HEALTH

Maraming Pilipino ang nakararanas ng singaw, isang masakit na maliit na ulcer sa loob ng bibig.

Bagama’t karaniwang naghihilom ito nang mag-isa, may ilang home remedy na maaaring makatulong upang mapaaga ang pag-galing at pagbawas ng kirot nito.

Kabilang na rito ang salt water rinse, na nakatutulong sa pag-disinfect at pagpapaalis ng pamamaga.

Marami ring gumagamit ng honey at coconut oil dahil sa kanilang natural na anti-inflammatory at antimicrobial na katangian.

Samantala, ang paggamit ng chamomile tea bag bilang compress at ice cubes ay maaaring magbigay ng panandaliang ginhawa.

Ngunit, paalala ng mga eksperto, kung paulit-ulit at malala ang singaw, mabuti pa ring kumonsulta sa dentista o doktor para sa wastong paggabay at posibleng reseta.

Iba-iba ang karanasan ng pagtulog sa gabi; minsan mahimbing, ngunit sa masaklap nito, mayroon ding mga pagkakataon na hindi quality sleep ang nararanasan kahit kumpleto sa oras.

At minsan, hindi solusyon ang mas mahabang tulog para lang makabawi, lalo na kapag kinakailangang mag-trabaho kaagad; kaya may mga payo ang ilang sleep experts para maitawid ang araw kahit pangit ang tulog kagabi.

Una na diyan ang kape, lalo na kung sapat ang dami at ininom ito sa tamang oras.

Mainam din na magkaroon ng balanced diet at iwasang dumepende sa mga matatamis na pagkain, maliban na lang sa prutas, upang maiwasan ang “sugar crash.”

Maganda rin kung makakapag-break ang taong may pangit na tulog upang makatulong na manatiling gising at alerto sa buong araw; kabilang na rito ang paglalakad sa labas, low-intensity exercise, at mga power nap sa buong araw.

Sa huli, mas mabuti pa ring gawing simple ang buong araw, iwasang mag-maneho, at panatilihin pa rin ang sleep schedule at limitahan sa dalawang oras ang dagdag na panahon para sa pagtulog sa gabi para makabawi sa susunod na araw.

May iba’t ibang benepisyo sa kalusugan ang pag-inom ng lemon water

Una, makakatulong ito na pasiglahin ang produksyon ng digestive juices, na maaaring makatulong bilang panunaw at maibsan ang pagiging bloated at paninigas ng dumi.

Napapalakas din ng lemon water ang immunity dahil sa yaman nito sa vitamin C, na mahalaga sa pagsuporta sa isang malusog na immune system, at maaari rin makatulong sa pagpapaganda ng balat.

Binabawasan din ng lemon water ang pamamaga sa katawan na nauugnay sa iba’t ibang mga malalang sakit dahil sa taglay nitong anti-inflammatory properties.

Gayunpaman, mahalagang tandaan na ang pag-inom ng lemon water ay hindi dapat maging kapalit para sa anumang gamot o balance diet.

Sikat na sikat talaga ang slimming pills sa mga gustong magpapayat dahil tumutulong ito sa pagbaba ng timbang sa pamamagitan ng pagpigil sa gutom o pagpaparamdam na ikaw ay busog na agad.

Pero, marami ring kontrobersya ang bumabalot sa pag-inom nito.

May ilang produkto na ring inalis sa merkado matapos magdulot ng malubhang problema sa kalusugan, tulad ng kaso ng pulmonary hypertension, pagkasira ng heart valves, at ang malala pa ay umaabot sa kamatayan.

Kaya naman, pinag-iingat ng Food and Drug Administration ang pagbili ng mga produktong nangangako ng mabilis at madaling pagbaba ng timbang, lalo na ang mga nabibili over-the-counter, dahil hindi ito kinokontrol ng FDA.

Anila, hindi gumagana ang karamihan sa mga produktong ito at maaaring maging mapanganib.

Paliwanag pa ng FDA, hindi isang magic bullet para sa pagbaba ng timbang ang mga slimming pills na inaprubahan nila. Hindi rin ito gagana para sa lahat, at may mga side effects din at kaakibat na panganib.

Kaya naman dapat timbangin ang mabuti at masamang epekto ng pag-inom nito at kumonsulta sa doktor kung tama para sa iyong kondisyon at kalusugan ang mga slimming pills.

Maraming tao ang bumibili ng protein shake pero hindi nila lubos na alam kung ano ang benepisyo nito.

Ang protein shake ay isang madaling paraan upang madagdagan ang pagkonsumo ng protina sa katawan, na maaaring maging kapaki-pakinabang para sa mga gustong magdagdag ng muscle o magbawas ng timbang.

Para sa weight loss, ang pagkonsumo ng protein shake, sa halip na regular food, ay maaaring makatulong na mapababa ang pang-araw-araw na calorie intake.

Habang para naman sa mga atleta at mga mahilig pumunta sa gym, ang pag-inom ng protein shake ay makakatulong sa paglaki ng kalamnan pagkatapos ng kanilang muscle training.

Alam niyo na ba na may mga paraan para maiwasan ang polycystic ovary syndrome (PCOS), na isang kondisyon na nakakaapekto sa hormones, metabolismo, at reproductive health ng kababaihan.

