HOT STORIES OF THE WEEK

Inilatag na ng Quezon City Local Government (QC LGU) ang traffic rerouting scheme para sa kauna-unahang State of the Nation Address (SONA) ni Pangulong Ferdinand “Bongbong” Marcos Junior, mamaya.

Kabilang sa isasara ang Zipper Lane mula Tandang Sora hanggang University Avenue para bigyang-daan ang SONA at magpapatuloy ang Zipper Lane hanggang bukas.

Pinapayuhan naman ng QC LGU ang mga motorista na dumaan sa mga alternatibong ruta dahil inaasahan ang mabigat na daloy ng trapiko sa Commonwealth Avenue.

Ang mga motoristang manggagaling sa Edsa patungong Fairview ay dapat kumaliwa sa Mindanao o North Avenues hanggang Sauyo Road o Quirino Highway papunta sa kanilang destinasyon;

Ang mga manggagaling naman ng Edsa ay dapat ding dumaan sa Aurora Boulevard, flyover papuntang A. Bonifacio, kumaliwa sa J.P. Rizal, kaliwa sa Batasan–San Mateo Road patungong destinasyon;

Dumaan sa Bonny Serrano Avenue diretso hanggang Katipunan Crossing, F.V.R. Road, kaliwa sa SM Marikina, kanan sa A. Bonifacio, kaliwa sa J.P. Rizal, kaliwa sa Batasan–San Mateo Road papuntang destinasyon;

Sa mga manggagaling naman sa C5, dapat lumiko o kumanan sa F.V.R. Road, kumaliwa sa SM Marikina, kumanan sa A. Bonifacio, kumaliwa sa J.P. Rizal, kumaliwa sa Batasan-San Mateo Road patungong destinasyon.

Samantala, isang bahagi ng IBP Road sa kanto ng Sinagtala Street hanggang kanto ng Batasan-San Mateo Road ang sarado sa daloy ng trapiko.

Isang “determinadong assassin” ang suspek sa pamamaslang kay dating Lamitan City Mayor Rosita Furigay at dalawang iba pa.

Ganito ilarawan ni Quezon City Police District (QCPD) Director, Brig. Gen. Remus Medina ang suspek na si Dr. Chao Tiao Yumul nang pagbabarilin nito ang mga biktima sa gitna ng graduation ceremony sa Ateneo De Manila University, kahapon.

Ayon kay Medina, si Furigay ang talagang target ni Yumul na matagal nitong sinundan hanggang sa makakuha ng tiyempo.

Palipat-lipat anya ng bahay ang suspek at walang permanenteng address dahil lagi nitong tinitiktikan ang biktima.

Wala ring tinutuluyan sa Metro Manila si Yumul at sa katunayan ay nag-book lamang ito ng grab taxi papasok ng campus ng Ateneo na armado ng dalawang handgun pero hindi na-detect sa gate.

Sa loob ng campus ay matiyagang naghintay si Yumul kay Furigay sa lobby ng Aretè Building kung saan isasagawa sana ang graduation ng Ateneo Law School.

Tatlo ang patay kabilang ang dating alkalde ng Lamitan City, Basilan matapos pagbabarilin ng isang lalaki sa gitna ng graduation ceremony ng Ateneo Law School sa Katipunan Avenue, Quezon City, kahapon.

Kinilala ang mga biktimang sina Rosita Furigay, dating mayor ng Lamitan; Victor George Capistrano, Executive Assistant ni Furigay at Jeneven Bandiola, isa sa mga security guard ng Ateneo De Manila University.

Ayon kay PNP – Public Information Officer (PIO) Chief, Brig. Gen. Roderick Augustus Alba, dalawa naman ang sugatan sa insidente kabilang ang anak na babae ni Furigay na si Hannah, 25 anyos.

Dadalo anya sana si Furigay sa graduation ceremony ng anak nang pagbabarilin ng suspek na si Dr. Chao Tiao Yumul habang naglalakad sa lobby ng isa sa mga gusali ng paaralan, pasado alas-3 ng hapon.

Inihayag ni Quezon City Police District Director, Brig. Gen. Remus Medina na sunod na binaril ni Yumul si Capistrano at Bandiola matapos nitong tangkaing pigilang makatakas ang suspek.

Gayunman, nakalabas si Yumul ng campus dala ang sasakyang ninakaw nito malapit sa paaralan at nagkaroon pa ng habulan hanggang ma-corner ang suspek sa Aurora Boulevard, Cubao.

Batay sa imbestigasyon, personal ang motibo ng suspek sa pamamaslang.

Kinondena ng Ateneo De Manila University ang naganap na shooting incident sa Gate 3 ng unibersidad kaninang hapon.

Ayon sa pahayag ng unibersidad, tatlong indibidwal ang nasawi habang dalawa ang sugatan kabilang na ang suspek sa pamamaril.

Nangyari ang insidente isang oras bago magsimula ang 2022 commencement exercises sa Ateneo De Manila School of Law na agad namang kinansela.

Tiniyak din ng unibersidad ang seguridad sa Loyola Heights maging sa campus nito at ang pagpapaigting ng security protocol.

Nagpahayag din ng pakikiramay ang unibersidad sa pamilya ng mga biktima at nagpasalamat sa agad na pagtulong ng law enforcement at tauhan ng lokal na pamahalaan.

