HEADLINES

Pinag-aaralan ng defense team ni Vice President Sara Duterte ang posibilidad na dumulog sa Korte Suprema upang kuwestiyunin ang desisyon ng Senate Impeachment Court na nagpapahintulot sa pagkuha ng ilang financial at government records.

Ito’y matapos aprubahan ng impeachment court ang kahilingan ng House Prosecution Panel na maglabas ng subpoena para sa mga records mula sa mga bangko na may kaugnayan kay Vice President Duterte, sa asawa nitong si Atty. Manases Carpio, sa kanilang law firm, at sa 19 na kumpanya.

Ayon kay Defense Spokesperson Attorney Michael Poa, wala pa rin silang pasya kung iaakyat nila sa Korte Suprema ang usapin.

Layunin ng prosecution na makakuha ng mga dokumento bilang bahagi ng pagpapatunay sa paratang ng hindi maipaliwanag na yaman na nakasaad sa ikalawang artikulo ng impeachment complaint.

Nauna nang tinutulan ng depensa ang kahilingan, dahil anila’y sobrang lawak ng saklaw ng mga subpoena at maaaring labag sa karapatan ng Pangalawang Pangulo sa privacy at due process.

Gayunman, sinabi ni Poa na iginagalang nila ang pasya ng impeachment court, habang nananatili ang kanilang paniniwalang may matibay silang legal na batayan upang tutulan ito at nakabukas pa rin ang mga legal na remedyo sa ilalim ng batas. | via Jenn Patrolla/DWIZ Patrol

Hindi muna pagpapasyahan ni Senate Impeachment Court Presiding Officer Chiz Escudero ang kahilingan ni Senador Rodante Marcoleta na makaboto sa impeachment trial.

Ayon kay Presiding Officer Escudero, natanggap na niya ang letter of manifestation ni Senator Marcoleta, kung saan hinihiling nito na makalahok sa pagboto sa mga usapin sa impeachment trial.

Ipinunto ng senador ang naging patakaran noong impeachment trial ni dating Pangulong Joseph Estrada, na nagbigay ng kapangyarihan sa Senate President na magtakda ng mekanismo upang makaboto ang isang senador sa mga usapin ng paglilitis.

Dagdag pa ni Escudero, hindi siya ang magpapasya sa usapin at ipinapasa niya ito sa Senado bilang legislative body.

Anuman aniya ang maging desisyon ng Senado ay iaangkop o ia-adopt din ng impeachment court.

Pero sa kanyang personal na pananaw, sinabi ni Escudero na pabor siya sa kahilingan ni Marcoleta, basta’t walang umiiral na suspension order laban sa senador. | via Jenn Patrolla/DWIZ Patrol

Nilinaw ng kampo ni dating House Speaker at Leyte Rep. Martin Romualdez na wala pa umanong kasong naisampa laban sa mambabatas sa Sandiganbayan at hindi pa ito nahahatulan ng anumang paglabag.

Ayon kay Atty. Elaine Atienza, ang tagapagsalita ni Romualdez, ang inanunsyo ng Office of the Ombudsman ay ang pagsisimula pa lamang ng preliminary investigation, kung saan bibigyan pa ng pagkakataon ang mga respondent na sagutin ang mga alegasyon laban sa kanila.

Iginiit ni Atienza, na wala pang kasong kriminal ang naisampa kay Romualdez at hindi pa rin umano natatanggap ng kongresista ang kopya ng reklamo.

Tiniyak ni Atienza na sasagutin ni Romualdez ang naturang isyu sakaling matanggap na ng kanilang kampo ang naturang reklamo.

Sa kabila nito, iginagalang aniya ng kampo ng kongresista ang lahat ng legal na proseso at nananatili silang kumpiyansa na malilinis ni Romualdez ang kanyang pangalan kapag nasuri nang maigi ang mga ebidensya tungo sa katotohanan.

