HOT STORIES OF THE WEEK

Ipinanawagan ni Pangulong Bongbong Marcos Jr. sa Kamara na gawing prayoridad ang pagpasa sa National Government Rightsizing Program at tax reform measures.

Binigyang-diin ni Pangulong Marcos na makatutulong ang rightsizing para pagbutihin ang institutional capacity ng gobyerno upang magawa nito ang mandato at makapaghatid ng mas magandang serbisyo habang tinitiyak ang epektibong paggamit ng resources.

Kaugnay naman sa tax reforms, itinutulak ni PBBM ang valuation reform bill na magtatakda ng real property values at valuation standards sa buong bansa at ang real property information system na magsisilbing database ng lahat ng real property transactions at declarations.

Samantala, isinusulong din ni Marcos ang pagpasa sa passive income and financial intermediary taxation act na magpapadali sa revenue neutral tax system ng financial sector.

Inatasan na ni Pangulong Bongbong Marcos ang Departments of Migrant Workers at Information and Communications Technology na iprayoridad ang automation ng mga kontrata ng mga Overseas Filipino Workers (OFW).

Sa kanyang kauna-unahang State of the Nation Address (SONA) kahapon, nais din ni Pangulong Marcos na magkaroon ng Overseas Employment Certifications (OECs) ang mga OFW sa kanilang mobile phones.

Ipaprayoridad din ang pagpapalawak ng proteksyon sa kapakanan ng mga filipino na nagta-trabaho sa ibang bansa sa pamamamitan ng pagputol sa bureaucratic red tape.

Tinawagan din ng pansin ng punong ehekutibo ang Department of Foreign Affairs (DFA) upang tulungan ang DMW na tiyaking makahahanap ng mga bagong oportunidad ang mga OFW na nawalan ng trabaho noong mga nakaraang taon.

Inihayag ni Pangulong Ferdinand “Bongbong” Marcos Jr., na ipagpapatuloy ng kaniyang administrasyon ang mga programa para sa mga kabataan, kababaihan at mga may karamdaman.

Sa kaniyang State of the Nation Address (SONA), sinabi ni PBBM na kaniyang palalawigin sa susunod na taon kabilang na dito ang programa kaugnay sa Anti-violence against Women and Their Childrens kasama na ang counseling para sa mga biktima ng pang-aabuso, at supplemental feeding program.

Bukod pa dito, tiniyak din ni PBBM ang pondong ilalaan para sa vulnerable sectors o may mga karamdaman at Persons With Disabilities (PWDs).

Aminado ang Pangulo na hindi parin nawawala ang banta ng COVID-19 lalo’t mayroong mga nadidiskubreng panibagong variants ng naturang virus pero hindi na umano kakayanin kung muling hihigpitan ang restriksiyon sa bansa.

Sa kabila nito, tiniyak ni Marcos na nakikipagtulungan na ang iba’t-ibang mga ahensya ng gobyerno sa pagmomonitor sa kaso ng Covid-19 para maiwasan ang pagsirit ng nakakahawang sakit.

Ipa-prayoridad ni Pangulong Ferdinand “Bongbong” Marcos Junior ang pagtatayo ng mga karagdagang ospital at health center.

Kabilang ito sa mga inilatag ni Pangulong Marcos sa kanyang kauna-unahang State of Nation Address (SONA), kahapon.

Ayon sa pangulo, kailangang palakasin ang Health Care System ng bansa sa gitna ng COVID-19 pandemic at iba pang nagbabadyang health crisis.

Hindi lamang anya dapat sa National Capital Region ilagay ang mga naglalakihang ospital kundi maging sa iba pang bahagi ng bansa.

Inilatag na ni Pangulong Ferdinand “Bongbong” Romualdez Marcos Junior ang kanyang mga plano para sa bansa sa kanyang kauna-unahang State of the Nation Address (SONA), kahapon.

Dakong alas-4:00 ng hapon nang magsimula ang SONA na tumagal ng isang oras at labing-apat na minuto at dinaluhan ng mahigit 1,300 katao sa Batasan Pambansa Complex sa Quezon City.

Ito ang kauna-unahang beses sa nakalipas na dalawang taon na nagdaos ng full in-person SONA sa kongreso.

