HOT STORIES OF THE WEEK

Umaasa si Senator Koko Pimentel na makakasama nito sa minorya ng senado ang mga kapwa senador gaya nila Sen. Hontiveros, Sen. Chiz Escudero, Sen. Pia Cayetano at Sen. Allan Peter Cayetano, bagamat, wala pang tiyak na bilang ng miyembrong bubuo sa senate minority.

Ayon pa sa senador nandiyan naman daw siya para tingnan ang super majority upang hindi mabelawala ang sinusunod na patakaran ng senado kaugnay sa tamang bilang ng miyembro nito.

Nanawagan ang ilang transport groups sa gobyerno na tulungan ang kanilang sektor na solusyunan ang kanilang hinaing tungkol sa epekto ng nagpapatuloy na krisis sa langis.

Ayon kay Federation of Jeepney Operators and Drivers Association of the Philippines (FEJODAP) president Ricardo “Boy” Rebaño, marami na kasing mga tsuper ang naghahanap ng ibang pagkakakitaan para lamang suporatahan ang kanilang pamilya.

Aniya, hindi na kasi nakasasabay ang mga ito sa walang humpay na taas-presyo sa produktong petrolyo dahil napupunta na lamang daw ang kanilang kita sa pagpapakarga ng gasolina.

Inihayag naman ni Pinagkaisang Samahan ng mga Tsuper at Operator Nationwide (PISTON) national president Mody Floranda na nasa P300 na lamang kada araw ang naiuuwi ng mga tsuper mula sa 12 hanggang 18 na pamamasada.

Matatandaang nagpatupad ng fuel subsidy ang pamahalaan para ibsan ang epekto sa public transport sector ng serye ng fuel price hike bunsod na rin ng gulo sa pagitan ng Russia at Ukraine.

Pero sa ngayon, nasa 180,000 mula sa 377,000 na mga kwalipikadong drayber at operator ng public utility vehicle (PUV)  ang nakatanggap na ng P6,500 fuel subsidy.

Posible muling maharap ang bansa sa COVID-19 surge pagdating ng Agosto.

Ito ang  naging babala ni  Department of Health (DOH) Health Undersecretary Maria Rosario Vergeire kasabay na rin ng tiyansa ng local transmission ng Omicron subvariant BA.5.

Ayon kay Vergeire, malaki ang posibilidad na mangyari  ito dahil  sa mabagal na inoculation rate o pagbabakuna sa bansa bunsod na rin ng pagbaba ng immunity ng mga bakunadong indibidwal mula sa nasabing sakit.

Paliwanag ni Vergeire, 15% pa lamang ng eligible population at 25% na senior citizens ang nakatanggap ng kanilang ikalawang booster shot.

Nakikita na rin daw nila ang linkage ng Omicron BA.5 subvariant kaya’t malaki ang tiyansa na sumirit ang mga naitatalang kaso gayundin ang bilang ng mga naoospital.

Nilinaw ng Department of Health na hindi ‘overwhelmed’ sa COVID-19 cases ang Philippine General Hospital (PGH) at Makati Medical Center (MMC).

Kasunod ito ng lumabas na ulat na puno na ng COVID-19 patients ang mga nasabing ospital.

Ayon sa DOH, nagpalabas na ng klaripikasyon ang MMC at sinabing maayos ang kanilang operasyon at availability kung magkakaroon man ng pagsirit sa kaso ng COVID-19.

Samantala, iginiit ng PGH na bagama’t kasalukuyang nasa high demand, mayorya sa mga dinadala at  na-a-admit sa kanilang pasilidad ay non-COVID-19 cases.

Paalala pa ng DOH sa publiko na dapat maging mapanuri sa mga kumakalat na impormasyon at mas makabubuting magtanong muna sa awtoridad.

Napapanahon na rin para magpaturok ng bakuna laban sa Influenza.

Ayon kay Infectious Diseases Expert Dr. Rontgene Solante, pumasok na ang panahon ng tag-ulan at tuwing buwan ng July, August at September karaniwang nagkakaroon din ng pagtaas sa bilang ng mga tinatamaan ng trangkaso.

