HEADLINES

Dinagsa ng publiko nitong unang Sabado mula nang ipatupad ang alert level 4 sa Metro Manila ang mga malls at kainan.

Mababatid na pagbukas pa lamang ng isang mall sa Pasay City bandang alas-10 ng umaga ay agad nang nagsipasukan ang mga customer.

Habang napuno naman ang mga kainan sa isa mall sa Quezon City.

Kasunod nito, tiniyak ng mga awtoridad sa malls na ito na mahigpit pa ring nasusunod ang umiiral na restriksyon ng Inter-Agency Task Force (IATF) para maiwasan ang hawaan ng COVID-19.

Magugunitang, nitong pinairal ang alert level 4 system sa Metro Manila ay tanging 10% lamang ng mga fully vaccinated individuals ang pinapayagang seating capacity sa mga indoor dining; at 30% naman sa mga outdoor dining.

Naharang ng mga awtoridad sa Bureau of Customs (BOC) ang nasa 809 na piraso ng mga spiderlings at 17 na piraso ng mga adult spiders sa Central Mail Exchange Center sa lungsod ng Pasay.

Ayon sa BOC, nakalagay ang naturang kargamento sa tatlong postal parcels.

Mababatid na galing Poland ang mga kargamento at ipadadala sa mga residente ng lungsod ng Pasay, Parañaque at lalawigan ng Batangas.

Nang buksan ng mga awtoridad ang kargamento, nakabalot anila ang mga gagamba sa maliliit na plastic vials.

Kasunod nito, agad na itinurn-over ng BOC ang nakumpiskang mga gagamba sa Wildlife Traffic Monitoring Unit ng Environment Department.

Inihirit ni dating senador Bongbong Marcos sa pamahalaan na isama sa Special Risk Allowance (SRA), hazard pay at iba pang mga benepisyo ang mga non-medical frontline staffs na nagtatrabaho rin sa mga ospital at quarantine facilities sa bansa.

Sa isang pahayag, sinabi ni Marcos na ‘sana all’ ay mabiyayaan ng mga benepisyong nararapat para sa kanila.

Paliwanag ng dating senador na ito’y dahil pare-pareho namang sinusuong ng mga medical at non-medical frontliners ang banta ng virus.

Sa huli, iginiit pa ni Marcos na nakalulungkot lang isipin na kinakailangan pang humantong sa pag-aaklas ng mga frontliners para lamang mabigyang katugunan ang kanilang kahilingan.

Isinapubliko na ng Philippine Postal Corporation (PhlPost) ang commemorative stamps nito na tampok ang mga atletang Pinoy na nagwagi at nag-uwi ng karangalan sa bansa sa 2020 Tokyo Olympics.

Sa abiso PhlPost, ginawa ang unveiling ng stamps sa punong tanggapan nito o ang Manila Central Post Office Building.

Kabilang sa mga atletang tampok dito ay sina Gold Medalist Weightlifter Hidilyn Diaz, Silver Medalist Boxer Carlo Paalam, at Nesthy Petecio, maging ang Bronze Medalist ng boxing na si Eumir Marcial.

Paliwanag ni Postmaster General at ceo Norman Fulgencio, ipinakita sa naturang stamps ang aniya’y winning moment ng bawat atleta.

Nasamsam ng mga awtoridad ang nasa halos P193-M halaga ng marijuana ang binunot at pinagsusunog sa Kalinga.

Ito’y sa pamamagitan ng pinag sanib pwersa ng mga operatiba ng Philippine National Police (PNP) at ng Philippine Drug Enforcement Agency (PDEA).

Tinatayang nasa 795,000 na mga fully grown marijuana plants ang nakuna ng mga operatiba sa 18 plantation sites.

Mababatid na sa dami ng mga ito ay sinimulan ang operasyon noong Miyerkules at nagtapos lamang nitong Biyernes.

Nanawagan ang ilang contractual airport employees sa pamahalaan na tulungan sila hinggil sa problemang kanilang kinakaharap.

