HOT STORIES OF THE WEEK

Nasa tanggapan na ni Pangulong Rodrigo Duterte ang shortlist ng mga kandidato na maaaring pagpilian para maging susunod na hepe ng Philippine National Police.

Ito ay bilang kapalit naman ng nagbitiw na si Police General Oscar Albayalde.

Ayon kay Interior and Local Government Secretary Eduardo Año, tatlong pangalan ang kabilang sa kanyang isinumiteng rekomendasyon kay Pangulong Duterte.

Ito aniya ay sina PNP OIC Lieutenant General Archie Gamboa, Deputy Chief for Operations Lieutenant General Camilo Cascolan at Chief ng Directorial Staff, Major General Guillermo Eleazar.

Nilinaw naman ni Año na nasa pagpapasiya pa rin ng pangulo kung susundin ang kanyang isinumiteng shorlist o pipili ito ng iba pang pangalan na wala sa listahan.

Kapwa kaklase ni Albayalde sina Gamboa at Cascolan sa PMA Sinagtala Class of 1986 at nakatakdang maretiro sa September 2020 at November 2020.

Habang si Eleazar ay mula sa PMA Hinirang Class of 1987 na magreretiro naman sa November ng 2021. — ulat mula kay Jaymark Dagala (Patrol 9)

Sapat na ang anim na buwan para makita ang kakayahan ng isang empleyado para tuluyan itong maregular sa isang trabaho.

Binigyang diin ito ni Labor Secretary Silvestre Bello III bilang tugon sa panukala ni Probinsyano Ako party-list Representative Jose Bonito Singson, Jr. na gawing dalawang taon mula sa anim na buwan ang probationary period.

Sinabi sa DWIZ ni Bello na sa anim na buwan ay makikita na ang pag-uugali sa trabaho ng isang empleyado at ito ang pagbabasehan kung tuluyan itong tatanggapin sa kumpanya bilang regular employee.

Malalaman nila kung ano ang working habits mo, ano’ng competence mo at higit sa lahat ‘yung integrity mo, so, I think 6 months would be enough. In fact, during the period, you are under assessment na, tinitignan ang performance mo and on the basis of your performance, they will decide to continue hiring you and make you a regular employee,” ani Bello.

Ayon kay Bello, nirerespeto nila ang panukala ni Singson subalit masyadong mahaba ang dalawang taon na maaaring maabuso ng mga pasaway na employer.

Masyadong mahaba na itong 2 years, kasi ‘yung masamang patakaran ng ibang pasaway na employer na para hindi ka maging regular ang ginagawa nila bago mo abutin ‘yung 6 months, e, iteterminate ka, pero after interval of 1 or 2 months ire-rehire ka na naman,” ani Bello. — sa panayam ng Ratsada Balita

Mismong si Presidential Security Group (PSG) Commander Gen. Jose Ariel Niembra na ang nagkumpirma na sumemplang habang nagmomotorsiklo si Pangulong Rodrigo Duterte nitong Miyerkules ng gabi.

Ayon kay Niembra, hindi nahulog ang Pangulong Duterte sa kanyang motorsiklo at hindi rin ito bumagsak.

Sumabit aniya sa obstruction ang isang gulong ng isang 3-wheeled motorcycle na gamit ng pangulo habang palabas ng garahe.

Hindi rin aniya mabilis ang patakbo ng pangulo dahil papalabas pa lamang siya.

Samantala, una nang kinumpirma ni Senador Bong Go ang naturang insidente na ipinag-alala ng senador.

Nagbabala ang PHILVOLCS na posibleng magkaroon ng landslides sa mga ‘dalisdis o bulubunduking lugar sa mga tinamaan ng 6.3 magnitude ng lindol sa North Cotabato.

Ayon kay Undersecretary Renato Solidum, direktor ng PHIVOLCS, karaniwang nakapagpapabagsak na ng gusali na hindi nakasunod sa building code ang nasa VI hanggang VII na intensity ng lindol.

Maaari din anyang magkaroon ng landslides o bitak sa mga dalisdis na delikado kapag biglang umulan o magkaroon ng aftershock.

