng cathedral habang isinasagawa ang isang misa na sinundan naman ng panibagong pagsabog sa bahagi ng parking lot.

Sinabi ni Besana, sa kanilang inisyal na imbestigasyon, lumabas na grupong Adjang-Adjang ng Abu Sayyaf Group na siyang nag-ooperate sa lugar ang nasa likod ng pag-atake batay na rin sa narekober nilang kuha ng CCTV.

Posible aniyang paghihiganti ang motibo ng mga ito matapos mapatay ang isang sub-leader ng Abu Sayyaf noong nakaraang taon.

—-

Umarangkada na ang Manila bay rehabilitation project.

Dakong ala singko ng madaling araw nang magsimula ang rehabilitasyon sa pamamagitan ng isang seremonya sa Quirino Grandstand sa Luneta, Maynila.

Pinangunahan ni Environment Secretary Roy Cimatu ang aktibidad kasama sina Tourism Secretary Bernadette Romulo-Puyat, Public Works Secretary Mark Villar, acting Information and Communications Technology Secretary Eliseo Rio at Metropolitan Manila Development Authority Chairman Danilo Lim.

Nasa 5,000 volunteers naman ang lumahok sa solidarity walk na sinundan ng paglilinis  sa baywalk area.

Kasabay nito, naglunsad din ng clean-up activities sa Bulacan, Pampanga at Bataan.

DENR Sec Cimatu, DILG Sec Ano, DOT Sec Puyat, DPWH Sec Villar, & DENR officials lead the Solidarity Walk to officially launch the Manila Bay rehabilitation. #BattleforManilaBay#SaveManilaBay#ManilaBayanihanpic.twitter.com/VNolkRb98P

— DENR (@DENROfficial) January 27, 2019

Ilang establisyimento, inisyuhan ng notice of violation

Inisyuhan na ng notice of violation ng Laguna Lake Development Authority ang ilang establisamiyento na nagdudulot ng polusyon sa Manila bay.

Ayon kay DENR undersecretary Benny Antiporda, bagsak sa coliform level na nagcocontribute sa pollution sa Manila bay ang mga establisyimentong ito.

Unang inisyuhan ng Ceased and Desist Order ang Aristocrat restaurant sa Malate Maynila, sunod ang Gloria-Maris at Esplanade.

Tiniyak ng DENR na masususpinde ang Environmental Compliance Certificate ng mga establisyimento ito at Mayor’s permit sa pamamagitan ng Department of Interior and Local Government.

Mismong si DENR Secretary Roy Cimatu ang nanguna sa paghahain ng notice of violations sa mga business establishment.

Ang ibang establisyimento na nakitaan din ng mga paglabag kabilang ang mga hotels ay sasailalim pa sa validation.

LLDA closes Aristocrat Restaurant along Roxas Blvd for violation of RA 4850. #BattleforManilaBay #SaveManilaBay #ManilaBAYnihan pic.twitter.com/bRRcwBPWS8

— DENR (@DENROfficial) January 27, 2019

Sec Cimatu explains to a staff of Gloria Maris Restaurant its closure for violation of Republic Acts 4850 and 9275. #BattleforManilaBay#SaveManilaBay#ManilaBAYnihanpic.twitter.com/4EChkkFKnm

— DENR (@DENROfficial) January 27, 2019

---

—-

Inilabas na  ng Commission on Elections o Comelec ang opisyal na listahan ng mga senatorial candidate at party-list group para sa  May 13 midterm  polls.

Ayon kay Comelec spokesman James Jimenez, 77 ang kandidato sa pagka-senador subalit l4 sa kanila ang may nakabinbing kaso.

Nireresolba naman ng poll body ang mga  kaso  ng 13 senatorial aspirants kabilang ang kay Senador Aquilino Pimentel III at dating Senador Sergio Osmeña III.

Kabilang sa nakapasok sa listahan sina Pimentel, Osmeña, Magdalo Partylist Rep. Gary Alejano, dating Interior Secretary Raffy Alunan, Senators Sonny Angara, Bam Aquino, Cynthia Villar, JV Ejercito, Nancy Binay at Grace Poe, mga dating senador na si Juan Ponce Enrile, Mar Roxas, Lito Lapid, Pia Cayetano, Jinggoy Estrada at Bong Revilla Jr, dating Bureau of Corrections Director at PNP Chief Ronald dela Rosa, dating  Presidential Assistant Bong Go, dating Presidential Adviser on Political Affairs Francis Tolentino, dating Presidential spokesman Harry Roque, Ilocos Norte Governor Imee Marcos,  Maguindanao Rep. Dong Mangudadatu, election lawyer Romy Macalintal, Atty. Larry Gadon at dating Quezon Province Rep. Lorenzo “Erin” Tañada.

