HOT STORIES OF THE WEEK

Nanawagan sa Department of Education (DepEd) ang grupo ng mga guro na suspendihin muna ang in-school activities sa mga lugar na naapektuhan ng magnitude 7.0 na lindol.

Ayon kay Vladimer Quetua, Chairperson ng Alliance of Concerned Teachers, kailangang pagtuunan ng pansin ng DepEd, DPWH at LGUs ang mga naapektuhang paaralan lalo na’t nalalapit na ang pagbubukas ng face-to-face classes.

Ang mga gawaing dapat munang isantabi ay ang physical enrollment at remedial classes.

Una rito, sinabi ni DepEd Spokesperson Michael Poa na ilang paaralan sa Abra ang nakitaan ng bitak matapos tamaan ng lindol.

Wala namang naitalang casualties ang DepEd sa kanilang mga guro, mag-aaral at staff nang maganap ang pagyanig

Balik-Abra si DSWD Secretary Erwin Tulfo upang ipagpatuloy ang pamamahagi ng tulong sa mga pinaka-apektadong residente ng malakas na lindol sa Abra.

Ayon kay Secretary Tulfo, pinaka-malubhang nakaranas ng pagyanig ang bayan ng laganilang na sentro ng lindol, bukod pa sa ilang lugar na isolated.

Babalikan anya nila ngayong araw ang mga nasabing lugar upang matiyak na mahahatiran ng tulong ang mga residenteng nawalan ng tirahan.

Samantala, bukod sa mga food supplies, mamamahagi rin ang kagawaran ng mga temporary shelters para sa mga biktima ng kalamidad.

Magsasagawa ng damage assessment ngayong araw ang local government ng Vigan City sa Ilocos Sur matapos maapektuhan ng magnitude 7 na lindol ang lalawigan, kahapon.

Ayon kay Mayor Jose “Bonito” Singson, partikular nilang aalamin kung gaano kalaki ang pinsala ng lindol sa mga lumang gusali, tulad ng mga simbahan, lalo’t nagpapatuloy ang mga aftershock.

Samantala, nagpapasaklolo naman si Singson sa national government maging sa mga engineer at architect para sa rehabilitasyon ng mga nawasak na historical building.

Mahalaga anya ang mga nasabing gusali sa sektor ng turismo na isa sa mga pangunahing revenue source ng lungsod.

Nananatili sa apat ang patay habang 109 ang sugatan matapos ang magnitude 7 na lindol na tumama sa lalawigan ng Abra at iba pang bahagi ng Luzon.

Dalawa sa mga nasawi ay mula sa La Trinidad at Tuba, Benguet habang tig-isa sa mga bayan ng Balbalan, Kalinga; Bangued, Abra.

Inihayag ni National Disaster Risk Reduction and Management Council Spokesman Mark Timbal na pawang residente ng Cordillera Administrative Region ang mga nasugatan habang pito mula sa Region 1.

Batay naman anya sa datos ng Department of Education, nasa 60 paaralan ang nasira o bahagyang napinsala sa Regions 1, 2, 3 at CAR.

Ibinabala ng PHIVOLCS ang karagdagang pinsala sa Abra at iba pang bahagi ng Luzon matapos ang magnitude 7 na lindol.

Ito, ayon kay DOST Undersecretary at PHIVOLCS OIC Renato Solidum, ay dahil sa aftershocks na maaaring magdulot ng karagdagang pinsala, partikular sa epicenter ng pagyanig sa bayan ng Tayum, Abra.

Malakas anya ang nasabing pagyanig at kung ang mga bahay ay may sira at hindi pa tuluyang tumumba ay maaari pa itong mapinsala ng mga aftershock.

Dapat din anyang ma-inspeksyon muna ng mga engineer ang lahat ng mga istruktura upang mabatid kung may mga pinsala, tulad ng bitak sa pader dahil peligroso ang mga aftershock.

Kailangan ding isaayos ang mga bahay o gusaling nasira at kung talagang hindi na kakayanin at ma-condemn ay magpatayo na lang ng bago.

Bukod dito, namemeligro rin ang mga lugar na naapektuhan ng landslides at mga bitak dahil sa paglambot ng lupa.

Asahan pa ang mga panaka-nakang aftershocks sa mga lugar na malapit sa epicenter ng magnitude 7 na lindol.

Partikular na tinukoy ng PHILVOLCS ang bayan ng Tayum na sentro ng pagyanig na “tectonic” ang origin.