Mariin din nilang itinanggi ang paratang na umiiwas si Romualdez sa proseso ng batas, at iginiit na nasa Pilipinas at hindi kailanman nagtago ang kongresista.

Nilinaw ni Atienza, na handang humarap sa Ombudsman si Romualdez hanggang sa malinis ang kanyang pangalan. | via Geli Mendez/DWIZ Patrol

Bumuo na ang House of Representatives ng tatlumpung miyembro ng medical team para tiyakin ang kaligtasan at agarang pagtugon sa anumang medical emergency para sa nalalapit na ika-limang State of the Nation Address o SONA 2026 ni Pangulong Ferdinand Marcos Jr. na gaganapin sa Hulyo 27.

Ayon kay House Medical and Dental Service Head Dr. Jose Luis Bautista, nakahanda na rin ang mga ambulansya at nakipag-ugnayan na rin sila sa mga kalapit na ospital upang matiyak ang mabilis na pagresponde kung kinakailangan.

Ayon kay Bautista, bawat limang medical personnel ay itatalaga sa mga first-aid station na nakapuwesto sa mga strategic place sa loob at paligid ng Batasan Complex.

Makakatulong din sa emergency operations ang mga responder mula sa Department of Health, local government units, Bureau of Fire Protection, Philippine National Police, at iba pang kaukulang ahensya.

Inilunsad rin ang “Diwang Yakap” initiative na mangangasiwa sa paglalagay ng mga wheelchair para sa mga senior citizen, persons with disabilities, at iba pang bisitang mangangailangan ng tulong sa loob ng Kamara. | via Geli Mendez/DWIZ Patrol

BINIGYANG DIIN ni House Public Prosecutor Chel Diokno, na magkaiba ang “search warrant” sa “subpoena” na hinihiling ng House Prosecution Panel sa Senate Impeachment Court para sa tax at bank records ni Vice President Sara Duterte.

Sagot ito ni Diokno sa gitna ng pagtatanong ni Senator-Judge Pia Cayetano sa impeachment trial matapos ihalimbawa ang kaso ng Stonehill vs. Diokno kung saan, nagkaroon ng paglabag sa umiiral na batas dahilan kaya nag-isyu ng “search warrant” upang makita ang mga books of accounts, financial records, vouchers, receipts, ledgers, at iba pang records sa business transactions ng American businessman na si Harry Stonehill.

Ayon kay Diokno, malayo at magkaiba ang konteksto ng subpoena sa impeachment trial ni VP Sara sa inihain na “search warrant” na main issue ng Stonehill vs. Diokno.

Paliwanag ni Diokno, sa search warrant ang governing law ay nakapaloob sa Bill of Rights dahil ito ay maituturing na “invasive.”

Aniya, kapag ang isang judge ay nag-isyu ng search warrant, maaaring pasukin ang opisina o bahay ng isang respondent at halungkatin ang lahat ng kagamitan nito.

Ang mga ebidensyang nakukuha sa search warrant ay diretsong ibinibigay sa Korte Suprema na ikinukunsidera bilang ebidensya sa paglilitis.

Habang hindi naman itinuturing bilang ebidensya ang mga records na ipapa-subpoena ng hukuman.

Dadalhin lamang aniya ito sa Korte Suprema para pagdesisyunan at tukuyin ng magkabilang panig kung alin sa mga dokumento ang may bigat sa kaso.

Iginiit ni Diokno, na ang hinihiling na subpoena ng prosecution ay hindi isang lisensya o pahintulot para pasukin ang isang opisina o bahay kundi hinihiling lamang ang ilang dokumentong nakasulat o nakapaloob sa subpoena.

Para kay Diokno, hindi malalaman kung may “unexplained wealth” nga ba batay sa alegasyon kung hindi mabubuksan ang mga bank records at kung hindi mailalatag ang AMLC at BIR records ni VP Sara. | Geli Mendez/DWIZ Patrol