Patuloy namang makikipag-ugnayan ang Ateneo sa awtoridad para sa imbestigasyon sa naturang insidente.

Hindi malayong makapasok sa bansa ang monkeypox virus.

Ito ayon kay Dr. Rontgene Solante, head ng Adult Infectious Disease and Tropical Medicine ng San Lazaro Hospital dahil marami na ang mga turista sa Pilipinas.

Aniya, mahirap ngayon na ma-detect ang sintomas ng monkeypox dahil iba na ang katangian nito kumpara sa natukoy sa West Africa at Central Africa kung saan ito ay endemic.

Tiniyak naman ng Department of Health na handa itong tumugon sa nasabing virus.

Una nang idineklara ng World Health Organization (WHO) ang Public Health Emergency of International Concern dahil sa pagkalat ng naturang sakit.

Inihayag ni Executive Secretary Victor Rodriguez na magiging bahagi ng talumpati ni Pangulong Ferdinand ‘Bongbong’ Marcos Jr. sa kanyang unang SONA ang mga mahahalagang isyu na kinakaharap ng bansa.

Ayon sa kalihim, kasama dito ang isyu sa ekonomiya, face-to-face classes at ang pagtugon sa problema sa COVID-19.

Mababatid na natalakay na sa nakalipas na tatlong cabinet meetings ang mga ito kung kaya’t dito rin ibabase ang mga magiging plano ng Presidente para sa bansa.

Dagdag pa rito ay babanggitin din aniya ng Pangulo ang digitalization dahil nais nito na maging digitalized ang kanyang administrasyon.

Isasapinal na ngayong weekend ni Pangulong Ferdinand Marcos Jr. ang kanyang magiging talumpati sa kanyang unang State of the Nation Address (SONA) na gaganapin sa Lunes, Hulyo 25.

Ayon kay Executive Secretary Victor Rodriguez, mismong ang Presidente ang gumagawa ng kanyang talumpati kaya abalang-abala ito ngayon.

Mababatid na kaninang umaga ay isiningit lamang ng Pangulo ang kanyang dalawang schedules at pagkatapos ay agad din itong bumalik sa pagsasapinal ng lalamanin ng kanyang talumpati.

Hindi pa naman mabigyang-linaw ng kalihim kung ilang pahina ang magiging talumpati ng Punong Ehekutibo.

Samantala, posible naman aniya na nakapaloob sa SONA ng Pangulo ay ang ekonomiya, pagsisimula ng face-to-face classes sa pagbubukas ng darating na pasukan at COVID-19 response.

Inanunsiyo ng Philippine National Police (PNP) na epektibo na simula ngayong araw ang gun ban sa Metro Manila.
Ito ayon kay PNP Director for Operations, Maj. Gen. Valeriano De Leon, ay bilang bahagi ng security measures para sa unang State of the Nation Address (SONA) ni Pangulong Ferdinand “Bongbong” Marcos Jr. na gaganapin sa Lunes.
Sinabi rin ni De Leon na ang aktibasyon ng task force ay nangangahulugan ng mas maraming checkpoints sa borders ng Metro Manila, partikular sa bahagi ng Batasang Pambansa sa Quezon City.
Mababatid na halos 22,000 police personnels at force multipliers ang magbabantay sa SONA.
Samantala, nanawagan din ang opisyal sa mga organizer ng kilos-protesta na makiisa sa security upang maiwasan ang abala sa daloy ng trapiko sa major roads sa nabanggit na lugar.

Inihain ni Senador Robinhood ‘Robin’ Padilla ang panukala na naglalayong payagan na ang paggamit ng ‘medical marijuana’ o ‘cannabis’ bilang gamot sa Pilipinas.

Nakasaad sa Senate Bill 2-30 na matagal nang ginagamit ang marijuana bilang herbal medicine para sa mga karamdaman tulad ng gout, rheumatism, at malaria, bagamat dapat aniya na magkaroon ng parusa ang mapapatunayang nangaabuso dito.

Nabatid na sakaling maaprubahan ang naturang bill ay magiging principal regulatory agency nito ang DOH na magtatayo ng Medical Cannabis Compassionate Center sa public tertiary hospitals at gagawa ng prescription monitoring system ng registered medical cannabis patients at physicians.

Ang Food and Drug Administration (FDA) naman ang magte-testing sa medical cannabis product, habang ang Dangerous Drugs Board (DDB) at Philippine Drug Enforcement Agency (PDEA) ang magmo-monitor at magre-regulate ng medical cannabis.

Samantala, ang DOH rin ang mag-i-issue ng registry id cards sa mga pasyente na qualified guamamit ng medical cannabis.

Ipinatupad na ang full lockdown sa Batasang Pambansa Complex bilang bahagi ng security measures sa kauna-unahang State of the Nation Address (SONA) ni Pangulong Ferdinand “Bongbong” Marcos Jr.

Ayon kay House Secretary General Llandro Mendoza, nagsimula ang lockdown sa Batasan kagabi at handang handa na aniya sila para sa gaganaping SONA sa Lunes.

Kinumpirma na rin aniya ng nasa 90% ng mahigit 1,300 panauhin ang kanilang pagdalo sa event.

Una na ring sinabi ni Mendoza na nais ni Pangulong Marcos na gawing simple lamang ang kanyang SONA.