Ayon kay DOST Undersecretary at PHIVOLCS OIC Renato Solidum, posibleng tumagal ng dalawa hanggang tatlong araw ang mga aftershocks.

Ito, anya, ay dahil itinuturing na “major earthquake” ang malakas na pagyanig kahapon.

Samantala, nilinaw ni Solidum na hindi tsunami ang naranasan sa bahagi ng La Union at Ilocos Sur.

Maraming residente ng Bangued, Abra ang mas piniling magpalipas ng gabi sa labas ng kanilang bahay matapos ang magnitude 7 na lindol na tumama sa lalawigan at ilang bahagi ng Luzon.

Tinatayang 200 katao ang pansamantalang tumutuloy sa plaza dahil sa takot sa aftershocks.

Ayon kay Mayor Mila Valera, natatakot ang mga residente na magbalikan sa kanilang mga bahay na pawang nagtamo ng mga pinsala at maaaring magdulot ng peligro.

Nasira rin anya ang mga kalsada, tatlong tulay, walong government facilities, pitong commercial buildings habang tatlong bahay ang totally damaged at 36 ang bahagyang napinsala.

Nananawagan naman si Valera sa kanyang mga constituent na bakantehin ang lahat ng establisyimento at ipinag-utos din ang pagsasara ng lahat ng kalsadang patungo sa sentro ng bayan maging ang pag-control sa supply ng krudo.

Ito’y dahil nagsimula nang mag-hoard ng pagkain at nagpa-panic buying ang mga tao.

Samantala, nagtayo na ang local government 25 modular tents upang magsilbing temporary shelter ng mga evacuee.

Suportado ni Pangulong Bongbong Marcos ang panukalang batas na lilikha sa Department of Disaster Resilience matapos ang malakas na lindol na tumama sa Northern Luzon, kahapon.

Ayon kay Pangulong Marcos, higit na kailangan ng bansa ang isang ahensya na tututok sa mga peligrong hatid ng mga lindol, bagyo at climate change lalo’t kabilang ang Pilipinas sa mga madalas tamaan ng natural disasters.

Kamakailan ay muling inihain ni Senator Bong Go ang panukalang magtatag ng Department of Disaster Resilience na layuning ihanda o mapanatiling ligtas ang mga komunidad laban sa mga kalamidad tulad ng bagyo.

Walang naitalang structural damage sa kamara matapos ang magnitude 7 na lindol kahapon ng umaga.

Sa pahayag ni Deputy Secretary-General Engr. Floro Banaybanay, walang nasirang ari-arian sa loob ng Batasang Pambansa.

Agad namang bumuo ng walong Quick Response Team ang kamara matapos ang nasabing lindol para malaman ang kabuuang pinsala sa mga gusali ng mababang kapulungan.

Ayon kay Banaybanay, superficial cracks lamang ang naitala at walang malakihang pinsala sa mga building.

Matatandaang kamakailan lamang, nagsagawa rin ng renovation sa plenaryo bilang kahanadaan noong SONA ni Pangulong Bongbong Marcos.

Nananawagan sa publiko ang National Disaster Risk Reduction and Management Council (NDRRMC) na manatiling nakaalerto at maging ligtas kasunod ng magnitude 7 na lindol sa Abra.

Ayon kay NDRRMC Chairperson at Defense Officer-In-Charge, Senior Undersecretary Jose Faustino Jr., pinag-aaralan na ng kanilang ahensya ang assessment hinggil sa lawak ng pinasalang idinulot ng lindol.

Samantala sa naging panayam naman ng DWIZ, sinabi ni NDRRMC Spokesperson Mark Timbal, na patuloy ang pagpasok ng mga impormasyon mula sa mga lugar na naapektuhan ng lindol partikular na sa pinsala sa agrikultura, imprastraktura, mga insidente ng landslide gayundin sa pagtaya ng mga nasawi at nasugatan.

Sinabi ni Timbal na sa ngayon, nagsanib-pwersa na ang Armed Forces of the Philippines, Philippine National Police, Philippine Coast Guard at Bureau of Fire Protection para sa search, rescue and retrival operations at road clearing operation sa mga naapektuhan ng pagyanig.

Bukod pa dito, patuloy ding nagsasagawa ng aerial inspections ang mga tauhan ng Philippine Air Force para makita ang lawak ng pinsala sa mga apektadong lugar.