HOT STORIES OF THE WEEK

Ikinatuwa ng Malacañang ang pagtalon ng Pilipinas sa COVID-19 recovery ranking, kung saan, mula sa ika-57 puwesto ay umakyat ang bansa sa ika-33 puwesto base sa ulat ng tokyo-based business publication na Nikkei Asia.

Sa Talk to the People ni Pangulong Rodrigo Duterte, sinabi ni National Task Force against COVID-19 chief implementer at vaccine czar Secretary Carlito Galvez Jr. na naging epektibo ang ginawang strategy o diskarte ng bansa sa pagtugon sa COVID-19 pandemic at paglipat ng alert level system.

Sinabi ni Galvez na naungusan na ng Pilipinas ang ibang mga bansa dahil naging maganda ang pakikipag tulungan ng publiko sa mga ahensya ng gobyerno.

Bukod pa dito, naging maganda din ang pagtugon ng gobyerno sa COVID-19 pandemic at maayos na pagbabakuna sa bansa.

Nakafull alert na ang Philippine National Police (PNP) matapos ang pagputok ng Bulkang Bulusan sa Sorsogon.

Ayon kay PNP Officer-in-Charge LT. Gen. Vicente Danao Jr., mahigpit na minomonitor ng kanilang ahensya maging ng Bulusan Municipal Police Station at Municipal Disaster Risk Reduction and Management Office ang kundisyon ng Bulkang Bulusan.

Mahigpit ding tinututukan ang mga apektadong residente na ngayon ay inilikas na sa ligtas na lugar matapos ang phreatic explosion ng nasabing bulkan.

Nanawagan din ang Bulusan MPS at Municipal Disaster Risk Reduction and Management Office (MDRRMO) sa mga residenteng nananatili parin malapit sa 4-kilometer permanent danger zone na lisanin muna pansamantala ang kanilang tirahan para sa kanilang kaligtasan laban sa ashfall mula sa bulkan.

Tiniyak ni Danao na handa ang mga tauhan ng PNP na tumugon sa anumang hindi magandang pangyayari sa nabanggit na lugar.

Samantala, nakikipag-ugnayan narin ang mga tauhan ng Juban Municipal Police Station sa Juban Fire Station para bombahin ang mga abo na nagkalat sa kalsada sa Juban, Sorsogon.

Epektibo na ngayong araw ang malakihang taas-singil sa presyo ng produktong petrolyo.

Ipinatupad kaninang alas-6 ng umaga ng mga kumpaniyang Chevron Philippines o Caltex, Flying V, Petron, Pilipinas Shell at SeaOil Philippines ang P2.70 centavos na taas-singil sa presyo ng kada litro ng gasolina; P6.55 centavos naman ang dagdag-singil sa kada litro ng diesel; habang P5.45 centavos naman ang itinaas sa kada litro ng kerosene.

Magpapatupad naman ng kaparehong presyo ang Cleanfuel, Petro Gazz, Phoenix Petroleum Philippines at PTT Philippines maliban nalang sa presyo ng kerosene.

Samantala, magpapatupad naman ng kaparehong presyo ang kumpaniyang Cleanfuel mamayang alas-8 ng umaga at Caltex na magpapatupad naman mamayang alas-12 ng tanghali.

Nabatid na ito na ang ikalawang sunod na linggo ng pagtaas sa presyo ng produktong petrolyo.

Nagbabala sa publiko ang Philippine Institute of Volcanology and Seismology (PHIVOLCS) dahil posible pang masundan ang naitatalang phreatic explosion ng Mt. Bulusan na matatagpuan sa lalawigan ng Sorsogon.

Ayon kay Department of Science and Technology (DOST) Undersecretary at PHIVOLCS OIC Renato Solidum, posibleng magdulot ng sunud-sunod pang pagsabog ang bulkan kung saan, inilagay na sa Alert level 1 ng PHIVOLCS ang naturang lugar.

Base sa huling report ng ahensya nagkaroon ng ashfall matapos magka steam-rich gray plum na hindi bababa sa isang kilometro ang taas sa Juban at Casiguran, Sorsogon alas-12 ng tanghali kahapon.

Patuloy pang minomonitor ng PHIVOLCS ang Bulkang Bulusan habang pinaiiwas naman ang mga residente 4-kilometer radius permanent danger zone.

Hinimok naman ni Solidum ang mga Local Government Units (LGUs) sa Sorsogon na suriin ang kanilang “preparedness plans,” para sa kaligtasan ng mga residente.

Tinutulan nina Senate President Vicente “Tito” Sotto III at Senator Imee Marcos ang pagpapaliban sa Barangay Election na nakatakda sanang isagawa sa Disyembre ngayong taon.