Doon sa may Intensity VII at VI, pwede na rin pong magkaroon ng mga landslide sa mga matarik na lugar,” ani Solidum.

Hinikayat ni Solidum ang mga Local Government Units na agarin ang inspeksyon sa matataas na bahagi ng kanilang bayan o siyudad.

Sa may Intensity VI to Intensity VII na reports ay may mga damages ang mga building, ‘yung ibang building may mga wall na nagcollapse, ‘yun po ‘yung kailangang tignan ng ating local government units — na mag-inspeksiyon ng mga bahay, gusali,” ani Solidum.

Kasabay nito, nagbigay ng mga puntos si Solidum hinggil sa pagtama ng tsunami sa isang lugar.

Ayon kay Solidum, mahalagang alam ng taumbayan ang mga palatandaan na may darating na tsunami upang maiwasan ang panic.

Unang-una hindi po pwedeng magka-tsunami nasa lupa ang episentro at pangalawa, ‘yung magnitude hindi masyadong malaki; at kung talagang magkakatsunami ay dapat within 30 minutes after the earthquake ay mayroon nang alon,” ani Solidum. — sa panayam ng Ratsada Balita

Ibinalik ng kampo ni Vice President Leni Robredo sa kampo ni dating senador Bongbong Marcos ang sisi sa natatagalang pagresolba sa election protest.

Ayon kay Atty. Romulo Macalintal, abogado ni Robredo, matapos ang recount sa tatlong pilot areas na napili ni Marcos, may tatlo pa uling areas ang nais nitong isalang sa muling pagbibilang.

Sinabi ni Macalintal na kahit na matapos pa ang election protest ni Marcos, kailangan pa ring resolbahin ng Presidential Electoral Tribunal (PET) ang election protest na inihain naman nila laban kay Marcos.

Hindi kami ang nagde-delay, kundi sila ang humihingi ng additional matapos na hindi makapagpatunay do’n sa tatlo, nagtataka ako kung bakit —’yung tatlo kasi ang pinili tapos sasabihing ‘hindi pala ‘yun ang aking kailangan, kailangan ko pala ito; Basilan, dito pala ako’, e, sabi namin, bakit hindi mo pinili ‘yan noong una, ngayon ka lang maghahabol?” ani Macalintal. — sa panayam ng Balitang Todong Lakas

Nananatiling pinakamayamang Senador si Sen. Cynthia Villar batay sa isinumite nitong 2019 Statement of Assets, Liabilities and Net worth (SALN).

Base sa record, umabot sa P3.53B ang net worth ni Villar na kilala rin sa Real Estate business.

Gayunman bumababa ang yaman ng Senadora kumpara sa net worth nito nuong nakaraang taon na P3.72B.

Pumangalawa naman sa pinakamayang Senador si Sen. Manny Pacquiao na mayroong net worth na P3B.

Pangatlong pinakamayaman naman si Sen. Ralph Recto na may yamang P555M na sinundan ni Sen. Juan Miguelz Zubiri na may net worth na P182M.

Samantala, itinuturing naman na pangalawa sa pinakamahirap na Senador si Sen. Bong Go na mayroong P15.50M.

Magugunitang si Go ang may pinakamalaking ginastos nuong kampanya para sa 2019 midterm elections na umabot sa P161M.

Nagpasya na ang Korte Suprema bilang Presidential Electoral Tribunal (PET) na ilabas ang committee report  hinggil sa resulta ng recount sa electoral protest ni dating senador Bongbong Marcos laban kay Vice President Leni Robredo.

Ayon kay Supreme Court Spokesman Brian Keith Hosaka, nakasaad sa resolusyon ng PET na bigyan ng kopya ng committee report ang kampo ni Marcos at kampo ni Robredo.

Inatasan din ng PET sina Marcos at Robredo na magsumite ng kanilang komento  sa committee report sa loob ng 20-araw.

Ang recount ay isinagawa sa Negros Oriental, Iloilo at Camarines Sur na pinili mismo ni Marcos.

Matatandaan na Setyembre pa umano natapos ni Associate Justice Alfredo Benjamin Caguioa ang committee report na nagdedetalye sa official tally ng recount at kapwa sinasabi ng magkabilang panig na nalamangan nila ang isa’t isa.

