HOT STORIES OF THE WEEK

Abiso sa mga motorista.

Magsasagawa ng road reblocking ang Metro Manila Development Authority (MMDA) ngayong weekend.

Ayon sa ahensya magsisimula ang road reblocking mamayang alas-11 ng gabi at maaari nang madaan ang maapektuhang kalsada mula alas-5 ng madaling araw sa Hulyo 25.

Kabilang sa maaapektuhan ng road reblocking ang mga sumusunod na kalsada:

• Edsa Northbound Quezon City malapit sa Santolan MRT Station, paglagpas ng P. Tuazon Flyover hanggang Aurora Tunnel, paglagpas ng Aurora Blvd. hanggang New York, paglagpas ng Kamuning/ Kamias Road hanggang Jac Liner Bus Station.
• Fairview Avenue Southbound malapit sa Mindanao Avenue Extension
• Cloverleaf patungo ng NLEX-Northbound
• Cloverleaf patungong NLEX-Southbound at,
• Edsa-Quezon City Southbound- sa Balingasa Creek hanggang Oliveros Footbridge.

Kasalukuyang naka-isolate si Transportation Secretary Jaime Bautista matapos tamaan ng COVID-19.

Ayon sa kalihim, nakararanas siya ng mild symptoms gaya ng pananakit ng ulo at ubo.

Sa kabila nito, sinabi ng communications department ng DOTr na patuloy na magtatrabaho si Bautista at makikipag-ugnayan sa kanyang mga tauhan.

Sinimulan na ang public consultation para sa hirit na dagdag-singil ng Maynilad at manila water makaraang ipako nang tatlong taon ang water rate sa mga sineserbisyuhan nilang lugar.

Unang nagsagawa ng konsultasyon at rate rebasing process ang Maynilad noong Miyerkules na susundan ng Manila Water.

Hindi binanggit ng Metropolitan Manila Water Sewerage System Regulatory Office MWSS-RO kung magkano ang magiging dagdag-singil pero aabot umano sa P80-billion ang ginastos ng Maynilad na kailangang bawiin sa mga customer.

Nasa P20-billion naman ang gastos ng Manila Water sa kanilang mga proyekto na gustong ipasa sa kanilang mga customer.

Gayunman, nilinaw ni MWSS-RO Chief Regulator Atty. Patrick Ty na kailangan pa nilang himayin at pag-aralan ang hirit ng dalawang water concessionaire.

Tiniyak naman ni TY na hindi bibiglain ang mga consumer sa naka-umang na panibagong water rate adjustment.

Muling ikinukunsidera ng World Health Organization (WHO) Na idineklara bilang isang global health crisis ang monkeypox outbreak.

Sa pulong ng WHO Emergency Committee kanina, inihayag ni Director-General Tedros Ghebreyesus na patuloy ang pagtaas ng cases sa iba’t-ibang bansa.

Nilinaw naman ng mga WHO official sa Africa na itinuturing na nilang emergency ang nasabing epidemya sa naturang kontinente.

Gayunman, nagdadalawang-isip pa ang mga siyentista at medical expert sa Europa, North America at iba pang lugar kung kailangang magdeklara ng emergency dahil mild lamang umano ang bersyon ng sakit sa kanilang mga bansa.

Namemeligrong magkaroon ng rotational brownout kung titigil sa pag-susuplay ng kuryente ang dalawang malaking power plant sa Luzon.

Ito ang ibinabala ng Meralco sakaling hindi pagbigyan ang hirit nila at ng dalawang power plant na i-adjust ang kontrata para masalo ang pagtaas ng presyo ng krudo na nagpapatakbo sa mga planta.

Aminado si Meralco Regulatory Management Head Ronald Valles na kung mayroon man silang makuha, mas malaki naman ang presyo at mas malaki ang babayaran ng customers kumpara sa kini-claim ng san miguel corporation na P5.25 billion.

Gayunman, tutol ang grupong power 4 people sa petisyon ng Meralco at San Miguel power plants dahil paglabag umano ito sa kontrata.

Handa namang pag-aralan ng Energy Regulatory Commission ang hirit ng Meralco at dalawang power plant lalo’t may epekto ito sa singil sa kuryente sa gitna ng nagtataasang presyo ng mga bilihin at serbisyo.

Tiniyak ni ERC Commissioner Rexie Baldo-Digal na hihimayin nilang maigi ang petisyon ng Meralco at San Miguel upang ma-protektahan ang kapakanan ng mga consumer na bugbog na sa tila walang katapusang pagtaas ng presyo ng mga bilihin at serbisyo.