Kabilang sa mga isinulong ni Pangulong Marcos na legislative agenda ang mga planong may kaugnayan sa ekonomiya, agrikultura, kalusugan at imprasatraktura.

Epektibo na ngayong araw ang ika-apat na sunod na linggong bawas-singil sa presyo ng produktong petrolyo.

Ayon sa kumpaniyang Pilipinas Shell, Petron, Seaoil Philippines, at Chevron Philippines o Caltex, P1.85 centavos ang magiging bawas-singil sa presyo ng kada litro ng diesel; P.40 centavos naman ang magiging tapyas sa kada litro ng gasolina; habang P1.30 centavos naman ang ibabawas sa kada litro ng kerosene.

Magpapatupad din ng kaparehong presyo ang kumpaniyang Petro Gazz, PTT Philippines, Phoenix Petroleum Philippines, at Cleanfuel maliban nalang sa kerosene na wala sila.

Nagsimula ang implementasyon sa ilang kumpaniya ng langis kaninang alas-6 ng umaga maliban nalang sa kumpaniyang Cleanfuel na magpapatupad mamayang alas-8 ng umaga at Caltex na nagpatupad naman kaninang alas-12 ng hatinggabi.

Ayon kay Department of Energy (DOE) Oil Industry Management Bureau Director Rino Abad, ang dahilan ng bawas singil sa presyo ng langis ay nakabatay sa anunsyo ng European Central Bank (ECB) hinggil sa pagtaas ng kanilang interes at trading price.

Inaasahan naman ng ahensya na magpapatuloy ang pagbaba ng presyo ng gasolina kung ang US Federal Reserve ay agresibong magtataas ng mga rate sa kanilang interes na maaaring magpabagal sa aktibidad ng ekonomiya o mas mababang demand na magpapababa sa presyo ng mga pangunahing bilihin.

Sa huling datos ng DOE nito lamang Hulyo a-19 hanggang a-21, ang year to date adjustments sa kada litro ng diesel ay maglalaro sa P73.30 centavos hanggang P81.41 centavos habang nasa P70.20 centavos hanggang P77.45 centavos naman sa kada litro ng gasolina.

Pumalo na sa 73,909 ang naitalang kaso ng dengue sa bansa mula Enero ngayong taon.

Ayon kay Health Officer-In-Charge Maria Rosario Vergeire, 18,699 dengue cases ang naitala mula June 12 hanggang July 9.

Pinakamaraming naitalang kaso sa Central Luzon, Cagayan Valley at Metro Manila.

Kaugnay nito, hinimok ng doh ang publiko na sundin ang “4s strategy” laban sa dengue o ang “search and destroy” sa mga mosquito-breeding site, “secure self-protection”, “seek early consultation”, at “support fogging or spraying” sa hotspot areas.

Sinisilip na ng Quezon City Police District (QCPD) ang mga posibleng security lapse ng Ateneo De Manila University matapos pagbabarilin ng isang lalaki sina dating Lamitan City Mayor Rosita Furigay at dalawang iba pa.

Ayon kay QCPD Director, Brig. Gen. Remus Medina, nakapagtatakang nakapagpuslit ng mga baril ang suspek na si Dr. Chao Tiao Yumul kahit pa may mga guwardya sa gate ng Ateneo.

Pag-aaralan din anya nila ang mga CCTV footage upang mas maging malinaw ang imbestigasyon at mapalakas ang kaso laban sa suspek.

Hindi pa matiyak ng MMDA kung papayagang makapagtayo ng mga entablado ang mga grupong magkikilos-protesta at suporta sa unang State of the Nation Address (SONA) ni Pangulong Bongbong Marcos.

Ayon kay MMDA Traffic Chief Bong Nebrija, ang Quezon City Local Government (QC LGU) ang magpapasya sa naturang issue.

Gayunman, mas maiging masolusyonan agad anya ang perwisyong idudulot sa daloy ng trapiko ng mga demonstrasyon, lalo sa Commonwealth Avenue.

Ipinunto ni Nebrija na hangga’t maaari ay hindi nila nais mabalam ang biyahe ng mga motorista, partikular ang mga dumaraan sa Commonwealth o iba pang kalsada sa paligid ng Batasan Pambansa.