HOT STORIES OF THE WEEK

Itinaas pa ng Monetary Board ng Bangko Sentral ng Pilipinas (BSP) sa 75-basis point ang antas ng interes sa mga pautang sa bansa.

Ayon kay BSP Governor Felipe Medalla, layunin ng pamahalaan na makontrol ang patuloy na pagtaas ng inflation rate o ang pagmahal ng mga presyo ng bilihin at serbisyo.

Sinabi ni Medalla na simula kahapon, nasa 3.25% na ang interes sa overnight-borrowing; 2.75% sa overnight-deposit; habang 3.75% naman sa lending facilities.

Umaasa ang BSP na sa pamamagitan ng pagtaas ng interes sa pautang, maiibsan ang epekto sa presyo ng mga bilihin at serbisyo sa Pilipinas.

Aminado ang Department of Transportation na hindi makausad ang konstruksyon ng ilang railway project na suportado ng China, sa ilalim ng “Build, Build, Build Program”.

Ito, ayon kay Transportation Undersecretary for Rails Cesar Chavez, ay dahil hindi pa napopondohan ang mga nasabing proyekto.

Kabilang anya sa mga wala pang pondo ang mga planong train systems mula Laguna hanggang Bicol, Clark to Subic at Mindanao Railway, na campaign promise ni dating Pangulong Rodrigo Duterte.

Pinaka-malaki sa mga nasabing kontrata ang 380 kilometer PNR package 1 mula Calamba, Laguna hanggang Daraga, Albay na P142 billion; P83 billion para sa Mindanao Railway habang P51 billion Clark-Subic Railway.

Noon lamang January 18 ay ini-award ng DOTr ang kontrata para sa PNR Bicol package 1 sa Chinese Joint Venture China Railway Group limited, China Railway number 3 Engineering Group Limited at China Railway Engineering Consulting Group Limited.

Inaasahang matatapos ang konstruksyon ng package 1 sa taong 2024 at magsisimula ang operasyon sa ikatlong quarter ng 2025.

Gayunman, walang tugon ang Chinese government kahit lumiham na noong Pebrero si dating Finance Secretary Carlos Dominguez hinggil sa loan application kung saan nakasaad na kung hindi i-ga-grant ang loan ay ikukunsidera na itong withdrawn.

Dumating na sa bansa ang dalawang bagong armored vehicle-launched bridge units ng Philippine Army na isang military support vehicle na kayang makapag-deploy ng portable na tulay, upang makatawid sa mga ilog ang mga tangke at heavy equipment ng bansa.

Ayon kay Philippine Army Spokesperson Colonel Xerses Trinidad, ang pagdating ng dalawang unit ay magiging “game changer” sa mga operasyon ng Philippine Army Engineer Combat Battalions.

Nabatid na nakuha ang naturang mga sasakyan sa tulong narin ng Philippine-Israel government-to-government deal, na bahagi ng horizon two ng revised Armed Forces of the Philippines Modernization Program.

Sa ngayon, isasailalim muna sa technical inspection and acceptance committee ng Department of National Defense (DND) procurement service ang dalawang avlb, bago i-deploy sa Philippine Army Engineer Combat Battalions.

Iginiit ng Department of Education (DepEd) na hindi nila iuurong ang face-to-face classes na nakatakdang simulan sa Agosto a-22.

Ayon kay Vice President at DepEd Secretary Sara Duterte-Carpio, inaprubahan na ni Pangulong Bongbong Marcos Jr. ang DepEd Order no. 34 kung saan, nakapaloob dito ang school calendar para sa susunod na pasukan.

Bukod pa dito, inaprubahan nadin ang pagsisimula ng limang araw na full face-to-face classes sa Nobyembre a-2.

Naniniwala ang bise presidente na nasa mas mabuting posisyon na ngayon ang bansa para sa pagbabalik ng normal na klase dahil mas natuto na ang mga tao sa tamang pagsuot ng facemask.

Nakatulong din sa bansa ang mataas na antas ng pagbabakuna kung saan, nasa mahigit pitumput isang milyon na ang bakunado.

Samanatala, aminado naman ang bise presidente na nagkaroon ng learning losses sa mga kabataan na nasa online classes o distance learning bunsod ng pandemiya kaya kanilang tutugunan ang kahalagahan nito.

Sa kabila nito, sinabi ni VP Sara na kanilang uunti-untiin ang pagbabalik ng klase para magkaroon ng sapat na oras at makapaghanda ang mga paaralan, mga magulang, mga guro maging ang mga mag-aaral.

Sa ngayon, pinag-uusapan pa ng kagawaran na gawing 3 days ang in-person at 2 days na remote o distance learning bago gawing 4 days in-person classes na mayroong 1 day distance learning.

Nasawi ang isang kawani ng Malakanyang matapos mahulog sa ika-4 na palapag ng Mabini Hall.

Ayon kay Press Secretary Atty Trixie Cruz-Angeles, kinilala ang nasawi na si Mario Castro, isang administrative aide na naka-assign sa Information Communication Technology Office under Deputy Executive Secretary For Finance and Accounting.