Samantala, inatasan rin ng Korte Suprema ang magkabilang kampo na maghain ng memoranda sa loob ng 20-araw hinggil sa mosyon ni Marcos na ipawalang-bisa ang resulta ng eleksyon sa pagkabise presidente sa Lanao Del Sur, Basilan at Maguindanao.

Nilinaw ni Hosaka na walang inilabas na desisyon ang PET sa electoral protest ni Marcos laban kay Robredo.

The fact is there is a resolution ordering the release of the results of the recount and revision of ballots in the parties,” ani Hosaka. — ulat ni Bert Mozo (Patrol 3)

Iginiit ni Interior and Local Government Secretary Eduardo Año na walang pumilit kay dating PNP chief General Oscar Albayalde na magbitiw sa kanyang puwesto.

Ayon kay Año, sinabi sa kanya ng Pangulong Rodrigo Duterte na nananatili ang tiwala nya kay Albayalde dahil wala syang masabing masama sa naging panunungkulan nito bilang PNP chief.

Ipinaliwanag ni Año na noong Miyerkoles pa ng nakaraang linggo ay sinabi na sa kanya ni Albayalde na pinag-iisipan na nitong bumaba bilang PNP chief kasunod ng mga alegasyong nag-uugnay sa kanya sa ‘ninja cops’.

Gayunman, pinayuhan anya nya si Albayalde na pag-isipang mabuti at nitong Sabado nga ay tuluyan na itong nagsumite ng kanyang letter of resignation bilang hepe ng PNP.

Una rito, sinabi ni Senador Bong Go na inatasan ng Pangulong Duterte si Albayalde na magterminal leave na dahil paparetiro naman na ito sa Nobyembre 8.

Binakante na ni Philippine National Police (PNP) Chief Police General Oscar Albayalde ang kanyang tanggapan kasunod ng kanyang kinahaharap na kontrobersya kaugnay sa ‘ninja cops’ issue.

BREAKING: PNP Chief Oscar Albayalde, babakantehin na ang kanyang tanggapan; nasa ‘non-duty’ status na.

Una nang sinabi ni PNP spokesperson Bernard Banac sa DWIZ na ang ang ‘non-duty’ status ay nangangahulugan na ang isang kagawad ng PNP ay naghahanda na ng kanyang retirement. pic.twitter.com/2yrF936SXA

— DWIZ Newscenter (@dwiz882) October 13, 2019

Sa kanyang talumpati sa flag ceremony sa Camp Crame, inanunsyo ni Albayalde ang paghahain niya ng ‘non-duty’ status bilang hepe ng PNP, epektibo ngayong Lunes.

Ayon kay Albayalde, pinag-isipan nya ang hakbang na ito at ikinonsulta rin kay DILG Secretary Eduardo Año.

Bilang panghuling utos at tagubilin anya sa mga pulis, ipagpatuloy ang pagsisilbi sa mga kababayang Pilipino upang makapamuhay ang lahat ng mapayapa.

Iginiit rin ni Albayalde na hindi sya kailanman nasampahan ng kaso kaugnay ng kontrobersyal na drug raid sa Pampanga noong 2013 kung saan sya nanilbihan bilang provincial director.

Nilinaw rin niya na mananatili pa rin siyang miyembro ng PNP at hihintayin ang pagtatapos ng kanyang termino sa ika-8 ng Nobyembre ngayong taon.

BASAHIN: Talumpati ni PNP chief Oscar Albayalde sa flag ceremony sa Camp Crame pic.twitter.com/1t3H3RQIZu

— DWIZ Newscenter (@dwiz882) October 14, 2019

Kasunod ng naturang anunsiyo ni Albayalde, si Lt. Gen. Archie Gamboa naman ang magiging officer-in-charge ng Pambansang Pulisya.

Magugunitang ipinaliwanag ni PNP Spokesperson Police Brig. Gen. Bernard Banac, sa panayam ng DWIZ, na ang ‘non-duty’ status ay nangangahulugan ng paghahanda ng isang kagawad ng PNP para sa makapaghanda sa kanyang pagreretiro.