HOT STORIES OF THE WEEK

Puspusan na ang paghahanda ni Pangulong Rodrigo Duterte upang igiit sa China ang panalo ng Pilipinas sa Permanent Court of Arbitration hinggil sa nine dash claim ng China sa South China Sea.

Ayon kay Senador Bong Go, tuloy na tuloy ang biyahe ng pangulo sa China sa August 28 sa kabila ng pagod dahil sa sobrang dami ng kanyang trabaho.

Ibinunyag ni Go na marami ang bumubulong sa pangulo na huwag nang isulong sa meeting nila ni Chinese President Xi Jinping ang karapatan ng Pilipinas sa South China Sea subalit hindi ito magpapapigil base na rin sa pagkakilala niya sa pangulo.

Una nang sinabi ni Go na hindi nakadalo sa paggunita sa National Heroes Day ang pangulo dahil madaling araw na itong natulog dahil sa dami ng pinirmahang dokumento at iba pang trabaho.

(with report from Cely Ortega- Bueno)

Tuluyan nang isinara ng Department of Justice ang pinto para sa posibleng paglaya ni dating Calauan mayor Antonio Sanchez sa pamamagitan ng GCTA o Good Conduct Time Allowance.

Ayon kay Justice Undersecretary Markk Perete, spokesman ng DOJ, malinaw sa batas na hindi nito sakop ang mga bilanggo na sentensyado sa henious crime.

Malinaw anya na hindi kasama si Sanchez dahil sentensyado ito ng pitong life sentence dahil sa karumal dumal na panggagahasa at pagpatay kay Eileen Sarmenta at pagpatay sa kasama nitong si Allan Gomez.

Sinabi ni Perete na dahil din sa probisyong ito ay posibleng mabawasan ang 11,000 bilanggo na unang napaulat na posibleng makalaya sa pamamagitan ng GCTA.

“Once na narrow down yung mga prisoners na yun, iisa isahin na yun kung una, nag a apply ba sa kanila yung exclusion, pangalawa, kung nadisatisfy nila yung mga conditions for eligibility to the law based on each case kasi titingnan nila yung record kung ano ba yung kasong kanilang kinakaharap, nagkaroon ba sila ng mga violations, then atsaka lang masasabi na possible beneficiary ito.”— Pahayag ni DOJ Spokesman Usec. Markk Perete.

(Balitang Todong Lakas interview)

Nangangamba ang Department of Agriculture (DA) na magresulta sa African Swine Fever (ASF) scare ang mga report hinggil sa pagkakasakit ng mga baboy sa ilang piggery sa Luzon.

Ayon kay Noel Reyes, spokesman ng DA, aabot sa P270-B na halaga ng livestock industry ang nakataya dahil sa pangamba sa ASF.

Maliban anya sa mga hog raisers, marami pang negosyante at manggagawa ang umaasa sa livestock industry.

Ito anya ang dahilan kayat maingat sila sa paghawak sa sitwasyon upang hindi lumikha ng panic sa publiko.

Sinabi ni Reyes na ito rin ang dahilan kaya’t hindi nila isinasapubliko ang resulta ng local laboratory test hanggat wala pa ang confirmatory test sa isang international laboratory na accredited ng World Organization for Animal Health.

Hinikayat ng Department of Health (DOH) ang publiko na laging magtabi ng prophylaxis lalo na sa panahon ng tag-ulan para labanan ang leptospirosis.

Inilabas ni Health Undersecretary Eric Domingo ang paalala sa harap ng patuloy na pagdami ng kaso ng leptospirosis sa bansa.

Ayon kay Domingo, kelangan lamang uminom ng prophylaxis sa loob ng 24-48 oras matapos na malublob sa baha.

Binigyang diin ni Domingo na bagamat nakamamatay ang leptospirosis, ito naman ay pwedeng agapan.

Ikinalungkot ng grupong Alyansa Tigil Mina ang pagkamatay ni dating environment secretary Gina Lopez.

Ito ay ayon kay JB Garganera, national coordinator ng naturang grupo.

