HOT STORIES OF THE WEEK

Sumampa na sa 370, 276 ang kabuuang bilang ng pasaherong sumakay sa MRT-3 nitong lunes.

Ito na ayon sa Department of Transportation (DOTr), ang pinakamataas na bilang nang sumakay sa MRT-3 magmula noong Hunyo 2020.

Dahilan ng pagdami ng pasahero ang karagdagang pinapatakbong set ng tren, mas malaking passenger capacity bawat bagon at libreng sakay na handog ng DOTr bilang solusyon sa pagtaas ng presyo ng langis.

Mula Marso 2020, naglalaro na sa 250K hanggang 300K ang bilang nang sumasakay sa MRT-3.

Magtatagal ang libreng sakay hanggang Hunyo a-30.

Nakapagtala ang Department of Health (DOH) ng panibagong 168 nahawa sa COVID-19 kahapon.

Ayon sa DOH, bahagyang bumaba ang bilang ng aktibong kaso na nasa 2, 437 mula sa 2, 459 noong Lunes.

Wala namang nadagdag sa bilang ng mga nasawi sa bansa na nananatili pa rin 60, 456, habang 3, 628, 999 ang gumaling sa COVID-19.

Ang mga rehiyong nanguna sa nakapagtala ng panibagong kaso sa nakalipas na dalawang linggo ay ang NCR na may 1, 156; CALABARZON, 380 at Central Luzon na may 214.

Sa kabuuan, umabot na sa 3, 691, 892 ang COVID-19 cases sa bansa.

Bumili ang Philippine National Police ng P7640-M na halaga ng kagamitan para sa kanilang operasyon.

Sa seremonyang pinangunahan ni PNP officer-in-charge, Lt. Gen. Vicente Danao Jr., sa Kampo Krame sa Quezon City kahapon, kinabibilangan ang mga equipment ng mga sasakyan, armas, night vision devices at bomb detector dogs.

Tiniyak naman ni Danao sa dumaan sa malinis transaksyon ang procurement ng mga nasabing kagamitan napawang may magandang kalidad.

Ipapakalat ang bagong kagamitan sa PNP Training Institute, Philippine National Police Academy, PNP Mobile Force Companies, National Support Units at mga istasyon ng pulisya.

Kasado na ngayong araw ang rollback sa diesel na ipatutupad ng Independent oil player na Petro Gazz.

Sa kabila ito ng malakihang taas-presyo sa langis sa bansa na ipinatupad ng maraming oil companies na epektibo kahapon.

Ayon sa Petrogazz, papalo sa P3.50 centavos kada litro ang ipatutupad nilang bawas-presyo sa diesel sa mga pili nilang istasyon.

I-aalok ito simula alas-6 ng umaga mamaya na magtatagal hanggang alas-10 ng gabi sa Hunyo a-11.

Dahilan ng tapyas-presyo ang sobrang suplay ng diesel sa ilang istasyon ng Petrogazz.

Aabot sa 88, 677 na trabaho ang alok ng Department of Labor and Employment (DOLE) sa pagdiriwang ng Independence Day sa Hunyo a-12.

Ayon sa DOLE, 80, 627 ng mga trabaho ay nasa sektor ng manufacturing, business, process outsourcing, construction at logistics habang mahigit 8k ay Overseas employment.

Magaganap ang main event ng job fair sa Bulacan Capitol Gymnasium habang may kaniya-kaniyang venue ang bawat rehiyon na makikita sa kanilang website.

Idaraos ang malawakang Job Fair sa pamamagitan ng face-to-face maliban sa ilang lugar na humiling na gawin ito online.

Sinampahan na ng kaso ng Office of the Ombudsman sa Sandiganbayan ang 42 personnel ng Bureau of Immigration (BI) na isinasangkot sa pastillas scam.

Isang uri ng katiwalian ang naturang scam kung saan pinapayagan ang iligal na pagpasok ng mga Chinese sa bansa kapalit ng pera na nakarolyo sa papel.

