HOT STORIES OF THE WEEK

Hinikayat ni Pangulong Ferdinand ‘Bongbong’ Marcos Jr. ang mga Pilipino na pakinggan ang kaniyang kauna-unahang State of the Nation Adress sa July 25.

Sa facebook post ng Pangulo, inanyayahan nito ang lahat na pakinggan ang plano at mithiin niya para sa Pilipinas sa loob ng anim na taon niyang panunungkulan.

Prayoridad ni Marcos sa kaniyang pamamahala ang pagpapatibay ng programang ‘farm-to-market road’, at pagsusulong ng mga proyektong makatutulong sa mga Pilipinong nasa sektor ng agrikultura.

Matatandaang una rito, sinabi noon ni Finance Secretary Benjamin Diokno na lalamanin ng talumpati ni PBBM ang fiscal framework ng kanyang administrasyon.

Good news para sa mga motorista!

Asahan na bukas, Martes, ang panibagong tapyas-presyo sa produktong petrolyo.

Ayon sa ilang kumpaniya ng langis, maglalaro sa P1.70 centavos hanggang P1.90 centavos ang bawas-singil sa presyo ng kada litro ng diesel.

Magiging P4.70 centavos hanggang P4.90 centavos naman ang tapyas-presyo sa kada litro ng gasolina.

Ayon kay Department of Energy (DOE)- Oil Industry Management Bureau Dir. Rino Abad, ang dahilan ng rollback sa presyo ng langis ay bunsod ng lockdown sa China; pagtaas ng interes sa US at nang iba pang mga bansa; at banta ng recession o pag-alis ng mga produkto na magdudulot ng pagkasira ng demand sa iba’t-ibang mga bansa.

Sa ngayon ang antas ng year-to-date adjustments nito lamang Hulyo a-12 sa kada litro ng gasolina ay pumalo na sa P24.30 centavos habang P36.80 centavos naman sa kada litro ng diesel.

Nakikipag-negosasyon na ang Chinese embassy sa Manila ukol sa “technical issues” sa infrastructure project sa Pilipinas.
Kaugnay nito, binigyang-diin ng embahada na mayroon nang positive progress upang isulong ang mga proyekto.
Anila, bukas ang China para sa technical discussions sa mga proyekto at handa itong makipagtulungan sa bagong administrasyon ng Pilipinas.
Una nang sinabi ni transportation Undersecretary for Railways Cesar Chavez na hindi inaksyunan ng China ang kahilingan ng administrasyong Duterte para sa loan financing ng tatlong malalaking railway projects kung saan itinuring itong “withdrawn” at kailangang muling pag-usapan ng kasalukuyang gobyerno.
Nabatid na ipinag-utos ni President Ferdinand Marcos Jr. ang muling pakikipag-negosasyon ng DOTr sa China para sa loan agreements ng tatlong railway projects.

Nakiusap ang Philippine National Police (PNP) sa mga magpoprotesta sa kauna-unahang State of the Nation Address (SONA) ni President Ferdinand Marcos Jr., sa July 25 na makinig sa plano nito para sa bansa at i-monitor ang performance ng termino ng Pangulo.

Ayon kay PNP Director for Operations Police Major General Valeriano de Leon, dapat na respetuhin ang boses ng 31 Million Filipinos na bumoto kay Marcos Jr. noong nagdaang eleksyon.

Makakabuti aniya sa mamamayan na makinig sa sasabihin ng Punong Ehekutibo dahil dito ilalatag ang direksyon ng bansa sa susunod na anim na taon.

Giit ni de Leon na papayagan pa rin ang mga rally sa araw ng SONA pero ito ay maaari lamang gawin sa Local Government Unit-permitted areas at freedom parks.

Nabatid na magaganap ang sona ni pangulong marcos jr. sa Batasang Pambansa.

Pinag-aaralan ni Department of Justice (DOJ) secretary Jesus Crispin Remulla na ilipat sa Occidental Mindoro ang maximum security ng New Bilibid Prison (NBP) sa Muntinlupa City.

Ayon kay Remulla, layon ng plano na hindi na magdulot ng kapahamakan ang mga preso lalo’t nakahalo ito sa populasyon ng Metro Manila.

Gayunman, hindi rin madali para sa Kalihim ang plano dahil kailangang ikonsidera ang oras at pera para maisakatuparan ito.