Aniya, isang malaking kawalan ang pagkamatay ng dating kalihim at kilalang environmentalist dahil ito ang naging simbolo ng pagkakaisa ng mga nangangalaga sa kalikasan.

“Siya po yung sumisimbolo ng pagkakaisa ng mga gustong mangalaga sa kalikasan. Naging boses siya ng iba’t ibang environmental group”.

Dagdag pa ni Garganera, napakapositibong tao pa rin ni Lopez sa kabila ng kanyang karamdaman.

Itinuro daw sa kanila ni Lopez ang pagiging inspirasyon dahil sila ay nasa tama at kung paano mamuhay nang hindi nakasisira sa kalikasan.

“Nakikita niya yung mga kailangan, yung mga magandang gawin, yung mga mabubuti na dapat i-share sa iba. Ang lagi po niyang sinasabi sa amin ay ipagpatuloy po dahil tama yung ating ginagawa.”— Pahayag ni Alyansa TigilMmuna National Coordinator JB Garganera.

(Ratsada Balita interview)

“Tuloy ang laban.”

Ito ang sigaw ng mga environmentalist matapos ang pagpanaw ni dating environment secretary Gina Lopez.

Ayon kay Alyansa Tigil Mina National Coordinator JB Garganera, kahit na yumao na ang tumayong simbolo ng pagkakaisa ng mga nangangalaga sa kalikasan ay tuloy pa rin ang kanilang pakikibaka.

Dagdag pa nito, kahit na wala na sa Department of Environment and Natural Resources o DENR si Lopez ay tinutuloy pa rin ng ahensya ang ilang mga proyekto nito.

Pumanaw na si dating environment secretary Gina Lopez sa edad na 65.

Tinukoy ng pamilya na binawian ng buhay si Lopez matapos ang kanyang pakikipaglaban sa sakit na brain cancer.

Si Lopez ay masugid na tagapagtanggol ng kalikasan at karapatan ng mga bata.

Kabilang sa mga itinaguyod ni Lopez ang rehabilitasyon ng Pasig River, La Mesa Watershed at ang pagpapasara ng ilang abusadong mining companies.

“Kasuhan, ikulong… nang ibalik ang takot sa puso at sa isipan ng mga korap sa PhilHealth.”

Iyan ang binigyang-diin ni Atty. Harry Roque, isa sa mga tagapag-sulong ng Universal Health Care, laban sa mga umano’y korap na opisyal ng PhilHealth.

Siya na mismo, ani Roque, ang kikilos at magsasampa ng kaso laban sa mga korap na opisyal partikular na ang dating pangulo ng PhilHealth na si Roy Ferrer at mga miyembro ng kanyang board.

Ito ang ibinunyag ni Roque sa panayam ng DWIZ at hindi na aniya niya hihintayin pa ang hakbang ng senado.

Taong 2015 aniya nang nagsagawa ng imbestigasyon ang senado hinggil sa naturang isyu kung saan nasiwalat na ang lahat ng kababalaghan sa PhilHealth ngunit wala pa rin aniyang nangyayaring pagtuligsa para matuldukan ang anomalya sa ahensya.

Ako na po ang magsasampa, hindi ko na po iintayin ang senado, kasi alam niyo wala namang nangyayari d’yan,” ani Roque.

Kasong malversation aniya ang kanyang isasampa laban sa mga ito na maaari pang umabot sa plunder kung aabot sa halagang limampung bilyong piso ang halaga ng nakurakot na pondo.

Paglilinaw pa ni Roque, isa itong uri ng korupsiyon at hindi basta lamang estafa.

Malversation po ‘yan at titignan natin kung aabot hanggang P50-B para maging plunder,” ani Rique.

Usapang Senado Interview

Panibagong solusyon na naman ang naisip ng Metropolitan Manila Development Authority (MMDA) para tugunan ang mabigat na daloy ng trapiko sa EDSA.

Ayon kay MMDA General Manager Jojo Garcia, plano nilang maglagay ng steel fences at rubber bollards para mabakuran ang ilang lane sa EDSA.

Alinsunod na rin aniya ito sa ipinatutupad nilang yellow lane policy para sa mga city bus sa kalsada.

