HEADLINES

Nagbigay ang Australia sa Pilipinas ng iba’t ibang kagamitan para mapalakas pa ang pagtugon kontra COVID-19.

Tinanggap ni Defense Secretary Delfin Lorenzana at AFP chief of Staff General Jose Faustino, Jr., ang donasyong medical supplies ng Australia na nagkakahalaga ng 57 million pesos.

Nagpasalamat si Lorenzana sa gobyerno ng Australia sa nasabing donasyon na aniya’y patunay ng magandang ugnayan ng Pilipinas at Australia sa gitna na rin nang hamon ng covid 19 pandemic.

Sinabi naman ni Faustino na kailangang kailangan ang mga kagamitang medikal ng mga sundalo sa mga panahong ito.

Dadalhin ang mga donasyong medical supplies at personal protective equipment o PPE’s sa primary military hospital ng AFP sa V. Luna Medical Center sa Quezon City. — sa ulat ni Jaymark Dagala (Patrol 9)

Nagpasaklolo ang Chinese Embassy sa PNP kaugnay sa tumataas na kaso ng kidnapping na kinasasangkutan ng Chinese nationals.

Ang nasabing  concern ng embahada ay ipinaabot ni Wang Xiaohong, Executive Vice Minister ng MPS o Ministry of Public Security ng China kay PNP Chief Guillermo Eleazar sa isang video conference.

Tiniyak ni Xiaohong ang pakikipag-ugnayan ng MPS sa PNP para palakasin ang investigation, information sharing at case transfer para mahuli at mapanagot ang mga sangkot sa kindnapping at iba pang kasong kinasasangkutan ng Chinese nationals.

Nagkasundo rin ang magkabilang panig na magsasanib puwersa kontra sa iba pang krimen tulad ng cross border gambling, telecom and internet fraud, robbery at homicide sa pamamagitan nang regular na pagpupulong.

Bukod pa ito sa technical cooperation sa drug control,  counter terrorism at law enforcement capacity building.

Tila tumitindi ang arms race sa Korean Peninsula matapos ilabas ng South Korea ang kanilang bagong homegrown submarine.

Inilarga ng Sokor bagong submarine sa Ulsan City, ilang oras makaraang magpakawala muli ang North Korea ng short range missile na bumagsak sa karagatan.

Ang tatlong toneladang Changbogo-3 (chang-bo-go) missile-sub ay ginawa ng Hyundai heavy industries, na may kakayahang magpakawala ng ballistic missiles at maaaring magkarga ng nuclear warhead.

Samantala, nanindigan naman ang nokor sa kanilang karapatan na magsagawa ng weapons test.

Isinagawa ng North Korea ang missile test, ilang oras bago mag-talumpati ang kanilang kinatawan sa United Nations general assembly, sa U.S.  —sa panulat ni Drew Nacino

Dumadaing na ang ilang mga Pinoy factory workers na nasa Taiwan matapos ang mahigpit na panuntunan sa kanilang tinutuluyang dormitoryo.

Ayon sa ilang mga factory workers, pinagbabawalan silang makalabas ng kanilang kuwarto dahil sa mahigpit na covid-19 protocols.

Sa pahayag ng mga Pinoy workers, tatlong buwan na silang totally lockdown kung saan, hindi nila nabibili ang kanilang mga kailangan dahil dalawang oras tuwing linggo lamang sila pinapayagang makalabas ng dormitoryo.

Bukod pa dito, hindi rin sila pinapayagang sumakay ng pampublikong sasakyan katulad ng taxi, bus at train.

Ayon sa mga migrant workers, hindi sila makapaghain ng kanilang reklamo dahil binantaan umano sila na pauuwiin ang sinumang hindi susunod sa company policy.

Samantala, sa naging pahayag naman ni MECO Labor Taipei Director na si Attorney Cesar Chavez, kailangan lang tumawag ang Pilipino sa tanggapan ng Manila Economic and Cultural Office o MECO para agad na maaksyunan ang kanilang reklamo.

Sa ngayon ay umaasa pa rin ang mga apektadong Pinoy factory workers na papayagan silang makalabas para sa kanilang mental health. —sa panulat ni Angelica Doctolero