HOT STORIES OF THE WEEK

Nagbabala ang Philippine National Police – Highway Patrol Group (PNP-HPG) sa mga opisyal at kawani na iligal na gumagamit ng sirena at blinkers.

Sa pahayag ni HPG Director Brig. Gen. Rommel Francisco Marbil, tanging ang mga sasakyan lamang ng gobyerno na mayroong mga marka ang papayagang gumamit ng mga sirena at blinkers kabilang na ang limang pinakamataas na pinuno ng bansa partikular na ang Presidente, Bise-Presidente, Pangulo ng Senado, speaker ng Kamara at punong mahistrado ng Korte Suprema.

Kasama din sa maaaring gumamit ng mga sirena at blinkers ang mga miyembro ng militar, pulisya at ambulansya.

Ayon sa PNP-HPG, ang sinumang mahuhuling lalabag o iligal na gumagamit ng sirena at blinker ay posibleng maharap sa parusa at pagmumultahin kahit pa ang mga opisyal at kawani ng pamahalaan.

Sa ngayon umabot na sa isangdaan at pitumput siyam na blinkers at sirena ang nakumpiska ng hpg sa dalawang linggong intensified crackdown sa paggamit ng “wang-wang” nationwide.

Kumpiyansa si Pangulong Ferdinand “Bongbong” Marcos, Jr. na ang pagpapaigting ng mga polisiya, kundisyon, at imprastraktura ang susi sa pagpapalakas sa turismo ng bansa.

Sa naganap na ikalawang cabinet meeting, inihalimbawa ng pangulo ang Singapore na mayaman sa turismo kahit limitado sa likas na yaman ang kanilang bansa.

Tiwala si PBBM na kaya din itong gawin ng Pilipinas sa tulong ng suporta ng mga pilipino sa mga plano ng gobyerno para dito.

Nanganganib na tumaas muli ang presyo ng kada piraso ng itlog sa mga susunod na linggo.

Ito ang ibinabala ng Agricultural Sector Alliance of the Philippines Incorporated (AGAP) at Pork Producers Federation of the Philippines Incorporated (PPFPI) dahil sa taas ng production cost at mga kaso ng Bird flu.

Ayon kay dating AGAP partylist Rep. Nicanor Briones, Vice President ng PPFPI, dapat mapigilan ang pagkalat ng bird flu sa lalong madaling panahon, partikular sa mga lugar na pangunahing supplier ng manok.

Kulang na anya ang supply ng manok, tinatamaan pa ng bird flu ang mga manukan kaya’t magkakaroon ito ng malaking epekto sa demand.

Posibleng malapit na sa rurok o maaaring umabot na sa peak ang COVID-19 wave sa National Capital Region dahil sa pagbaba ng weekly growth rate.

Ayon kay OCTA Research Fellow, Dr. Guido david, bumaba na sa 32% noong Lunes mula sa 57% noong July 4 ang growth rate.

Indikasyon anya ito na bumabagal ang hawahan at may tsansang patungo na sa rurok o naabot na ang peak ng COVID-19 cases sa NCR.

Ipinunto ni David na asahang mas magiging malinaw ang trends sa susunod na linggo.

Naitala naman ang 10% positivity rate noong linggo, Hulyo a – 10.

Samantala, tumaas ang Healthcare Utilization Rate sa rehiyon sa 28% habang 20% ng Covid-19 ICU beds sa Metro Manila ang okupado.

Halos kalahati ng mga benepisyaryo ng Pantawid Pamilyang Pilipino Program (4P’s) ang posibleng matanggal sa listahan kasunod ng isinasagawang paglilinis ng Department of Social Welfare and Development.

Sa panayam ng DWIZ, sinabi ni DSWD secretary Erwin Tulfo na maraming mga nakikinabang sa programa na hindi naman karapat-dapat.

Sinabi pa ni Tulfo matagal na itong reklamo sa ahensya kaya’t agad nila itong tinutukan.