Ayon sa mga eksperto, ilan sa mga hakbang ay panatilihin ang tamang timbang dahil ang overweight o mabilis na pagtaas ng timbang ay maaaring magpalala ng insulin resistance, na konektado sa PCOS.

Kumain ng high-fiber foods tulad ng gulay, prutas, at whole grains, at lean proteins gaya ng isda, manok, tofu, at itlog.

Mag-ehersisyo ng tatlo hanggang limang beses kada linggo, tulad ng brisk walking, jogging, swimming, o strength training, dahil nakakatulong ito sa blood sugar control, hormone balance, at pagpapababa ng stress.

Subaybayan din ang blood sugar, cholesterol, at hormone levels. Ang maagang detection ng imbalances ay nakakatulong sa prevention at management ng PCOS.

At higit sa lahat po, gumamit ng mindfulness, meditation, yoga, o deep breathing exercises upang mabawasan ang stress, na nakakaapekto sa hormones at menstrual cycle.

Sa pamamagitan ng pagsunod sa mga healthy habits na ito, mas mapapabuti ng kababaihan ang kanilang kalusugan at mababawasan ang panganib o epekto ng PCOS.

Karamihan sa mga namamanata sa Poong Jesus Nazareno ay mga nakayapak; at sa pag-uwi ng mga deboto, kung hindi nasugatan ang kanilang mga paa, sobra naman itong marumi matapos ang ilang oras ng paglalakad.

Kaya ang tanong: Paano lilinisin ang mga paa na punong-puno ng putik, dumi, at kung ano-ano pa matapos ang napakahabang Traslacion ngayong taon?

Isa sa mga pinakamadaling paraan ay ang ilubog ito sa magkahalong mainit at maligamgam na tubig sa isang maliit na batya habang nakaupo; sa gayon, hindi lamang malilinis ang paa, makakapag-relax din ito mula sa mahabang lakaran.

Maaari rin namang haluan ng suka ang tubig sa loob ng labinlimang minuto upang maiwasan ang pangangamoy ng paa.

Matapos ang unang banlaw, doon pa lamang puwedeng lagyan ng sabon ang paa, at mainam na maligamgam na tubig pa rin ang gamitin sa pagbabanlaw.

Ngayong amihan season, nagsisimula ring tumaas ang mga karaniwang sakit na dulot ng malamig na panahon, na nagpapalakas ng ilang virus at nagpapataas ng panganib ng hawaan ng mga sakit.

Kabilang dito ang sipon at trangkaso na maiiwasan sa pamamagitan ng paghuhugas ng kamay, pagpapabakuna laban sa flu, pagkain ng prutas na mayaman sa vitamin C upang mapalakas ang immune system at maiwasan ang mga sakit.

Isa pang karaniwang sakit tuwing taglamig ay ang sore throat o pamamaga ng lalamunan, na maaaring maremedyuhan sa pamamagitan ng paghinga gamit ang ilong at pagsusuot ng scarf upang hindi malamigan ang lalamunan.

Nagiging sanhi rin ng pananakit ng mga kasu-kasuan ang malamig na panahon, lalo na sa mga may arthritis, dahil sa pagbabago ng barometric pressure… Upang maibsan ang pananakit, maglagay ng hot compress sa apektadong bahagi at magsuot ng gloves at medyas upang mapanatili ang init ng katawan.

Panghuli, ang malamig na hangin ay nagdudulot ng dry skin na nagiging sanhi ng pangangati at pagbabalat ng balat… Upang mapanatili ang kalusugan ng balat, mahalaga ang paggamit ng moisturizer at pagsusuot ng tamang damit panlamig upang mapanatili ang moisture sa balat.

 Alam mo ba na ang sitaw o string beans ay punong-puno ng vitamins at minerals.

Ayon sa mga eksperto, mayroong mataas na fiber content ang sitaw kaya nakakapagbigay ito ng protein sa katawan.

Nakakatulong din ang pagkain ng sitaw upang makaiwas sa mga sakit tulad ng komplikasyon sa puso at diabetes.

Bukod dito, isa rin ang sitaw na maituturing na pampatibay ng buto dahil sa taglay nitong vitamin K.

Bagamat ang sitaw ay maraming nutrisyong taglay, hindi ito alternatibong gamot sa anumang uri ng sakit.—Sa panulat ni John Riz Calata

Nagpaalala ang Department of Health sa publiko sa tamang first aid sakaling maputukan ngayong holiday season.

Ayon sa DOH, kailangang hugasan agad ang makukuhang sugat mula sa paputok gamit ang sabon at malinis na tubig, at takpan ng malinis na tela o gasa.

Kapag mata naman ang natamaan ng paputok, agad itong padaluyan ng malinis at maligamgam na tubig, iwasang kamutin o galawin, at takpan ng malinis na tela o gasa.

Agad ding dalhin ang biktima sa pinakamalapit na health center o ospital para sa tamang gamutan at bakuna kontra tetano.

Paalala pa ng DOH, mahalaga ang mabilis at tamang aksyon sa oras ng aksidente ngayong ipinagdiriwang ang mahabang holiday season upang makaiwas sa malubhang pinsala.

Muli ring hinikayat ng ahensya ang publiko na umiwas sa paggamit ng paputok at piliin ang ligtas na pagsalubong sa bagong taon kasama ang pamilya.