Nabatid na bumisita noon si Remulla sa Sablayan Prison at Penal Farm sa Occidental Mindoro, na kayang tumanggap ng hanggang 10, 000 maximum security prisoners mula sa NBP.

Walang namo-monitor na banta ang Philippine National Police para sa gaganaping unang SONA ni Pangulong Ferdinand “Bongbong” Marcos Jr. sa July 25.
Ayon kay PNP Director for Operations Major General Valeriano De Leon, sa ngayon ay wala pa naman silang natatanggap na impormasyon sa mga tangkang panggugulo.
Gayunman, lahat ng posibilidad ay kanilang pinaghahandaan at naglatag na rin sila ng contingency plan.
Nabatid na aabot sa 15,000 na mga tauhan ng PNP, AFP at iba pang force multiplier ang ipakakalat para sa SONA.
Samantala, sinabi naman ni De Leon na para matiyak ang kaayusan ay magkakaroon sila ng pakikipag-usap sa mga militanteng grupo para sa security preparations at paalalahanan sila na huwag manggulo sa SONA.—mula sa ulat ni Gilbert Perdez (Patrol 13)

Naniniwala ang isang eksperto na nalalapit na ang endemic ng COVID-19 sa Pilipinas.

Ito’y sa harap ng bumababa na bilang ng mga namamatay at tinatamaan ng malalang kaso ng virus sa bansa.

Ayon kay Dr. Edsel Salvana, ang paglipat ng pandemya patungo sa endemic ay bunsod ng mababang bilang ng mga naoospital gayundin ang mga namamatay sa virus.

Nagbabala rin sa publiko si Salvana na huwag magpakampante kahit na tapos na ang pinakamalalang yugto sa COVID dahil marami pa rin ang hindi bakunado at hindi nagpapaturok ng booster dose.

Prayoridad ng Department of Education (DepEd) ang pagpapaunlad sa access at kalidad ng edukasyon sa bansa.

Binatay ang 2023 Proposed Budget sa Basic Education Development Plan (BEDP) 2030.

Ang naturang plano ay unang long term plan ng DepEd na binalangkas ng administrasyon ni former Secretary Leonor Briones.

Ayon kay Vice President at DepEd Secretary Sara Duterte, laman nito ang mga dapat tutukan para maresolba ang problema sa pagkatuto, partisipasyon at paghahatid ng edukasyon sa bansa.

Samantala, sa pagpapatuloy naman ng pagbalangkas sa kanilang panukalang pondo ay sasangguni rin umano ang DepEd sa Department of Health (DOH) ukol sa mga COVID related allocations.

Hindi na nagtaka si Infectious Disease Expert Rontgene Solante sa nakitang pagtaas ng kaso ng dengue na naiulat sa iba’t ibang bahagi ng bansa.

Sinabi ni Solante, year in-year out ay sadyang mataas ang dengue cases lalo’t apat na stereotypes ng sakit ang naririto sa Pilipinas.

Ito ay ang DENV-1, DENV-2, DENV-3, at ang DENV-4 dahilan para mapabilang ang Pilipinas sa listahan ng World Health Organization (WHO) bilang isa sa mga bansa sa Asia na may mataas na kaso ng dengue.

Dagdag ni Solante,  nagsisilbing contributory factor sa pagtaas ng kaso ng dengue ang panahon partikular ngayong panahon na ng tag-ulan.

Kaya naman payo ng eksperto, gawing prayoridad ang prevention, maglinis ng kapaligiran at agad na magpakonsulta sa mga doktor kung may nararamdaman para hindi mauwi sa kumplikasyon ang sitwasyon.

Tututukan ang Department of Labor and Employment (DOLE) ang kapakanan ng mga empleyado ng gobyerno na maapektuhan ng planong rightsizing.

Sinabi ni DOLE Secretary Bienvenido Laguesma, nais niya na makakuha ng sapat na kompensasyon at bagong posisyon na depende sa kanilang kakayahan ang mga empleyado ng gobyerno sakaling ipatupad na ang nasabing plano.

Subalit magdedepende ito kung magkakaroon ng bakante sa ilang ahensya o departamento ng gobyerno.

Aminado naman si Laguesma na hindi niya agad masasagot ang ilang mga hakbang sa ‘rightsizing’ dahil pinag-aaralan pa ng mabuti ng DOLE ang plano kasama ang ilang ahensiya ng gobyerno.