Nabatid na aabot sa 4.4 million ang benepisyaryo ng 4P’s.

Inanunsyo na ng Department of Education ang petsa ng pagsisimula ng klase para sa School Year 2022-2023.

Nakasaad sa DepEd order number 34 na nilagdaan ni Vice President at Deped Sec. Sara Duterte, bubuksan ang klase sa darating na August 22 at matatapos ito sa July 7, 2023.

Magsisimula naman sa July 25 ang enrollment para sa nasabing school year.

Batay pa sa inilatag na school calendar ng kagawaran, papayagan ang mga paaralan na magsagawa ng blended learning schedules at full-distance learning hanggang October 31, 2022.

Pagsapit naman ng November 2, dapat nang umpisahan ng lahat ng pampubliko at pribadong paaralan ang limang araw na face-to-face classes.

Pinag-aaralan na ng Department of Transportation ang posibilidad nang pagtatalaga ng karagdagang ruta para sa inaasahang pagbabalik ng full face-to-face classes sa Setyembre.

Ayon kay Transportation secretary Jaime Bautista, tinitingnan na nila ang fleet rationalization para magamit ang mga ruta at makakuha ng mas maraming load factor kada biyahe.

Napag-usapan din anya na dapat ituloy ang rationalization at kailangan ng mga tamang impormasyon kung ano ang mga availability ng mga sasakyan na gagamitin at mga maaaring gawin.

Una nang inihayag ng DOTr na karamihan sa mga ruta lalo sa Metro Manila ay masyadong mahaba o overlapping na nagreresulta sa hindi maayos na mga biyahe at nangangailangan ng pag-optimize ng ruta.

Idinagdag ng kalihim na kasalukuyang pino-proseso ng isang grupo ang pagkumpleto ng isang pag-aaral sa fleet rationalization bago ang pagbabalik ng face-to-face classes.

Bumuo na rin ng Ad Hoc Committee na pinamumunuan ng Undersecreatary for Roads kasama ang mga miyembro kabilang ang mga kinatawan mula sa Department of Education, Commission on Higher Education, Metropolitan Manila Development Authority at iba pang ahensya.

Matagumpay na nakapag emergency landing ang isang eroplano sa Sangley Airport sa Cavite.

Ang ATR Aircraft BE58 na may registry number RPC 5916 ay patungong Cuyo, Palawan para kumuha ng isda nang mapansin ng piloto ang problema sa right landing gear ng eroplano.

Dahil dito, nagpasya ang kapitan na bumalik sa Sangley dahil kumpleto ang emergency facilities ng naturang paliparan.

Ligtas na nakalapag ang eroplano sa madamong bahagi ng nasabing airport sa pangunguna ni Captain Jesse Bihasa at co-pilot na si James Patrick Bala.

Iniimbestigahan na ng Civil Aviation Authority of the Philippines (CAAP) at Aircraft Accident Investigation and Inquiry Board (AAIIB) ang nasabing insidente. —sa ulat ni Raoul Esperas (Patrol 45)

Asahan na ang mababang singil sa kuryente sa buwang ito.

Kasunod na rin ito ng refund na ipinag-utos ng Energy Regulatory Commission (ERC) sa kasalukuyang buwan.

Ayon sa Meralco, nasa halos 71 pesos o mahigit siyam na piso ang bawas sa kada kilowatt hour mula sa halos 11 pesos noong Hunyo.

Nangangahulugan ito ng 141 pesos na tapyas sa kabuuang bill ng mga kumukunsumo ng 200 kilowatt hours kasunod ng apat na sunud-sunod na buwang pagtaas ng singil sa kuryente.

Ipinag utos na ERC ang pag recalcucate sa pagkakaiba ng actual weighted average tariff at final interim average rate ng mahigit piso kada kilowatt hour mula July 2015 hanggang June 2022.