HOT STORIES OF THE WEEK

Kinumpirma ng Philippine National Police (PNP) ang ulat na mag-asawang Indonesian suicide bombers ang may dala ng mga sumabog na bomba sa Our Lady of Mt. Carmel Cathedral sa Jolo, Sulu.

Ayon kay PNP Chief Director General Oscar Albayalde, nasa isang taon nang nananatili sa Pilipinas ang lalaking Indonesian habang ilang araw pa lamang sa bansa ang asawa nito nang isagawa ang pambobomba.

Sinabi ni Albayalde, ang sumukong si Kamah el Pae alyas Kamah ng grupong Ajang-Ajang ang itinuturong naghatid sa mag-asawang Indonesian sa Jolo cathedral dala ang dalawang bomba.

Magugunitang batay sa testimonya ng mga saksi, nakapuwesto sa loob ng simbahan ang babaeng Indonesian national habang nasa labas naman ang lalaki nang mangyari ang pagsabog.

(Ulat ni Jaymark Dagala)

Malabo nang makapasa pa ang panukalang national budget para ngayong 2019 kung hindi magkakasundo ang mataas at mababang kapulungan ng Kongreso.

Sa Miyerkoles, nakatakdang mag-adjourn ang sesyon ng Kongreso bilang paghahanda sa pagsisimula ng election campaign sa Pebrero 12.

Gayunman, maaari pa ring mag-sesyon ang Kongreso hanggang Biyernes kung may nais silang ihabol na aaprubahan.

Subalit ayon kay Senador Panfilo ‘Ping’ Lacson, malabong pumasa ang panukalang budget kapag hindi nagkasundo sa anya’y hatian sa ‘pizza pie’ ang mga senador at kongresista.

Sinabi ni Lacson na tinawag niya itong ‘pizza pie’ dahil magmumula lamang sa iisang pie ang lahat ng re-alignments ng mga mambabatas.

Tinukoy ni Lacson ang mahigit limampu’t isang (51) bilyon piso o tig-animnapung milyong pisong alokasyon para sa mga kongresista.

Karagdagan lamang aniya ito sa isaandaang (100) milyon na nakalagay na sa budget proposal ng Malacañang.

Dito rin aniya kumuha ang mga senador sa individual at institutional amendments tulad na lamang ng dalawampu’t tatlong (23) bilyong piso para sa Department of Health (DOH).

Una nang sinabi ni Lacson na mayroon insertions ang ilang senador sa budget ng Department of Public Works and Highways (DPWH).

(Ulat ni Cely Bueno)

Nagpaliwanag ang National Capital Region Police Office (NCRPO) hinggil sa pagbabawal sa pagdadala ng mga bottled water at iba pang klase ng liquid sa mga matataong lugar partikular na sa LRT at MRT.

Ayon kay NCRPO Chief Director Guillermo Eleazar, bagama’t mababa lamang ang posibilidad ng liquid bombing, mas makakabubuti pa rin aniyang maging maingat ang lahat.

Binigyang diin pa ni Guillermo, bahagi ng international security standards ang kanilang ipinatutupad na pagbabawal sa mga klase ng likido kabilang na ang bottled water.

Kasabay nito, humingi si Eleazar ng pang-unawa sa publiko hinggil sa mga ipinatutupad na seguridad ng pulisya para mapigilang magkaroon ng spill over sa Metro Manila ng nangyaring pagsabog sa Jolo, Sulu at Zamboanga.

“Ang ginagawa natin dito sa pinataas na level ng alerto ay isang precautionary or proactive measure dahil mas maganda na tayo’y nakakasiguro kaysa naman na tayo ay malusutan, so hinihingi natin ang mahabang pasensya ng taong-bayan sa ating ipinatutupad na security measures.” Ani Eleazar

Samantala, nilinaw naman ni Eleazar na hindi nila ipinagbabawal ang pagdadala ng mga backpack at sa halip ay pinapayuhan lamang ang publiko na iwasan nang magdala ng mga ito para hindi na rin maabala sa mahigpit na inspeksyon.

“Ang ating iniiwasan ay ang pagpasok ng mga illegal contraband, firearms, bladed weapons at mga bagay na puwedeng gamitin para sa pagpapasabog, ‘yan po ang ating ipinagbabawal, ‘yung backpack hindi naman talaga ipinagbabawal per se pero ang advise natin ay iwasan na ang pagdadala para hindi na makasagabal pa at maging inconvenient sa pag-iinspect.” Pahayag ni Eleazar

(Balitang Todong Lakas Interview)

Nakahanda ang pamahalaan ng Indonesia na tumulong sa imbestigasyon sa nangyaring kambal na pagsabog sa cathedral sa Jolo Sulu noong nakaraang linggo.

Ayon kay Interior and Local Government Secretary Eduardo Año, nakipag-ugnayan na sila sa Indonesian government para agad na matukoy ang nasa likod ng pag-atake.

Kasunod na rin aniya ito ng lumabas na anggulong isang mag-asawang Indonesian suicide bombers ang posibleng nagsagawa ng pag-atake.

Sinabi ni Año, tutulong ang Indonesia sa isinasagawang forensic at DNA examinations.

—-