HOT STORIES OF THE WEEK

Dapat ipagbawal ang pagparada ng mga sasakyan sa mga kalsada sa kahabaan ng Metro Manila.

Ito ang naging suhestiyon ni Senate President Vicente Sotto III sa pagdinig ng senado para masolusyonan ang hindi matuldukang problema sa trapiko sa EDSA.

Sa ganitong paraan aniya ay hindi na makadaragdag pa sa volume sa EDSA ang mga nakaparadang pribadong sasakyan dahil maaari naman aniyang gumamit ang mga ito ng alternatibong ruta patungo sa kanilang mga destinasyon.

Dagdag pa ni Sotto, dapat aniyang kumilos ang mga lokal na pamahalaan sa pamamagitan ng pagkakasa ng road clearing operations habang nililinis ang EDSA mula sa mga pribadong sasakyan.

I go back to my original proposal, noong araw pa ito, walang nakikinig. May nakinig konti lang. Ang talagang solusyon to decongest EDSA ay ‘no parking’ in Metro Manila,” giit ni Sotto.

Nag-alok ng ibang solusyon ang dalawang kinatawan ng kongreso mula sa probinsya sa halip na magpatupad ng provincial bus ban.

Ayon kay Camarines Sur 2^ND District Congress Lray Villafuerte, maaari naman limitahan na lamang sa madaling araw ang dating ng mga provincial bus sa Metro Manila.

Nagkaisa rin sina Villafuerte at Ako Bicol partylist representative Alfredo Garbin na anti-poor ang panuntunang ito na isinusulong ng MMDA.

My stand is, this ban, with all due respect, is anti-poor, Madam Chair. And kawawa ang taumbayan lalong-lalo na sa mga tga-probinsya. While you are prohibiting provincial buses to go to EDSA, the LTFRB is allowing 14,000 premium taxis to support the more than 50,000 passengers daily from the stop of Sta. Rosa and Valenzuela, Madam Chair. Then, there will be 2,000 new P2P buses at both stop of points to enter EDSA,” ani Villafuerte.

Sinegundahan ni Garbin si Cong. Villafuerte na madaling araw ang dating sa Metro Manila ng mga bus galing probinsya kaya’t hindi sila ang dahilan ng trapik sa EDSA.

Kasabay nito, kinuwestyon ni Garbin kung ano ang magiging kaibahan kung padidiretsuhin na lamang sa Metro Manila ang mga provincial buses at sa paglipat sa P2P buses ng mga pasahero kung hanggang Sta. Rosa o Valenzuela na lamang ang mga bus mula sa probinsya.

The commuters from the Bicol region, but the tired commuters coming from the Visayas and the Mindanao, 24hrs na po silang nagbabyahe. Galing sa roro, titigil niyo ho sa Sta. Rosa Laguna. The children, the PWDs, the pregnant women, the senior citizen, we’ve been trying to consider that. So, ang mangyayari lang ho dito is that it wouldn’t pay more expenses, it will prolong the travel time, so much inconvenience and at the same time, ‘yung bus na pagta-transferan nila, kukunin sila sa Sta. Rosa, Laguna or Valenzuela for that matter, it will arrived in EDSA on a rush hour,” ani Garbin.

Umarangkada na ang pagdinig ng Senate Committee on Transportation and Public Services sa traffic plan ng Metro Manila Development Authority (MMDA) para sa EDSA.

Ipinatawag ni Senadora Grace Poe, chairman ng komite, ang pagdinig sa harap ng ‘monster’ traffic na dinanas sa EDSA at sa provincial bus ban dry run na pinigil ng korte.

Sa kanyang opening statement, ipinunto ni Poe ang mga nais nyang maresolba sa pagdinig.

Jojo Garcia has been quoted a saying ‘yung provincial bus napakaliit ng percentage, na ‘yan ang cause of traffic, siguro nasa 5% lang ‘yan ng total traffic. Third, and this is the most important, encouraging private vehicles has never been a good transport policy. Ang bus ay kayang magsakay ng 15 pasahero, ang kotse, limang pasahero, at ang jeep, 12 pasahero. Ang pagbabawal sa higit na 3,000 provincial buses ay magreresulta sa higit na 15,000 additional na kotse na dadaan sa EDSA,” ani Poe.

Nais na paimbestigahan sa senado ni Senate President Pro Tempore Ralph Recto ang report ng United Nations (UN) na ang Pilipinas ang siyang mayroong pinakamataas na insidente ng mga pekeng gamot sa Southeast Asia.

Sa inihaing resolusyon ni Recto, binigyang diin ng senador na naturang report ng UN ay posibleng magdulot ng alarma at mga pagkilos.

Layon ng magiging pagdinig na alamin ang laki ng problema at makapaglatag ng alituntunin para mas mapatatag pa ang kapasidad ng Food and Drug Administration (FDA) at iba pang concerned government agencies para masolusyonan ang naturang problema.

Sa ulat ng UN, naitala sa Pilipinas ang pinakamalaking pharmaceuticals crime incident sa southeast Asia mula 2013 hanggang 2017.

Sa naitalang 460 na kaso ng pamemeke ng gamot sa rehiyon, 193 dito sa Pilipinas, 110 sa Thailand, 93 sa Indonesia at 49 sa Vietnam.

Karamihan sa mga nakukuhang falsified na mga gamot ay para anti-tuberculosis, paracetamol at anti-rabies vaccines.

Hindi patitinag si Pangulong Rodrigo Duterte sa naging paggiit ng China na hindi nito kikilalanin ang pag pabor ng Permanent Court of Arbitration sa Pilipinas sa usapin sa West Philippine Sea.