Niratipikahan na ang Bangsamoro Organic Law (BOL) na lilikha ng mas matatag na rehiyon sa Mindanao kahapon.

Ito ang inanunsyo ng Commission on Elections (Comelec) matapos makakuha ng kabuuang 1,540,017 botong “yes” mula sa mga residente, habang 197,750 ang bumotong “no”.

Ayon kay Comelec chairman Sheriff Abas, ang report kaugnay sa pagratipika sa nasabing batas ay isusumite kay Pangulong Duterte, sa Senado at sa Kongreso sa lalong madaling panahon.

Samantala, ang ikalawang bahagi ng plebisito ay isasagawa sa Pebrero 6 sa anim na bayan sa Lanao del Norte at 39 nayon sa hilagang Cotabato.

Layon ng BOL na wakasan ang limang dekadang sigalot dulot ng rebelyon sa Mindanao sa pamamagitan ng pagtatag ng bagong pinalakas na Bangsamoro region.

The consolidated Canvass Report of the National Plebiscite Board of Canvassers. #BangsamoroPlebiscite #Bangsamoro pic.twitter.com/Ng14EhVnNW

— James Jimenez (@jabjimenez) January 25, 2019

Nanindigan si Sen. Richard Gordon na dapat ibaba sa 12 taong gulang ang minimum age of criminal responsibility mula sa kasalukuyang 15 taong gulang batay sa Juvenile Justice Law.

Ito ang naging rekomendasyon ng senador makaraang pangunahan ang ikalawa at huling pagdinig ukol sa naturang panukala.

Kaya nang usisain ng media kung ano ang scientific basis dito, binigyang diin ni Gordon na 12 taong gulang ang batas sa halos lahat ng bansa sa mundo.

Samantala, tinukoy naman ni Gordon na walong taong gulang ang minimum age of criminal responsibility sa England at Singapore habang wala aniyang ganito sa Estados Unidos.

Isiniwalat ni Commissioner Greco Belgica na kasalukuyang iniimbestigahan ng Presidential Anti-Corruption Commission (PACC) ang 10 hanggang 12 kaso ng mga hinihinalang corruption activities sa Department of Public Works and Highways (DPWH).

Ayon kay Belgica, karamihan sa mga kasong ito ay may kaugnayan sa mga proyekto at negotiated biddings na lihim aniyang ginagawa pero ayaw nitong tukuyin ang mga DPWH regional office na may kinalaman dito.

Paliwanag naman ng opisyal, hindi pa nila maaaring isiwalat ang kabuuang impormasyon dahil nagpapatuloy pa ang kanilang imbestigasyon hinggil sa naturang mga anomalya.

Pagkakaroon ng access para sa de kalidad na edukasyon.

Ito ang nakikita ng Department of Education (DepEd) na paraan upang mailayo sa masasamang gawain ang mga kabataan.

Ayon kay Education Undersecretary Annalyn Sevilla, ang mga batang wala sa paaralan ang kalimitang madaling nalilihis ng landas.

“Karapatan po lahat ng batang Pilipino na magkaroon ng access at de kalidad na edukasyon. Ayan po ang trabaho ng DepEd at iyan din po ang aming sagot, di ba mayroon tayo na issue bakit ibababa ang edad ng bata para siya ang maging liable criminally. Ang isa nga natin nakikita is – pag ang bata talaga ay wala sa eskuwelahan at naiimpluwensyahan ng hindi tama doon talaga mapupunta sa maling direksyon.” Pahayag ni Usec. Sevilla

Ang pahayag ni Sevilla ay kasunod ng mga panukalang babaan ang criminal liability ng mga bata sa edad na nuebe ngunit dahil sa mga mariing pagtutol ay itinaas ito sa dose anyos.

(Interview from IZ Balita Nationwide)

Pinangunahan ni PNP Chief Director General Oscar Albayalde  “National Day of Remembrance” na naglalayong gunitain ang tinaguriang SAF 44.

Ito na ang ika-apat na taon mula nang mapatay sa Mamasapano encounter ang apatnapu’t apat na miyembro ng PNP Special Action Force.

Sama sama ring nag-alay ng bulaklak ang mga opisyal ng pnp at pamilya ng mga nasawi sa SAF 44 memorial sa Camp Bagong Diwa sa Taguig.

Sa kanyang talumpati, tiniyak ni Albayalde na hindi nalilimutan ang kabayanihan ng SAF 44 at patuloy ang pagsisikap nilang mabigyan ng hustisya ang pagkamatay ng mga ito.

TINGNAN:#SAF44, binigyang-pugay at pagkilala ng PNP kaalinsabay sa ika-apat na taong anibersaryo ng Mamasapano massacre ngayong araw | via @jaymarkdagala pic.twitter.com/oNbA3xltZN

— DWIZ Newscenter (@dwiz882) January 25, 2019

(Ulat ni Jaymark Dagala)