Sa 17 pahinang impormasyon, idinetalye ng Ombudsman ang pakikipagsabwatan ni Port Operations Division chief Marc Mariñas sa iba pang BI personnel at sa Empire International Travel and Tours para papasukin ang mga Tsino kapalit ng P10,000 kada isa.

Nakakolekta sila ng kabuuang P1.43-M halaga, na paglabag sa Section 3 of the Anti-Graft and Corrupt Practices Act.

Kabilang din sa sasampahan ng kasong Graft sina Senior Immigration officers Grifton Medina, Edwin Ortañez, Glenn Comia at iba pa.

Pinuri naman ni Senator Risa Hontiveros na siyang nangunguna sa pag-imbestiga ng senado ang resulta ng kaso na aniya’y tulong sa pagsugpo sa Human Trafficking sa bansa.

Tuloy-tuloy ang pagsirit ng inflation o bilis nang pagtaas ng presyo ng mga pangunahing bilihin at serbisyo sa nakalipas na buwan.

Ipinabatid ni PSA chief at National Statistician Claire Dennis Mapa na pumalo sa 5.4% ang inflation noong nakalipas na buwan na mas mabilis sa 4.9% na naitala noong Abril at 4.1% noong May 2021.

Ayon kay Mapa malaking factor sa mas mataas na antas ng inflation nitong Mayo ang mas mabilis na pagtaas ng presyo ng food and non-alcoholic beverages na may 4.9% inflation at 70. 1% share sa pagtaas ng pangkalahatang inflation sa bansa.

Umikot sa apat na isyu ang naging pag-uusap kahapon nina President-elect Ferdinand ‘Bongbong’ Marcos Jr. at Italian ambassador Marco Clemente.

Ayon kay incoming PCOO Secretary Trixie Cruz – Angeles, tinalakay ng dalawa ang pulitika, ekonomiya, imprastruktura at COVID-19 response sa kani-kanilang bansa.

Pinag-usapan din ang 75 diplomatic relationship ng dalawang bansa ngayong taon.

Samantala, may plano na ang Italya na dalhin sa Pilipinas ang Inter-Milan football club upang magsagawa ng Inter-Campus projects sa mga kabataan.

Naghain ng Counter Affidavit at Motion for Reconsideration ang limang opisyal ng Anti-red Tape Authority (ARTA) na pinasususpinde ng Office of the Ombudsman dahil sa korapsyon.

Ayon kay ARTA Director General Jeremiah Belgica, na kabilang sa mga pinasususpinde, hindi tiwali ang ARTA dahil ginagawa lang nila ang kanilang trabaho na pumuna sa matagal na aksyon ng gobyerno.

Malisyoso anya ang paratang dahil hindi naman sila lumagda sa Order of Automatic Approval.

Nag-ugat ang reklamo matapos akusahan ng isang Telco firm ang limang opisyal ng ARTA na pumapabor at nagbibigay ng special treatment sa isa pang Telco player.

Inaprubahan na ng Civil Service Commission ang flexible work policy para sa lahat ng government employees.

Alinsunod sa CSC resolution 2200209, epektibo ang kautusan sa Hunyo a-15 o labing-limang araw matapos itong ilabas.

Kabilang din sa ipapatupad ang:

• Flexiplace, kung saan maaaring magtrabaho ang government employees kahit wala sa kanilang opisina.

• Compressed work week, kung saan pagkakasyahin sa apat o limang araw ang 40-hour work week.

• Skeleton workforce, kung saan hindi required na lahat ay papasok sa opisina.

• Work shifting para sa nag o-operate ng 247.

• Flexitime, kung saan magsisimula ang trabaho na hindi maaga sa alas-siyete ng umaga at hindi lagpas ng alas-7 ng gabi.

• at Weekend work at combination, para sa flexible work arrangement.

Bahagi ito ng hakbang ng gobyerno upang maipatupad ang transition sa New Normal matapos isailalim ang bansa sa State of Public Health Emergency.