Ayon kay Sotto, hindi dapat ipinagpapaliban ang Barangay Election dahil mas humahaba lang ang termino ng mga Barangay Officials kaysa sa Pangulo ng bansa.

Dagdag pa ni Sotto, dapat na itigil ang paulit ulit na pagpapaliban dito at mainam din na tanungin at alamin ang opinyon ng susunod na administrasyon sa panukala na muling ipagpaliban ang barangay election.

Samantala, naniniwala naman si Senator Imee Marcos na mabuting ituloy na ang Barangay Election kasabay ng mga bagong upong pangulo, bise pangulo at mga senador ng bansa.

Sinabi ng Senadora na mainam na bigyan ng pagkakataon ang mamamayan na mahatulan ang mga nasa ibaba.

Bukod pa dito, magkakaroon din ng suporta ang bagong administrasyon sa mga bagong itatalagang Barangay Officials.

Muling nagpaalala sa publiko ang Metropolitan Manila Development Authority (MMDA) hinggil sa maayos at tamang pagtatapon ng basura ngayong tag-ulan.

Layunin nitong mapaigting ang kampaniya sa paglilinis sa loob at labas ng bahay upang maiwasan ang pagsirit ng mga tinatamaan ng Dengue.

Ayon sa MMDA, madalas pinamumugaran ng mga lamok ang mga imbakan o lagayan ng tubig na walang takip.

Tambayan din ng mga lamok ang mga maruruming lugar kaya’t kailangang paigtingin ang 4S Habit kontra Dengue.

Kailangan din na panatilihin ang proteksyon at kalinisan ng bawat isa dahil ito ang mabisang paraan para sugpuin ang lamok at maiwasan ang sakit na Dengue.

Nanawagan ang Manila Police District (MPD) sa mga nais magsagawa ng kilos-protesta sa araw ng panunumpa ni President-elect Ferdinand “Bongbong” Marcos Jr., bilang ika-17 Pangulo ng Pilipinas sa Hunyo a-30.

Ayon kay MPD director PBGen. Leo Francisco, gawin na lamang sa ibang araw ang kilos-protesta at ipaubaya na lamang ang naturang araw sa bagong administrasyon.

Humiling ng pakikisama si Francisco sa publiko sa araw ng panunumpa ni President-elect Marcos.

Sinabi ni Francisco na nasa 4K mga pulis ang idineploy upang magbantay sa iba’t ibang lugar sa Maynila sakaling sabayan ng mga rally ang oath-taking ng bagong presidente.

May mga naka-standby din na mga pulis mula sa National Capital Region Police Office (NCRPO) sakaling kailanganin pa ang mga ito sa inagurasyon ni President-elect BBM.

Pinatawan ng anim na buwang suspensiyon ng Office of the Ombudsman ang limang opisyal ng Anti-Red Tape Authority kabilang si Director General Jeremiah Belgica.

Ito ay matapos silang sampahan ng reklamong Grave misconduct at Gross neglect of duty and conduct of prejudicial to the best interest of the service ng dito telecommunity incorporated.

Ang iba pang sinuspinde ay sina Arta deputy director Eduardo Bringas; Division chief Sheryl Pura Sumagui; at mga director na sina Jedrek ng at Melamy Salvadora-Asperin.

Marso a-1 nang maglabas ng resolution at order of automatic approval ang ARTA na nag-uutos sa pagbibigay ng contingent frequencies sa Now Telecom Company, na subsidiary ng dito.

Pero lumabas na una na palang nakatanggap ng frequencies ang Now Telecom na napiling ikatlong Telco.

Dahil sa nangyari, na-convert sa multa ang parusa sa halagang katumbas sa sahod ng mga sinuspinde.

Nasa 14 na hikers at apat na guide na nasa paanan ng Mount Bulusan ang nailigtas ng awtoridad.

Ayon kay National Disaster Risk Reduction and Management Council (NDRRMC) spokesperson Mark Timbal, mula ang mga hiker sa Metro Manila at Calabarzon na nagsimulang umakyat sa bundok dakong alas-11 ng umaga kahapon.

Nabatid na ang mga tauhan ng Municipal Disaster Risk Reduction and Management Office (MDRRMO) sa bayan ng Barcelona ang tumulong sa hikers para makaalis sa nasabing bulkan nang magpatrolya ito sa lugar para abisuhan ang mga residente.

Una nang sinabi ng Philippine Institute of Volcanology and Seismology (PHIVOLCS) na ang phreatic eruption ay naganap dakong alas-10:37 ng umaga kanina at nagtagal ito ng 16 na minuto.

Itinaas rin ng PHIVOLCS sa Alert level 1 o low-level unrest ang naturang bulkan.