Ito ay dahil sa inilabas na  observation memorandum ng commission on audit o COA noong Enero kung saan ang mga tauhan ng LSERV corporation ay inaatasang ibalik ang hazard pay na ibinigay ng airport authority na nagkakahalaga ng ₱54.36-M para sa contract service workers sa implementasyon ng hard lockdown.

Ayon sa COA, tanging “qualified government personnel” ang dapat sakop ng hazard pay.

Mister president kung kami po’y inyong naririnig, kami po ay humihingi ng tulong sa inyo sir parang awa nyo na sir. Napakababa na ng pinapasahod sa amin, kakaltasan pa kami ng hazard.

Ayon pa sa hindi nagpakilalang tauhan ng manila international airport authority, mabigat sa kanila ang kabawasang P1,500 kada buwan.

Maliit lang din aniya kung tutuusin ang kanilang sweldo at kung babawasan pa ay wala na halos matitira para sa kanilang pamilya.

Sir ang laking epekto epekto sa amin nito sir, halos lahat po kami. Maliit lang po yung sinasahod namin sir. Lahat po kami eh nakapag-loan na sa sss at pag-ibig. Mas lalo po walang matitira sa amin Sir–-

sa panulat ni Hyacinth Ludivico

Nakaamba ang panibagong pagtataas sa presyo ng mga produktong petrolyo sa susunod na linggo.

Ayon sa mga taga-industriya, ang presyo ng kada litro ng diesel ay tataas ng P0.75 hanggang P0.85 , habang ang gasolina ay may dagdag-presyo na P0.80 hanggang P0.90 centavos kada litro.

Tataas rin ng P0.75 hanggang  P0.85 ang kada litro ng kerosene.

Ito na ang ika-apat na sunod na linggong nagkaroon ng taas-presyo sa produktong petrolyo.—sa panulat ni Hyacinth Ludivico

Umakyat na sa 2,347,550 ang kabuuang bilang ng naitatalang kaso ng COVID-19 sa bansa matapos iulat ng Department of Health na may 23,134 panibagong kaso ng COVID-19 kahapon.

Nadagdagan din ang bilang ng mga nasawi sa nasabing sakit matapos kumpirmahin ng DOH na may 255 na nasawi sa sakit.

Dahil dito, umakyat na sa 36,583 ang kabuuang bilang ng mga nasawi sa COVID-19 sa bansa.

Pumalo naman sa 184,088 ang bilang ng aktibong kaso ng COVID-19 sa bansa habang umabot naman sa 2,126,870 ang total recoveries matapos itong madagdagan ng 27,024.—sa panulat ni Hyacinth Ludivico

Magpapatupad ang Bureau  of Immigration o BI ng “temporary travel ban” ng mga pasahero na magmumula sa Grenada, Papua New Guinea, Serbia, at Slovenia simula bukas, Setyembre 19.

Ayon kay BI commissioner Jaime Morente, alinsunod ito sa resolusyon mula sa Inter-Agency Task Force for the Management of Emerging Infectious Diseases o IATF.

Aniya ang mga pasahero na nagmula o nasa mga nasabing bansa sa loob ng huling 14 na araw, bago ang kanilang pagdating sa Pilipinas, ay pansamantalang hindi papapasukin sa bansa.

Epektibo ang nasabing travel ban hanggang Setyembre 30, 2021.–-sa panulat ni Hyacinth Ludivico

Inilagay ng Department of Health sa alert level 4 status ang apat na lugar sa Western Visayas.

Kabilang sa mga lugar na ito ang Iloilo City, Bacolod City, Iloilo Province, at maliit na isla ng Guimaras.

Sa datos ng DOH, pinagbasehan dito ang daily new ng COVID-19 cases sa bawat 100,000 ng kanilang populasyon.

Nabatid din na ang mga Intensive Care Unit o ICU rate ng ospital ay nasa mahigit 70% na.—sa panulat ni Hyacinth Ludivico