Delikado ani Slante ang clinical presentation ng Influenza lalo na’t madali lamang kapitan ng COVID-19 ang mga indibidwal na may trangkaso.

Dahil dito, pinayuhan ng eksperto ang publiko na laging isaalang-alang ang pagsusuot ng face mask, iwasan ang mga matataong lugar, mga gatherings at ang mga closed environment dahil maari ding makuha ang Influenza sa mga lugar na ito.

Kaya naman napakahalaga rin aniya na magpalakas ng katawan upang di madaling kapitan ng trangkaso.

Nanawagan ang Kongreso kina incoming President Ferdinand “Bongbong” Marcos Jr, Vice President Sara Duterte at Finance secretary Benjamin Diokno na ipagpatuloy ang nasimulang pagtatalaga ng mga maituturing na best and brightest officials sa mga ahensya ng gobyerno partikular na sa tanggapan na in-charge sa pangongolekta ng buwis.

Ayon kay Northern Samar 1st District Congresman Paul Daza, na nagsisimula ang good governance sa pagpili ng pinakamahusay at matalinong department heads.

Kabilang na ani Daza dito ang pag-aapoint ng mga tamang mamumuno sa mga critical agencies tulad ng Bureau of Customs (BOC).

Kailangan aniyang maging maingat sa ilang mga personalidad at grupo na maaring may planong “i-hostage” ang ekonomiya ng bansa.

Binanggit pa nito na mayroon din aniyang tinatawag na samar group sa boc na binubuo ng mga insiders, brokers, at mga fixer.

Nais aniyang bigyan ng advance warning o babala si Secretary Diokno, na wag sanang hayaang isabotahe ng mga taong ito ang magandang hangarin ng incoming Marcos Administration at ng BOC na mapataas pa ang revenue collection ng pamahalaan para sa tuluyang pagbangon ng ekonomiya.

Kabilang ang pagsasagawa ng mga kilos – protesta ng mga militanteng grupo sa pinaghahandaan ng Philippine National Police (PNP sa mismong araw ng inagurasyon ni President -elect Ferdinand ‘Bongbong’ Marcos Jr.

Ayon kay PNP spokesperson Police Col. Jean Fajardo, naka-kasa na ang kanilang civil disturbance management contingents upang masiguro ang maayos at mapayapang pagsasagawa ng demonstrasyon ng ibat-ibang grupo.

Pinayuhan naman ni Fajardo ang mga magsasagawa ng kilos protesta na upang matiyak na walang malalabag na batas, dapat na maaga pa lamang ay kumuha na sila ng permit sa lokal na pamahalaan.

Paalala ni Fajardo, hindi nila pipigilan ang sinumang grupo na maghayag ng kanilang saloobin basta’t gawin lamang ito sa mga itinakdang lugar gaya ng freedom park o mga parke.

Hiling lamang ng PNP sa mga demonstrador na bigyang pagkakataon na mairaos ng mapayapa ang inagurasyon ni incoming President Marcos Jr., nang walang magaganap na anumang sakitan o iringan.

Naghahanda na ang ilang PUV drivers at operators sa nakaambang anim na pisong taas-presyo sa langis sa susunod na linggo.

Ayon kay Zaldy Ping, National President ng Stop & Go Coalition, nawawalan na sila ng pag-asa na maaprubahan ang isinusulong na taas-pasahe dahil sa patuloy na pagsirit ng presyo ng langis.

Gayunman, i-aapela pa rin nila ito sa susunod na administrasyon sa pamumuno ni President-elect Ferdinand ‘Bongbong’ Marcos Jr.

Samantala, ikinokonsidera na rin ng Stop & Go Coalition kasama ang Liga ng Transportasyon at Operators sa Pilipinas (LTOP), at Federation of Jeepney Operators and Drivers Association of the Philippines (FEJODAP) ang paglipat sa Electric jeepneys.

Ito ay para makaiwas sa lumalala pang epekto ng oil price hike.

Isasangguni ng grupo ang plano sa oras na magkaroon na ng bagong pinuno ang DOTr at LTFRB.