Idineklara na ng DOH o Department of Health ang national dengue epidemic.
Kasunod na rin ito ng pagtaas ng kaso ng dengue sa buong bansa.
Ayon kay Health Secretary Francisco Duque III, nasa 622 na ang nasawi dahil sa dengue.
Nabatid na nasa halos 150,000 kaso ng dengue ang naitala mula January hanggang July 20 o 98 porsyentong mas mataas sa parehong panahon noong 2018.
(with report from Jaymark Dagala)
Nakatakdang talakayin ni Pangulong Rodrigo Duterte kay Chinese President Xi Jinping ngayong buwan ang naipanalong arbitual ruling ng Pilipinas sa claim nito sa West Philippine Sea.
Ito mismo ang kinumpirma ni Presidential Spokesman Salvador Panelo sa isang press briefing sa Malacañang ngayong araw.
Ayon pa kay Panelo, kabilang sa uungkatin ng pangulo ang ‘Recto Bank incident’ na nangyari noong Hunyo 9.
Samantala, magugunitang naghain ng diplomatic protest ang Pilipinas sa China at sinasabing kailangang magpataw ng sanction laban sa mga Chinese crew na umano’y nag-abandona sa mahigit 20 mangingisdang Pilipino sa bahagi Recto Bank.
with report from Jopel Pelenio
Tuloy ang ikinasang dry run ng Metropolitan Manila Development Authority (MMDA) para sa provincial bus ban sa EDSA bukas, Agosto 7.
Dry Run para sa Provincial Bus Ban, tuloy ayon sa MMDA
| via @jaymarkdagala pic.twitter.com/5GRpfoqZyW— DWIZ Newscenter (@dwiz882) August 6, 2019
Ito ang kinumpirma ni MMDA Spokesperson Asec. Celine Pialago sa dahilang wala pa naman silang natatanggap na kopya ng Writ of Preliminary Injunction na inilabas ng Quezon City Regional Trial Court Branch 223 na nagpapatigil sa bagong traffic scheme.
Una rito, sinabi ni Pialago na susunod sila sa naging kautusan ng Korte bagama’t ang unang anunsyo ay ipinauubaya na nila muna sa mga kumpaniya ng bus kung nais nilang subukan ang bagong skema ng trapiko.
Sa ilalim ng pagbabawal sa mga provincial bus sa EDSA, hihimpil ang mga ito sa mga itinalagang terminal sa Valenzuela City at Sta. Rosa sa Laguna na papasok at lalabas ng Metro Manila.
Ibig sabihin, hindi papapasukin ang mga provincial bus sa EDSA lalo na ang mga mayroong terminal sa kahabaan nito para magsakay at magbaba ng mga pasahero.
Bumagal pa ang pagtaas ng presyo ng mga pangunahing bilihin sa bansa nitong Hulyo.
The country’s headline inflation further eased to 2.4 percent in July 2019. This was the lowest inflation recorded since January 2017, and it was the same rate observed in July 2017. #PHCPI #Inflation
— @PSAgovph (@PSAgovph) August 6, 2019
Batay sa datos na inilabas ng Philippine Statistics Authority (PSA), pumalo lamang sa 2.4% ang inflation rate nitong Hulyo, mas mababa sa 2.7% na naitala noong Hunyo.
Samantala, ito naman ang pinakamababang inflation rate na naitala ng PSA mula noong buwan ng Enero, taong 2017.
Nabunyag ang umano’y tangkang pag-atake ng teroristang grupo na Isis sa Northern Luzon.
Ito ay matapos na mag-leak ang isang memorandum mula sa tanggapan ng Northern Luzon Command (NOLCOM) hinggil sa umano’y intelligence report.
Kinumpirma naman ni NOLCOM Spokesman Maj. Ericson Bolusan na sa tanggapan nga nila galing ang nasabing kalatas na kanila aniyang pinagtataka kung paano ito kumalat gayung isa itong “confidential file”.
Sinabi ni Bolusan na nakatanggap sila ng impormasyon hinggil sa umanoy tangkang pag-atakae ng teroristang grupo na Isis sa ilang lugar sa kanilang nasasakupan partikular na sa mga matataong lugar tulad ng simbahan at mosque na bahagi umano ng kanilang krusada.
with report from Jaymark Dagala
Isinulong ng ACT-CIS Partylist group ang pagtatakda ng minimum na sweldo para sa mga manggagawa sa media, base na rin sa karanasan ng mga ito.
Nakasaad sa House Bill 2476 ang pagkakaroon ng comprehensive benefits package para sa media workers sa Pilipinas.
Batay sa panukala ng ACT-CIS, ang minimum na sweldo ng media worker ay mula P20,000 para sa unang taon ng video editor hanggang sa P60,000 para sa mga field reporter, video editor at director na sampung (10) taon na sa kanilang trabaho.
Binigyang diin ng mga kinatawan ng ACT-CIS group na dapat kilalanin ang hindi matatawarang kontribusyon ng media workers sa pamamagitan ng pagtataas ng sweldo ng mga ito at dagdag proteksyon sa ilalim ng batas.
