Nakumpiska ng Philippine Drug Enforcement Agency o PDEA ang aabot sa P3.4-M na halaga ng hinihinalang shabu sa isinagawang buy bust operation sa barangay Dela Paz, Pasig City.
Ayon sa PDEA, dalawang suspek na may edad 28 at 44 ang naaresto sa operasyon.
Na-monitor umano nila ang mga aktibidad ng mga ito at posibleng nagbebenta rin sa labas ng Metro Manila.
Wala namang piyansa ang kasong pagbebenta ng ilegal na droga na isinampa laban sa mga suspek.
Nagbabala sa publiko ang Department of Agriculture laban sa pagbili ng mga imported na gulay mula sa China.
Ayon kay agriculture secretary William Dar, hindi nakasisiguro kung ligtas ang pesticide na ginagamit sa mga imported na gulay na ito.
Kaya aniya ang pinaka-magandang gawin ay iwasan ang pagbili nito lalo’t ibinebenta ngayon umano ang mga imported na gulay na ito sa ilang lokal na pamilihan.
Ani Dar, matutukoy ang imported na gulay sa size nito, karaniwan kasi aniyang malaki ang diperensya ng laki ng imported na gulay mula sa lokal na pananim.
Ipinabatid din ni Dar na kaniyang inatasan na ang Bureau of Plant Industry na suriing mabuti ang mga imported na gulay na ito mula sa China upang matiyak na ligtas ang mga consumer na bibili nito.
Nagbabala sa publiko ang Bangko Sentral ng Pilipinas o BSP laban sa tinatawag na “pasalo” sa auto loan scheme na galing sa carnapping syndicates.
Sa inilabas na abiso ng BSP, sinasabing ang target ng “pasalo-benta scheme” ay ang mga vulnerable car buyers.
Ayon sa BSP, sa pakikipagtulungan sa mga law enforcement agency, maaaring makapag-isyu ng alerto sa mga sasakyang mula sa carnapping syndicate.
Ngunit posible umanong wala ng maging habol pa ang buyer ng mga ganitong klaseng sasakyan dahil sa palsipikado ang mga hawak nilang dokumento.
Ilan pa umano sa scheme ay ang rent-tangay, rent-sangla, loan accommodator scheme at labas-casa scheme.
Naitala ang 0.96 reproduction number ng COVID-19 sa Pilipinas ayon sa OCTA research.
Sinabi ni Dr. Guido David ng OCTA, nananatiling mababa pa rin ng reproduction number sa bansa.
Aniya noong Setyembre 26 naitala ang 0.98 habang 0.94 naman noong Setyembre 27.
Gayunman, nananatili pa rin aniyang puno ang mga ospital sa mga lugar na higit na apektado ngayon ng COVID-19.
Mapapansin kasi umano ang “downward trend” sa Metro Manila, ngunit nananatiling may pagsirit ng COVID-19 case sa ilang mga probinsya.
Palalawigin na ng Commission on Elections o Comelec ang voter registration ng tatlong linggo.
Magsisimula ito sa Oktubre 9 at magtatagal hanggang Oktubre 31.
Ayon kay Comelec chair Sheriff Abas, matitigil sa Setyembre 30 hanggang Oktubre 8 ang voter registration para bigyang-daan ang paghahanda at pagtanggap ng Certificate of Candidacy.
Batay sa datos ng Comelec, nitong Setyembre 11, mayroon nang mahigit 63M ang rehistradong botante para sa 2022 elections.
Makatatanggap ng P10,000 ang mga empleyadong nakakuha ng COVID-19 sa trabaho.
Ayon kay Alvin Garcia, senior information officer ng Employees’ Compensation Commission o ECC, bukod pa ang benepisyong ito mula sa Social Security System at government service insurance system.
Ani Garcia, sa ngayon ay naka-fixed sa sampung libong piso ang sickness claim habang P15,000 naman para sa death claim.
Maaari pa rin aniyang makapag-avail ng benepisyo ang mga manggagawang tinamaan ng COVID-19 noong nakaraang taon.
Dagdag na 339 cases pa ng delta variant ang na-detect ng DOH.
Dahil dito, ipinabatid ng DOH na pumapalo na sa 3,366 ang kabuuang kaso ng delta variants sa bansa.
Sinabi ni Health Undersecretary Maria Rosario Vergeire na ang mga bagong kaso ay mula sa 748 sequenced samples na kinuha mula Abril hanggang Hunyo.
Lumalabas din sa pinakahuling genome sequencing ang 186 beta variant cases, 98 alpha variant cases, siyam na P.3 variant cases at isang gamma variant case.
Ibinabala ng isang US general ang mas mapanganib na sitwasyon sa amerika sa susunod na taon.
Ito ayon kay US general Mark Milley, chairman ng Joint Chiefs of Staff ay dahil sa pananatili ng Al Qaeda terrorist na nasa Afghanistan.
Ibinunyag ni Milley na hindi pa nabubuwag ang pakikipag-alyansa ng Al Qaeda sa Taliban na responsable sa September 11, 2001 terror attack.
Sa gitna na rin ito ng imbestigasyon ng US congress kay Milley gayundin si Defense Secretary Lloyd Austin sa usapin nang pag-pull out ng mga sundalong Amerikano sa Afghanistan.
Inamin nina Milley at Austin ang biglang pagbagsak ng gobyerno na kaagad na-take over ng Taliban, kasabay ang panghihinayang sa anila’y nasayang na mga itinuro nila sa mga Afghans na pakikipaglaban sa mga terorista sa bansa nila.
Hinihimok ni Senador Risa Hontiveros ang publiko partikular ang mga hindi pa rehistrado na samantalahin ang isang buwang extension sa voters registration.
Ito ayon kay Hontiveros ay para makalahok ang publiko sa 2022 election at makapili ng mga nais mamuno sa bansa.
Itinuturing ni Hontiveros na tagumpay para sa mga mamamayang Pilipino ang desisyong palawigin ang voters’ registration na aniya’y naaayon sa diwa ng demokrasya.
Ngayong may pandemya, binigyang diin ni Hontiveros na mahalagang ma protektahan ang karapatang makilahok sa proseso ng eleksyon.
Susi sa population protection at herd immunity ang pasya ng Pangulong Rodrigo Duterte na buksan na ang pagbabakuna kontra COVID-19 sa general population.
Ayon ito kay Senador Bong Go, matapos ikatuwa ang pag apruba ng Pangulong Rodrigo Duterte sa rekomendasyon ni Vaccine Czar Carilito Galvez na ibubukas na sa Oktubre sa general population ang vaccination program ng pamahalaan base na rin sa mga panuntunan ng health experts.
Sinabi ni Go na magiging daan ito para mas maging masaya ang pasko ngayong taon at unti unting makabalik sa normal na pamumuhay.—sa ulat ni Cely Bueno (Patrol 19)