Aniya, iniimbestigahan na ng Presidential Security Group (PSG) at Philippine National Police Force Unit kaugnay sa indente kung may foul play.

Tiniyak naman ni Sec. Angeles ang tulong ng pamahalaan sa pamilya ng nasawing government employee. —sa ulat ni Jopel Pelenio (Patrol 17)

Nakatakdang magpatupad ng gun ban sa Metro Manila dahil sa nalalapit na State of the Nation (SONA) ni Pangulong Ferdinand Bongbong Marcos Jr.

Magsisimula ito sa Hulyo 22 hanggang Hulyo 27.

Ayon kay PNP Director for Operations Police Maj. Gen. Val De Leon, gagawin ang gun ban bilang paghahanda sa seguridad sa SONA ng pangulo.

Dahil dito, sususpindihin muna ang lahat ng permit to carry firearms outside residence ng mga may-ari ng baril sa Metro Manila.

Ang naturang hakbang ay para masiguro na hindi makakalusot ang mga masasamang loob at may balak na manggulo sa unang SONA ni Pangulong Marcos Jr. sa Hulyo 25.

Mahigit 15,000 security personnel ang ipapakalat para sa unang State of the Nation Address (SONA) ni Pangulong Ferdinand “Bongbong” Marcos Jr., sa Hulyo 25.

Ayon sa Philippine National Police (PNP), binubuo ito ng mga police personnel, sundalo, at force multipliers mula sa mga ahensya ng gobyerno.

Sinabi ni PNP Director for Operations Police Major General Valeriano De Leon na nagprisinta na ng security plan si National Capital Region Police Office Chief Police Major General Felipe Natividad kay Interior and Local Government Secretary Benhur Abalos noon pang nakaraang linggo.

Isang task force rin ang bubuuin para sa seguridad ng SONA ni Marcos.

Ayon pa kay De Leon, pahihintulutan lamang ang mga welga sa mga freedom parks at paiiralin pulisya ang ‘maximum tolerance’ sa mga raliyista.

Mahalagang magkaroon ng guidelines sa sandaling muling payagang magamit ang Dengvaxia vaccine.

Ito ang inihayag ni Infectious Disease Expert at Vaccine Panel Member Dr. Rontgene Solante, sa harap ng pagtaas ng kaso ng dengue sa bansa.

Ayon kay Solante, sa pamamagitan ng guidelines ay mailalahad sa publiko ang benepisyo at kahalagahan ng bakuna, lalo para sa mga indibiduwal na nasa kategoryang high risk na tamaan ng sakit at high-risk na madala sa pagamutan.

Bukod dito, mailalahad din anya ng guidelines ang kahalagahan sa pagsugpo sa dengue virus infection.

Magugunitang sinabi ni Solante na panahon nang muling irekonsidera ng gobyerno ang pagpapatuloy at paggamit ng Dengvaxia, lalo’t ginagamit na rin naman ito sa ibang mga bansa gaya sa Singapore, Malaysia, Thailand at Indonesia.

Suportado ng Senado ang panukalang mabigyan ng otoridad si Pangulong Ferdinand “Bongbong” Marcos, Jr. na mai-rightsize ang burukrasya ng pamahalaan.

Layunin nitong mabawasan ang gastos ng gobyerno, isang kumpaniya o organisasyon sa pamamagitan ng pag-alis o pagtanggal ng mga kawani sa kanilang posisyon kung kinakailangan.

Ayon kay Senator Loren Legarda, suportado niya ang proposal ng Department of Budget and Management (DBM) hinggil sa naturang panukala para makatipid ang pamahalaan ng P14.8 billion kada taon.

Ayon kay Legarda, na una naring naghain ng kaparehong panukala noong 17th Congress, mayroong mga ahensya sa gobyerno na halos pare-pareho lang ang kanilang trabaho dahilan kaya hindi nagiging mabisa at epektibo ang serbisyo sa publiko.

Samantala, sang-ayon rin si Senator Sonny Angara sa pagbibigay ng power to rightsize kay PBBM bilang bahagi ng kanyang mandato.

Ayon kay Angara, bukod sa paglikha ng budget, trabaho rin ng pangulo na pangasiwaan ang human resources ng gobyerno.

Iminungkahi ni Trade Secretary Alfredo Pascual kay Pangulong Ferdinand “Bongbong” Marcos, Jr. ang pagpapadala ng mga guro sa ibang bansa para isailalim sa pagsasanay.

Sa naganap na ikalawang cabinet meeting sa Malacañan, isinulong ang suhestiyon sa gitna narin ng pagtalakay sa pagpapaigting ng education curriculum ng bansa.

Inihalimbawa ng kalihim ang bansang Vietnam, na nagpapadala ng mga guro sa Estados Unidos para sa kanilang advance studies maging ang pag-aalok ng National University of Singapore ng mga kurso na nakatutok sa teknolohiya, kung saan ang mga mag-aaral ay magagawaran ng micro-credential na kahalintulad ng diploma para sa maikling kurso.

Samantala, nabanggit din ng kalihim na tumutulong ang kanilang ahensya sa mga unibersidad, upang magkaroon ng development sa micro-credentialing system at makasabay ang mga ito sa pag usbong ng makabagong teknolohiya.