HOT STORIES OF THE WEEK

Patuloy pang tinatrabaho ng Department of Social Welfare and Development (DSWD) ang mga listahan ng mga pangalang aalisin sa pantawid pamilyang pilipino program o 4ps beneficiaries na ikinukonsiderang hindi na mahirap o hindi na kwalipikadong tumanggap ng benepisyo sa ilalim ng naturang programa.

Sa panayam ng DWIZ, sinabi ni DSWD Secretary Erwin Tulfo, na nasa mahigit anim na raang libong household pa ang kanilang iniimbstigahan na kailangang palitan.

Sinabi ni Tulfo na nakahanda na ang mga listahan ng pangalan o waiting list na aabot sa 10.6 million na planong ilagay sa 4P’s beneficiaries na ipapalit sa 1.3 na mga pangalang inalis.

Tiwala si Tulfo na mababawasan o masosolusyonan ang problema sa mga mahihirap na pamilyang pilipino.

Inihayag ng Department of Agriculture (DA) na patuloy pa rin sa pag-iimport ng asukal ang Pilipinas para sa industrial at commercial use sa gitna ng mga ulat hinggil sa nakaambang kakulangan ng suplay nito sa susunod na buwan.

Ayon kay Agriculture Undersecretary Kristine Evangelista, manipis ang suplay ng asukal sa bansa kung saan, nakikipag ugnayan na sila sa sugar regulatory administration (SRA) para matugunan ang nasabing isyu.

Matatandaang pumalo sa P90 ang kasalukuyang retail cost ng refined sugar habang sumampa naman sa P70 ang brown at wash sugar.

Itinaas sa 6.5% ng Asian Development Bank (ADB) ang economic growth forecast ng bansa mula sa dating 6% na initial forecast noong buwan ng Abril.

Ayon kay Philippines Country Director Kelly Bird, ang inaasahang mas lalago pa ang akonomiya ng bansa dahil sa mas pinaluwag na covid-19 mobility restrictions, expansion ng vaccination program, rebound sa investments at household consumptions maging ang Manila-based lender.

Bukod pa dito, bumuti narin ang unemployment rate kung saan bumaba ito sa 6% mula sa dating 7.7% habang tumaas naman ang employment rate, remittance inflows at paglago ng public infrastructure projects ng bansa sa pagsisimula ng taong 2022.

Samantala, hindi naman binago ng ADB ang growth projection nito sa taong 2023 na nananatili parin sa 6.3%.

Nababahala si UP-PGH Emergency Medicine Chairman at Professor Dr. Ted Herbosa sa paghina ng epekto ng mga bakuna sa mga fully vaccinated individuals makalipas ang 4 hanggang 6 na buwan.

Sa panayam ng DWIZ, sinabi ni Herbosa, na sa 71 milyong pilipinong nakatanggap ng 2nd primary dose ng bakuna, 20% lamang o katumbas ng 15 milyong pilipino ang nagpaturok ng booster dose.

Dahil dito, posible aniyang humihina ang vaccine efficacy nang karamihan sa mga fully vaccinated individuals.

Inihayag ni Private Hospitals Association of the Philippines Incorporated (PHAPI) President Dr. Jose Rene de Grano na karamihan sa mga na-aadmit sa mga pribadong ospital na nagpopositibo sa covid-19 ay mga elderly at mga immunocompromised o yung may mga karamdaman.

Ayon kay De Grano, marami sa mga pasyenteng inadmit sa ospital ang hindi pa nakakumpleto ng kanilang bakuna dahilan kaya nakararanas ang mga ito ng severe o malalang sintomas ng virus.

Bukod pa diyan, mayroon ding mga fully vaccinated na nagtutungo sa kanilang pagamutan na pawang nakaranas ng mild and moderate symptoms kayat hindi na kailangan na magpa-admit pa sa ospital.

Pinag-iingat ng Private Hospitals Association of the Philippines (PHAP) ang publiko laban sa leptospirosis at dengue ngayong tag-ulan.

Sa panayam ng DWIZ, ipinaalala ni Dr. Jose De Grano, Presidente ng PHAP ang kahalagan ng paglilinis ng paligid para maiwasan ang pagkakasakit.

