HEADLINES

Sumakabilang buhay na si dating DSWD Secretary Dinky Soliman.

Ayon kay Atty. Hector Soliman, asawa ng kalihim kaninang pasado ala-7 ng umaga pumanaw ang may bahay niya dahil sa kumplikasyon sa renal at heart failure.

Ang 68 taong gulang na dating DSWD Secretary ay nagka COVID nuong isang buwan gayundin ang asawa at ilang miyembro ng kanilang pamilya subalit naka survive ito.

Sinabi ni Atty. Soliman na kaagad nilang iaanunsyo ang mga detalye ng burol at libing ng dating DSWD Secretary.

Suportado ni Senador Panfilo Lacson si Senate Blue Ribbon Committee Chair Richard Gordon sa pangunguna sa imbestigasyon hinggil sa umano’y overpriced medical supplies.

Sinabi sa DWIZ ni Lacson na ginagawa lamang ni Gordon at iba pang senador ang kanilang trabaho.

Makatuwiran lamang din aniya ang pagsagot ni Gordon sa mga personal na batikos dito sa pagpapatakbo ng pagdinig ng Blue Ribbon Committee

Gayunman, binigyang diin ni Lacson na hindi naman sila dapat makisali sa palitan ng salita nina Gordon at Pangulong Rodrigo Duterte. —sa ulat ni Cely Ortega Bueno (Patrol 19)

Pinaiimbestigahan ng Health Department sa National Bureau of Investigation (NBI) kaugnay ng iligal na pagbebenta ng COVID-19 drug na Tocilizumab.

Ito’y matapos arestuhin ang apat na indibidwal na sinasabing supplier ng naturang gamot.

Sinabi ni Health Sec. Francisco Duque, III na maaaring peke at counterfeit ang Tocilizumab na ibinebenta sa black market dahil nagkakaubusan na ang suplay ng gamot sa buong mundo.

Nabatid na nasa P25,000 ang bawat bote ngunit ibinebenta ito sa labas ng mahigit P80,000.

Samantala, patuloy na nakikipag-ugnayan ang Department of Health sa Switzerland kung saan ginagawa ang naturang gamot.

Humingi ng tulong ang Department Labor and Employment (DOLE) sa National Bureau of Investigation (NBI) sa umano’y katiwalian sa pondo ng tulong panghanap-buhay sa ating disadvantaged/displaced workers o tupad program ng pamahalaan.

Sinabi ni Labor Sec. Silvestre Bello, III, pansamantalang sinuspindi ang naturang programa sa ilang distrito sa Quezon City para hindi mabahiran ng dumi ang buong programa.

Naglalagay umano ng mga coordinatiors ang mga baragay at hinahati ang 5,730 pesos na sahod sana ng mga trabahador.

Napupunta ang P1,000 sa mga nagpapanggap na mangagagawa, habang ang mahigit P4,000 naman ay pinaghahatian ng coordinator at iba pang kasabwat.

Maliban dito, nauubos ang pondo ng wala namang nagagawang trabaho.

Aniya, posibleng kasuhan ang mga nasa likod ng nasabing korapsiyon kapag napatunayan at nakumpleto ang isinasagawang imbestigasyon.

Posibleng isama na ng Commission on Higher Education (CHED) ang kursong Doctor of Veterinary Medicine sa mga posibleng pabalikin sa face to face classes.

Ito’y kasunod ng binuong draft guidelines technical working group for veterinary medicine na siyang magsusumite sa komisyon para magbalik eskwela.

Ipinabatid naman ni CHED Executive Director Atty. Cenderilla Filipina Benitez-Jaro, na  ihahain nila sa komisyon ang naturang guidelines bago ito dalhin sa Inter-Agency Task Force for the Management of Emerging Infectious Diseases  (IATF) at Palasyo.

Unang inaprubahan ng Malakanyang IATF at komisyon ang balik eskwela ngunit hindi kasama sa listahan nas inilabas ng CHED ang naturang kurso sa papayagan sa face to face classes.

Kaya’t umapela sa komisyon ang University of the Philippines College of Veterinary Medicine Student Council para payagan na ang face to face classes sa mga magiging beterinaryo ng bayan.

Inilunsad na ng Department of Transportation (DOTr) at ng Land Transportation Franchising and Regulatory Board (LTFRB) ang monitoring system kung saan magsusubaybay sa mga biyahe at paglabag ng Public Utility Vehicles (PUVs).

Ayon kay LTFRB Chairman Martin Delgra iii, maituturing itong milestone dahil ito ang kauna-unahang proyekto kung saan gumagamit na  ng panibago at modernong teknolohiya para ma-monitor ng maayos ang mga enforcement activities sa bansa.

Sa tulong ng GPS, matutukoy ng LTFRB command center ang posibleng paglabag sa trapiko ng mga PUV.

Ipinabatid pa ni DOTr Secretary Arthur P. Tugade ang kahalagahan ng teknolohiya upang masiguro ang kaligtasan ng publiko lalo na ngayong panahon ng pandemya.

Inaasahan ng Department of Health na makakapag-angkat ng halos 10,000 vials ng Tocilizumab bago matapos ang buwan ng Setyembre.

Sinabi ni Health Secretary Francisco Duque, III, patuloy silang naghahanap ng suplay ng naturang gamot na ginagamit sa mga COVID-19 patient.

Bukod dito, nakikipag-ugnayan na rin gobyerno sa ambassador sa Switzerland para sa karagdagang suplay ng Tocilizumab.

Ang naturang pharmaceutical company na gumagawa ng Tocilizumab, ay nakabase sa Switzerland.

Ayon pa sa kalihim na habang kulang ang suplay ng Tocilizumab, mayroong ibang gamot na maaring gamitin bilang kapalit para sa COVID-19 tulad ng Baricitinib.

Samantala, unang inihayag ng DOH na ang suplay ng Tocilizumab ay inaasahang magiging limitado lamang hanggang sa buwan ng Disyembre.

Lumabas sa isang pagsusuri ng US Centers for Disease Control and Prevention (CDC) na mas matagal ang proteksyong maibibigay ng Moderna COVID-19 vaccines kumpara sa Pfizer.

Isinagawa ng CDC researchers  ang pag-aaral sa mahigit 3,000 indibidwal na naitalang may severe cases mula 11 ng Marso hanggang akinse ng Agosto.

Sa naturang bilang, nasa 12.9% sa mga ito ang bakunado ng Moderna habang 20.0% naman ang bakunado ng Pfizer at 3.1% ang bakunado ng Johnson & Johnson.

Bukod dito, napagalaman din sa naturang pag-aaral ang iba’t ibang antibodies na nilalaman ng mga nasabing bakuna.

Ang Moderna ay may mas mataas na lebel ng antibodies kumpara sa Pfizer at J&J.

Hindi na tatakbo pa sa mas mataas na posisyon sa pamahalaan si Senate Blue Ribbon Chair, Senador Richard Gordon.

Ito’y ayon sa senador makaraang lumutang ang alegasyon na ginagamit lang ang imbestigasyon ng senado para sa planong pagtakbo sa halalan.

Giit pa ni Gordon, na hindi niya kailangang maghangad ng mas mataas pang posisyon dahil matagal naman na aniyang siyang nagsilbi sa bayan.

Kabilang na rito ang pagiging senador at pagiging chairman ng Philippine Red Cross (PRC).

Ipinagkumpara pa nga nito ang kanyang nagawa sa PRC kaysa sa naging aksyon ng Pangulo.