Ayon kay Presidential Spokesman Salvador Panelo, desidido ang pangulo na igiit ang naging ruling sa magiging pagbisita niya sa China ngayong buwan.

Aniya, kung talagang totoo ang pagkakaibigan ng dalawang partido ay walang masamang pag usapan ang agawan ng teritoryo.

Una nang sinabi ni Chinese Ambassador Zhao Jianhua na hindi kinikilala ng China ang naging ruling ng international court at duda silang bubuksan ng pangulo ang naturang usapin.

Walang nakikitang dahilan ang Metropolitan Manila Development Authority o MMDA para itigil ang pagpapatupad ng yellow lane policy sa EDSA sa kabila ng mga natatanggap nitong pagbatikos mula sa publiko.

Sinabi ni MMDA Traffic Chief Bong Nebrija, kailangan lamang na makiisa ang lahat upang magtagumpay ang layunin ng polisiyang ito na maibsan ang matinding trapik sa EDSA.

Kaunting panahon pa aniya ang kanilang hinihiling dahil tiyak aniyang makakapag-adjust din ang lahat at makikita ang resulta ng implementasyon ng yellow lane para sa mga city buses.

Matatandaang, inulan ng batikos ang polisiyang ito ng MMDA dahil sa pagiging anti-poor nito lalo na’t ang labis na naaapektuhan at nahihirapan dito ay ang mga ordinaryong mananakay ng mga pampublikong sasakyan.

Suportado ng Malacañang ang paghahain ng panibagong diplomatic protest sa China ng Pilipinas.

Ayon kay Presidential Spokesman Salvador Panelo, dapat ay humingi muna ng permiso ang China sa gobyerno kung maaaring dumaan ang kanilang Chinese warships sa Sibutu Strait na bahagi ng exclusive economic zone (EEZ) ng Pilipinas.

Ito aniya ay malina na paglabag sa United Nations Convention on the Law of the Sea (UNCLOS).

Gayunman, hindi naman inalis ni Panelo ang posibilidad aniya na maaaring hindi alam ng Chinese government ang naturang aksyon ng kanilang Chinese warships.

Dahil dito mas mabuti aniyang hintayin na lamang ang magiging tugon ng gobyerno ng China.

Una rito, kinumpirma ng Department of National Defense na apat na beses namataan ang paglalayag ng Chinese warships sa naturang teritoryo simula pa Pebrero hanggang Hulyo.

Kinumpirma ng isang estudyante na sumapi na sya sa Anakbayan.

Sa kanyang Facebook post, itinanggi ng anak ni Relissa Lucena, isa sa mga humarap sa senate hearing na sya ay nawawala.

Ayon estudyante, sa akbayan nya nahanap ang kanyang sarili bilang bahagi ng isang lipunan.

Nakikita rin anya nya ang kanyang sarili sa bawat masa na hindi pinapakinggan ng pamahalaan kaya’t hindi nya kayang manahimik na lamang sa panahon ng ligalig ng masa.

Una nang humarap sa komite ni Senador Ronaldo Dela Rosa ang mga ina ng mga estudyanteng nirecruit di umano ng Akbayan.

Malabo nang makatugon sa epidemya ng dengue ang dengvaxia vaccine kung ngayon ito ilalabas sa merkado.

Ayon kay Dr. Edsel Maurice Salvana, director ng Institute of Molecular Biology and Biotechnology ng National Institute of Health, maaaring nakatulong ang dengvaxia kung inilabas ito, ilang buwan bago nagkaroon ng epidemya.

Sinabi ni Salvana na ang dengvaxia ay pantugon sa epidemya dahil kailangang makatatlong bakuna bago ito maging epektibo.

Ipinaliwanag ni Salvana na magiging malaking tulong ang dengvaxia upang maiwasan na ang epidemya ng dengue sa hinaharap.

Napatunayan na anya na epektibo ang dengvaxia kung ibibigay ito sa mga dati nang nagkaroon ng dengue o sa mga taong hindi nakakumpleto sa tatlong doses ng dengvaxia.

Tinitignan ng Bureau of Fisheries and Aquatic Resources (BFAR) ang paggamit sa isang uri ng isda na kumakain ng mosquito larvae o kiti-kiti laban sa tumataas na bilang ng kaso ng dengue.

Ayon kay BFAR Dagupan Director Westley Rosario, naghahanap siya ng mga isdang maaaring magamit panlaban sa dengue tulad ng mosquito fish.

Aniya, panahon ng World War 2 nang dalhin at ipakilala ng Amerika sa Pilipinas ang mosquito fish para labanan ang malaria.

Dagdag ni Rosario, nabubuhay kahit sa maduduming tubig tulad ng kanal ang mosquito fish.

Wala din aniyang mga pag-aaral na nagsasabing nakasasama sa tao o sa ibang hayop ang nasabing isda.

Samantala, nakatakdang magpalabas ang Department of Science and Technology (DOST) ng capsule herbal supplement na gawa sa halamang ‘tawa-tawa’ na makatutulong makapagpataas ng platelets ng mga may sakit na dengue.

Ayon kay DOST Secretary Fortunato Dela Peña, kanilang ipalalabas ang nabanggit na herbal supplement sa Agosto 15.

Gawa aniya ito ng isang pribadong kumpanya sa tulong ng pamahalaan.

Dagdag ni Dela Peña, aprubado na rin ito ng Food and Drug Adminsitration (FDA) bilang food supplement.