Humihiling ng dagdag singil sa gobyerno ang mga operator sa EDSA bus carousel na nagbibigay ng libreng sakay.

Ayon kay Land Transportation Franchising and Regulatory Board Chairperson Cheloy Garafil, dalawang bus consortium sa EDSA runway ang umaalma para sa dagdag-singil ng kanilang libreng sakay.

Ito’y bunsod ng pagtaas ng presyo ng diesel sa kabila ng tatlong magkasunod na linggo namang rollback.

Iminungkahi ng E.S. Transport at Mega Manila Bus Operator na itaas ang bayad sa kanila batay sa layo ng pasada ng bawat bus lalo’t otsenta pesos ang kada litro ng diesel.

Kamakailan ay inihayag ng LTFRB Na nagbayad na ang pamahalaan ng P659-million sa mga bus operator para sa sampung linggong libreng sakay sa EDSA.

Hindi pinagbigyan ng Quezon City Department of Public Order and Safety (DPOS) ang permit to rally ng grupong Bagong Alyansang Makabayan o Bayan para sa unang State of the Nation Address ni Pangulong Ferdinand “Bongbong” Marcos, Jr.

Sa aplikasyon ng Bayan, hinihiling nitong makapagsagawa ng rally sa Batasan road sa Commonwealth Avenue, Quezon City sa Lunes.

Gayunman, ibinasura ng DPOS ang hirit ni Bayan Secretary General Renato Reyes, Jr. batay na rin sa rekomendasyon ng Quezon City Police District.

Ipinunto ng DPOS na hindi isang freedom park ang Batasan road para magsagawa ng kilos-protesta o anumang mass gatherings; maka-aapekto ang aktibidad ng Bayan sa normal na daloy ng trapiko para sa mga dumaraan sa Batasan o Commonwealth Avenue.

Muling inabisuhan ng Philippine Consulate General sa New York, U.S.A. ang mga pilipino na manatiling mapagmatyag sa gitna nang dumaraming kaso ng krimen sa lugar.

Batay sa datos ng New York City Police Department, tumaas ng 37% ang city-wide crime incidences ngayong taon kumpara noong 2021.

Kabilang sa mga insidente ng pagnanakaw o theft, 49%; robbery o panghoholdap, 39.2% at hate crimes, 12.6%.

Ayon sa konsulada, dapat mag-ingat ang mga pinoy tuwing lalabas ng bahay upang maiwasang maging biktima ng anumang krimen.

Noon lamang isang linggo, isa na namang pilipinong turista mula sa Cebu ang ginulpi malapit sa Philippine Center sa Manhattan, New York City.

Ito na ang ika-41 beses na isang pinoy ang nabiktima ng itinuturing na hate crime laban sa mga asyano sa Amerika.

Masusing nirerapaso ng Department of Agriculture ang Rice Tarrification Law (RTL) at mandato ng National Food Authority (NFA) upang matiyak ang food security.

Sa ilalim ng RTL, pinapayagan ang liberalized importation ng bigas, habang ang NFA ay may papel lamang na tiyaking sapat ang supply ng rice buffer stocks sa Pilipinas o tatlumpung araw ng total consumption ng bansa tuwing lean season.

Pero bago isabatas ang RTL, ang NFA Ang nag-re-regulate ng rice sector at tanging ahensyang pinapayagang mag-import ng bigas.

Inihayag ni DA Undersecretary Kristine Evangelista na pinag-aaralan ng kagawaran kung papayagang muli ang NFA na mag-angkat ng bigas kahit nasa ilalim ng liberalized trading regime.

Alinsunod sa Rice Tarrification Law, hindi pinapayagan ang NFA na mag-angkat ng bigas.

Inihayag ni Quezon City Department of Public Order and Safety (QC-DPOS) Chief Elmo San Diego na ibasura ang kahilingan ng mga militanteng grupo hinggil sa pagsasagawa ng rally sa Batasan road sa Quezon City kaugnay sa kauna-unahang State of the Nation Address (SONA) ni Pangulong Ferdinand “Bongbong” Marcos, Jr.

Ayon kay San Diego, ang hindi pagbibigay ng permit ng QC-DPOS ay alinsunod sa rekomendasyon ng PNP na hindi payagan ang anumang aktibidad sa araw ng sona ni PBBM sa Lunes.

Sinabi ni San Diego na papayagan lang na magsagawa ng rally sa mga itinalagang Freedom Park kabilang ang QC Memorial Circle at UP campus.