Bagaman hindi ganoon kadami ang ini-aadmit sa ospital dahil sa leptospirosis, ipinayo pa rin ng opisyal na huwag nang lumusong sa baha kung hindi naman kinakailangan, lalo na kung may sugat sa paa.

Inihayag ng Department of Social Welfare and Development (DSWD) na tutukuyin na nila ang mga bagong benepisyaryo ng Pantawid Pamilyang Pilipino Program (4Ps).

Ito ang inihayag ni DSWD Secretary Erwin Tulfo matapos ang pagkakatanggal sa listahan ng 1.3 milyong 4Ps beneficiaries dahil hindi na kwalipikado para sa ayuda.

Ayon kay Tulfo, dadaan muna sa mabusising proseso ang mga bagong benepisyaryo upang malaman kung ‘deserved’ ng mga ito na matulungan.

Para naman sa mga tinanggal sa listahan, tiniyak ni Tulfo na agad nila itong ipapaalam.

Kung may pagkakataong lumipat ng tirahan ang benepisyaryo, maaari pa rin itong tumanggap ng tulong sa pamamagitan ng pagpaparehistro sa regional DSWD office.

Pabor ang Philippine Medical Association na i-rekunsidera ng Department of Health ang muling paggamit ng Dengvaxia vaccines bunsod ng tumataas na kaso ng dengue sa bansa.

Sa kabila ito ng kontrobersyang bumabalot sa nasabing bakuna na itinuturong dahilan umano ng pagkamatay ng ilang batang tinurukan nito.

Binigyang-diin ni dating PMA President Dr. Benito Atienza na mahalaga ang papel ng mga bakuna upang mapababa ang bilang ng mga nagkakasakit, lalo ngayong magkasabay kumakalat ang dengue at covid-19.

Wala pa naman anyang “siyentipikong ebidensya” na Dengvaxia talaga ang sanhi ng pagkamatay ng ilang batang tinurukan nito noong 2017 at kailangan pa ng mas malalim na pag-aaral bago ito patunayan.

Binalaan ng Department of Social Welfare and Development (DSWD) ang publiko hinggil sa “ayuda list scheme” na bagong uri ng panloloko para makakuha ng ayuda sa kanilang tanggapan.

Ayon kay DSWD Secretary Erwin Tulfo, may ilang indibidwal ang nagpupunta sa iba’t-ibang barangay at nagpapakilalang kawani ng DSWD upang mangumbinsi sa mga residente na magbayad, kapalit ang pagkakasali sa listahan na maaaring mabigyan o makatanggap ng ayuda mula sa naturang ahensya.

Nilinaw ni Tulfo na responsibilidad ng mga barangay na ilapit sa kanilang tanggapan ang mga dapat na makatanggap ng tulong at serbisyo dahil hindi ito basta-basta ibinibigay sa kahit na sino.

Matatandaang una nang inanunsiyo ng DSWD na aabot sa 1.3 milyong indibidwal ang maaring matanggal sa listahan ng mga benepisyaryo dahil hindi na umano nabibilang ang mga ito sa tinatawag na “poorest of the poor.”

Samantala, nagbanta rin ang opisyal sa mga fixer na gumagamit ng pangalan ng kagawaran na kanilang tutugisin ang mga nang i-scam sa mga nanghihingi ng tulong.

Inihayag ni Infectious Diseases Expert Dr. Rontgene Solante na hindi pa kailangang maghigpit ng border control sa bansa ang pamahalaan.

Ayon sa eksperto dapat ang tanging pinagtutuunan ng pansin ng pamahalaan ay ang bilang ng kasalukuyang pasyente na tinatamaan ng malalang kaso ng covid-19.

Sinabi ni Solante, na suportado niya ang pahayag ng Department of Health (DOH) hinggil sa paghihigpit ng restriksiyon sa Pilipinas sa kabila ng naitalang bagong sub-variant ng omicron na BA.2.75

Iginiit pa ni Solate na mas importante ang pagkakaroon ng mahigpit na monitoring sa mga kaso ng nakahahawang sakit, pag-isolate at pagpapa-test ng mga indibidwal na nakakaranas ng sintomas ng covid-19, at patuloy na pagsunod sa minimum health protocols.