HEADLINES

Nadadagdagan ang bilang ng nasawi dahil sa COVID-19 sa Batanes.

Ayon sa provincial government, isang 88-anyos na lalaki mula sa kayhuvokan, Basco ang ikalawang COVID-related death sa lalawigan.

Nakapagtala rin ang Batanes ng 41 na mga bagong kaso dahilan para umakyat na sa 451 ang kabuuang active COVID-19 cases.

Pinakamaraming naitalang aktibong kaso sa Basco na may 323, sinundan naman ng Uyugan na may 35 active cases, 30 sa Ivana, 27 sa Mahatao, 19 sa Sabtang at 17 sa Itbayat.

Nadagdagan naman ng 12 ang bilang ng mga gumaling sa naturang sakit kung kaya’t umabot na sa 30 ang total recoveries sa lalawigan.

Sa kabuuan, mayroong 483 kumpirmadong kaso ng COVID-19 sa Batanes.—sa panulat ni Hya Ludivico

Umapela si Presidential Adviser for Entrepreneurship Secretary Joey Concepcion na ilagay na sa alert level 3 ang National Capital Region pagsapit ng Oktubre.

Ayon kay Concepcion, hiniling ng business sector sa pulong kasama ang Philippine Medical Association na payagang magbukas ang mas maraming negosyo gaya ng mga Spa, Salon at Gym na pinapayagan sa level 3.

Posible anya sa 4th ng taon makabawi ang mga negosyo dahil tataas ang consumer spending sa gitna ng paghahanda sa pasko.

Idinagdag pa ni Concepcion na dapat itaas pa ang capacity sa mga bubuksang negosyo upang mabawi ang lugi at mabayaran ng mga business owner ang 13th month pay ng kanilang mga empleyado.—sa panulat ni Drew Nacino

Papalapit na sa pinaka-Dulong Hilaga ng bansa ang bagyong may international name na Mindulle.

Huling namataan ng PAGASA ang bagyo sa layong 1,420 kilometers, Silangan ng Dulong Hilagang Luzon.

Taglay nito ang lakas ng hanging aabot sa 165 kph at pagbugso na hanggang 205 kph at mabagal na kumikilos pa-Hilaga Hilagang-Kanluran.

Inaasahang pumasok ng Philippine Area of Responsibility ang nasabing sama ng panahon, ngayong araw at posibleng lumabas din ng par sa loob ng 24 oras.

Gayunman, dahil sa direksyong tinatahak ng bagyo, sa mga nakalipas na oras ay posible rin itong hindi pumasok ng bansa.

Wala namang direktang epekto saanmang bahagi ng bansa ang nasabing weather disturbance na papangalananglannie sakaling pumasok ng PAR. —sa panulat ni Drew Nacino

Karagdagang P49 bilyon budget ang hiling ng Department Of Health (DOH) sa kongreso upang pondohan ang Special Risk Allowance ng mahigit kalahating milyong healthcare workers.

Ito ang inihayag ni Cebu 5^th District Rep. Duke Frasco, sponsor ng proposed P242.2 bilyon budget ng DOH, sa pagpapatuloy ng deliberasyon sa panukalang mahigit P5 trilyon national budget.

Ayon kay Frasco, saklaw ng dagdag pondo ang 526,727 healthcare workers na kasama sa inventory ng kagawaran.

Kabilang din anya ang mga frontlinerna walang direktang exposure sa COVID-19 patients tulad ng mga janitor.

Aabot sa P3,000 ang ilalaan kada buwan para sa mga low-risk healthcare worker habang P6,000 at P9,000 para sa medium-risk at high-risk medical frontliners.—sa panulat ni Drew Nacino

Nakipag-ugnayan na ang Bureau Of Customs sa Department Of Agriculture, Bureau of Plant Industry, at Benguet Farmers’ Cooperative hinggil sa pagkalat ng smuggled carrots sa mga pamilihan.

Una rito, bumuo na ng Joint Task Force ang pamahalaan na siyang gagawa ng imbestigasyon hinggil dito kung saan kabilang sa task force ang mga kinatawan mula sa DA, BOC, DTI, at BIR.

Kaugnay nito, pinaigting na ng BOC ang kanilang border control upang maiwasan ang pagpasok ng anumang smuggled items sa bansa.

Sinabi pa ng BOC na titiyakin nila na mananagot ang sinumang sangkot dito at tututukan ang importasyon ng perishable items.—sa panulat ni Hya Ludivico