Paliwanag pa ni Garcia, ang naturang mga harang ay para magabayan ang mga commuter sa tamang babaan at sakayan.

Muli ring iginiit ni Garcia na hindi ito isang parusa sa mga commuter kundi layon lamang nitong isaayos ang trapiko sa EDSA.

Inaasahang sisimulan ang paglalagay ng mga bakod sa susunod na linggo.

Kinumpirma mismo ng apat (4) na dating rebelde sa mga senador na totoong nangyayari ang pagrerecruit sa mga estudyante mula sa iba’t ibang paaralan para umanib sa mga komunistang grupo.

Ito’y sa isinagawang pagdinig ng Senate Committee on Public Order and Dangerous Drugs hinggil sa mga umano’y nawawalang menor de edad na nirecruit para sumali sa mga makakaliwang grupo.

Isa sa apat na tumestigo ay ang 21 taong gulang na si ‘Allem’ kung saan isiniwalat nito na 16 taong gulang pa lamang siya at noo’y nag-aaral sa Polytechnic University of the Philippines nang siya ay irecruit ng League of Filipino Students noong taong 2014.

Nakumbinsi aniya siya na sumali sa nabanggit na grupo nang ipaliwanag sa kanya ang usapin kaugnay sa kontraktuwalisasyon dahil isang contractual employee noon ang kanyang ina.

Dagdag pa ni Allem, tatlong taon siyang naging aktibista bago siya nagdesisyon na umanib sa New People’s Army (NPA), ang itinuturing na ‘armed wing’ ng Communist Party of the Philippines (CPP).

Nagdesisyon aniya siya na umalis na sa grupo noong April 2018 kasama ang kasamahan niyang miyembro na kanyang naging asawa.

Nagkaroon aniya siya ng pamilya at mga anak at sinubukang lumapit at manghingi ng ayuda mula sa komunistang grupo nang magkasakit ang kanyang mga anak ngunit nabigo sya na makakuha ng tulong.

Ang naturang pangyayari naman ang nag-udyok kay Allem at kanyang pamilya na sumuko na sa mga militar.

Kalaunan, hinimok naman ni Allem ang kanyang mga kasamahan na pahintulutan na ang mga di umano’y nawawalang mga estudyante na makabalik sa kanilang mga pamilya.

Umarangkada na ang pagdinig ng senado kaugnay sa traffic plan ng MMDA para masolusyonan ang matinding trapiko sa EDSA.

Kasabay nito, kaliwa’t kanang mungkahi rin ang ibinato ng mga dumalo sa naturang pagdinig.

Kabilang na rito sina Senate President Vicente Sotto III at Senador Sherwin Gathcalian na kapwa sumang-ayon na ilipat ang mga tanggapan ng gobyerno sa mga probinsya upang matugunan ang problema sa masikip na daloy ng trapiko partikular na sa EDSA.

Iminungkahi ni Sotto ang posibilidad na paglipat ng Malacañang sa Clark sa Pampanga, pati na halimbawa ang Department of Environment and Natural Resourcess sa Zambales at Department of Public Works and Highways sa Bulacan upang mapigilan ang publiko na magkumpulan sa Metro Manila.

Another way to do perhaps or different kind of perspective as far as the grand transportation plan is concerned is to decongest Metro Manila itself by transferring all the government departments, offices out of Metro Manila,” ani Sotto.

Bagay naman na sinang-ayunan ni Gatchalian at sinabing naghain na ito ng panukala kaugnay dito.

Sa ilalim ng Senate Bill No. 876, hangad ni Gatchalian na mailipat ang national government sa New Clark City sa Tarlac sa taong 2030.

I filed this bill, ilipat ang seat of government sa Clark to decongest Metro Manila. Kapag nilipat do’n ang seat of government, pati infrastructure sasabay d’yan, train, airport, intermodal transportation,” ani Gatchalian.

Samantala, binigyang-diin pa ni Sotto na ‘band-aid solution’ o pansamantalang solusyon lamang ang provincial bus ban sa EDSA at hindi nito tuluyang masosolusyonan ang problema sa trapiko.