HOT STORIES OF THE WEEK

Nakikipag-ugnayan na ang mga tauhan ng Department of Social Welfare and Development (DSWD) sa National Disaster Risk Reduction and Management Council (NDRRMC) hinggil sa disaster response ng pamahalaan.

Kasunod ito ng direktiba ni DSWD Secretary Erwin Tulfo na bumuo ng disaster response operations at preparatory activities ngayong panahon ng tag-ulan.

Layunin ng ahensya na mapaghandaan ang pagbibigay ng tulong partikular na ang food at non-food items sa mga local government unit, na itinuturing na first responders tuwing may kalamidad.

Sa kabila nito, nagpaalala sa publiko ang DSWD, na manatiling alerto at maging handa sa epekto ng mga pag-ulan ngayong ipinagdiriwang din ang national disaster resilience month.

Nirerepaso na ng Department of Education (DepEd) ang usapin sa K to 12 program ng mga mag-aaral.

Kasunod ito ng ikinasang Pulse Asia Survey kung saan lumilitaw na 44% ng mga pinoy ang “dissatisfied” o hindi nasisiyahan sa K-12 system ng pamahalaan na mas mataas sa 28% dissatisfaction rate noong 2019 survey.

Tiwala si DepEd Undersecretary Epimaco Densing, na maisasapinal o matatapos at makapagmumungkahi ng mga bagong plano ang kanilang ahensya sa lalong madaling panahon.

Ayon kay Densing, ipinag-utos ni Vice President at DepEd Secretary Sara Duterte-Carpio na repasuhin ang programang kindergarten hanggang grade 10 at magsagawa ng pagre-review sa grades 11 at 12.

Naniniwala si Densing na dapat maituro o magamit ng mga batang nasa kindergarten ang wikang ingles sa halip na mother tongue o ang sariling wika.

Sa ilalim ng K-12 law, ang mother tongue o sariling wika ang dapat na gamiting medium of instruction mula kindergarten hanggang grade 3.

Bukod pa dito, plano din ng ahensya na magkaroon ng mahabang training ang mga guro sa halip na isang linggong seminar lamang.

Mas higit umanong nakakahawa ang bagong COVID-19 Omicron subvariant na BA.2.75 at uubrang tablahin ang mga bakuna kontra COVID-19.

Binigyang diin ito ni Dr. Rontgene Solante, Infectious Disease Expert bagamat naghihintay pa sila ng mga pag-aaral na nagsasabing mas matitinding sintomas ang dala ng naturang Omicron subvariant na tinagurian ding Centaurus.

Ayon pa kay Solante, miyembro ng Vaccine Expert Panel (VEP), maaga pa para matukoy ang anyo at galaw ng BA.2.75 subalit may mga mutations na nadiskubre nilang mayruong mataas na hawahan tulad ng BA.5 at may posibilidad na makaapekto ito sa mga bakuna.

Sinabi ni Solante na kung titingnan ang genetic tree ng Omicron variant habang nag-e-evolve ito, nariyan ang posibilidad nang tumaas na hawahan at abilidad na balewalain ang mga bakuna o mismong proteksyon na ibinibigay ng mga bakuna.

Ang BA.2.75 ay unang lumutang sa India nuong Mayo at mabilis na kumalat sa mga bansang Amerika, Britanya, Australia at Netherlands.

Nararanasan ngayon sa buong mundo ang pagtaas ng bilang ng mga overweight at obese.

Sa panayam ng DWIZ, sinabi ni Jovita Raval, pinuno ng National Nutrition Council Nutrition Information and Education Division, na hindi lamang ang sobrang pagkain ang dahilan ng labis na pagtaba ng isang tao.

Sinabi pa ni Raval na mas mataas aang tyansa ng mga ito na magkaroon ng ibang sakit gaya ng diabetes, sakit sa puso, at iba pa.

Hinimok naman ni Raval ang mga lokal na pamahalaan na magpatupad ng ordinansa upang ipagbawal ang pagbebenta ng mga hindi masusustansiyang pagkain malapit sa mga paaralan lalo’t malapit na ang pagbabalik ng face-to-face classes.

Dapat rin aniyang magtulungan ang Department of Education at DSWD upang maisulong ang pagkakaroon ng tamang nutrisyon ng mga bata.

Pinayuhan ng Philippine Red Cross (PRC) ang publiko na iwasang lumusong sa baha nang walang proteksyon upang maiwasan ang sakit na Leptospirosis.

Kasunod ito ng serye ng mga pag-ulan nitong mga nakalipas na araw kung saan, ilang mga lugar sa Metro Manila ang nalubog sa baha.

Ang bacteria na Leptospira ay karaniwang nakukuha mula sa ihi ng daga na nagdudulot ng nasabing sakit.

Kabilang sa mga sintomas ng Leptospirosis ang mataas na lagnat, pamumula ng mga mata, pananakit ng ulo, tiyan at kasu-kasuan, pagdudumi, pagsusuka, pamamantal at paninilaw ng balat.

Pinayuhan rin ng PRC ang publiko na agad na kumonsulta sa doktor sakaling makaramdam ng sintomas.

Bahagyang bumaba ang naitalang bagong kaso ng COVID-19 sa Pilipinas kahapon.

Ayon sa DOH, bumaba sa 1, 841 ang naitalang New Covid-19 cases kumpara sa 2, 285 noong Lunes.

710 sa naitalang bagong kaso ay nagmula sa National Capital Region (NCR).

Tumaas naman sa 20, 511 ang aktibong kaso na katumbas ng 11.9%.

Samantala, wala namang nadagdag sa bilang ng mga nasawi dahil sa Covid na nananatili pa rin sa 60, 641 habang  3, 656, 070 ang mga gumaling.

Sa kabuuan, pumalo na sa 3, 737, 222 ang Nationwide Covid-19 tally sa Pilipinas.

Ipinatupad na ang ”Semi-lockdown” sa Kamara ngayong araw bilang paghahanda sa unang State of the Nation Address (SONA) ni Pangulong “Bongbong” Marcos Jr.

Sinabi ni House secretary General Mark Llandro Mendoza na simula ngayong araw ay lilimitahan na ang pagpasok sa Batasang Pambansa sa Quezon City.

Pagdating naman ng Huwebes o Biyernes ay posibleng ipatupad na ang total lockdown sa buong Batasan Pambansa Complex.

Una na ring sinabi ni Mendoza na handang-handa na ang Kamara para sa unang SONA ni Pangulong Marcos sa Hulyo a-25.

All-set na ang buong Kamara sa kauna-unahang State of the Nations Address ni Pangulong Ferdinand ‘Bongbong’ Marcos Jr. sa July 25.

Ayon kay house secretary general Dong Mendoza, tanging minors revisions na lamang ang kinakailangan nilang tapusin sa paghahanda.

Nagpapatuloy rin ang pakikipag-ugnayan ng Kamara sa mga ahensiya ng gobyerno at sa Malakanyang habang inumpisahan na rin ang pamamahagi ng imbitasyon.

Sa ngayon, nagkaroon na ng adjustment sa capacity ng Batasang Pambansa mula sa 1,200 individuals na kayang ma-accomodate ng gusali.