Nakasaad din sa panukala ang Security of Tenure na dapat ibigay sa mga nasa media industry gayundin ang insurance benefits.
Bahagi rin ng panukala ang pagbibigay sa media workers ng cash incentives, scholarship grants, exchange programs at awards.
Papangalanan ni Pangulong Rodrigo Duterte ang mga nasa likod ng umano’y kurapsyon sa Philippine Charity Sweepstakes Office (PCSO) sa mga susunod na araw.
Ito ang tiniyak ng Malakanyang kasunod na rin ng utos ng pangulo na isuspinde ang operasyon ng lahat ng gaming scheme na nasa ilalim ng PCSO.
Ayon kay Presidential Spokesperson Salvador Panelo, tiniyak ni Pangulong Duterte na ilalabas ang pangalan ng mga umano’y tiwali sa PCSO at pagpapanagutin ang mga ito.
Kinumpirma din ni Panelo ang kautusan ng pangulo na agad ipasara ang lahat ng outlet ng lotto, small town lottery, peryahan ng bayan at iba pang gaming scheme sa buong bansa.
Iginiit ni Panelo, nagkaroon ng sabwatan ang mga major players at mga enforcers para dayain ang pamahalaan sa dapat na nakukuhang kita nito sa mga larong pinatatakbo ng PCSO.
Muling isinulong ni Pangulong Rodrigo Duterte sa kanyang SONA o State of the Nation Address ang muling pagpapataw ng parusang kamatayan o death penalty sa mga heinous crimes.
Partikular na tinukoy ng pangulo ang mga kasong may kinalaman sa iligal na droga at pandarambong o plunder.
Ayon kay Pangulong Duterte, tone-toneladang shabu na nagkakahalaga ng milyon-milyong piso ang natagpuan ng mga otoridad sa kasagsagan ng limang buwang Marawi siege.
Aniya, nasa 150 mga pulis at sundalo ang nasawi habang mahigit 2,000 ang sugatan dahil sa drug money na ginamit ng mga terorista sa pagkubkob sa Marawi City.
Binanggit din nito ang mga natagpuang palutang-lutang na mga bloke ng cocaine sa karagatan ng Pilipinas.
Samantala, binigyang diin ni Pangulong Rodrigo Duterte na hindi tuluyang masusugpo ang iligal na droga sa bansa kung hindi rin malilinis ang pamahalaan mula sa kurapsyon.
“The drugs will not be crossed unless we continue to eliminate corruption that allows the social monsters to survive. I reinstate death penalty for heinous crimes related to drugs as well as plunder.” — Bahagi ng SONA ni Pangulong Rodrigo Duterte
Posibleng magdeklara ng martial law ang Pangulong Rodrigo Duterte sakaling makaabot ng Metro Manila ang terorismo.
Ito, ayon kay Presidential Spokesman Salvador Panelo, ay dahil labis na nabahala ang Pangulong Duterte sa nangyaring suicide bombing sa Indanan, Sulu na ikinasawi ng walo (8) katao.
Gayunman, hindi tinukoy ni Panelo kung sa buong bansa ipatutupad ang batas militar na sa ngayon ay umiiral sa Mindanao region matapos ang pag-atake ng ISIS-inspired Maute group sa Marawi City noong 2017.
Sinabi ni Panelo na nagbanta na noon ang pangulo na huwag siyang sasagarin dahil kapag napuno siya ay gagamitin niya ang lahat ng kaniyang kapangyarihang ipinagkaloob sa kaniya ng konstitusyon.
Isa rin aniya sa mga option ng pangulo ang pagdeklara ng revolutionary government o paggamit ng emergency powers para labanan ang anumang tangkang pagpapabagsak sa bansa.
Binigyang diin pa ni Panelo na obligado ang AFP na protektahan ang taumbayan kapag mayroong banta sa seguridad ng bansa.
Pinabulaanan ng Communist Party of the Philippines (CPP) ang alegasyong nag-uugnay sa kanilang grupo sa pag-iimbestiga ng United Nations Human Rights Council (UNHRC) sa kampanya kontra iligal na droga ng Administrasyong Duterte.
Ito ay matapos sabihin ni PNP Chief Police General Oscar Albayalde na ang CPP ang posibleng nasa likod ng paghahain ng resolusyon sa UNHRC para imbestigahan ang mga kaso ng pagpatay sa ilalim ng war on drugs.
Ayon sa CPP, labis na nakakatawa ang naging pahayag ni Albayalde.
Patunay lamang anila ito sa pagiging desperado ng anila’y mga “minion” ni Pangulong Rodrigo Duterte para lamang maitago ang katotohanan.
Dagdag ng CPP, ginagawa na ng pamahalaan ang lahat ng mga hangal na hakbang tulad ng pag-iimbento ng mga sitwasyon at maging pag-uugnay sa UNHRC sa mga rebeldeng komunista.