HEADLINES

Pinag-aaralan ng DOLE ang pagkakasa ng pansamantalang deployment ban sa Saudi Arabia.

Ito ayon kay director Rolly Francia ng DOLE -information and publication service ay kasunod na rin ng mga report nang pangmamaltrato sa OFWs doon na ang pinakahuli ay naranasan umano ng 16 na Pinoy sa kamay ng employer nilang isang retired military general.

Dalawa sa mga naturang OFW ay nananatili pa sa quarters ng naturang heneral samantalang ang iba ay nakauwi na sa Pilipinas.

Sinabi ni Francis na nakikipag-negosasyon na sila para sagipin ang dalawa pang OFW sa kamay ng nasabing retired general.

Mapipilitan aniyang suspendihin ng gobyerno ang pagpapadala ng ofw sa Saudi kung hindi aayusin ng foreign employers ang kanilang mga patakaran.

Sumirit pa sa mahigit 2.5M ang kumpirmadong kaso ng COVID-19 sa bansa.

Ito ayon sa DOH ay matapos maitala ang 12,805 na bagong kaso ng COVID-19, kung saan naitala sa 132, 339 ang active cases.

Pumapalo naman sa mahigit 2.3 million ang total recoveries matapos maitala ang 12, 236 na mga bagong gumaling sa nasabing sakit.

Samantala, rumehistro sa mahigit 38K ang death toll kabilang na ang 190 na mga bagong nasawi sa nasabing virus.

Nilinaw ng DOH na mababa ang naitalang kaso kahapon dahil sa anito’y resultang ibinigay ng mga laboratory noong Lunes.–-mula sa ulat ni Patrol 5, Aya Yupanco

Hindi nararamdaman ng mga nasa probinsya na sapat ang supply ng bakuna dahil maraming hindi pa nabakunahan o kaya ay patuloy na naghihintay ng kanilang second dose.

Binigyang-diin ito ni Senador Nancy Binay matapos suportahan ang panawagan ng local government units sa labas ng NCR na maging mas equitable sa pamamahagi ng COVID-19 vaccines.

Sinabi ni Binay na umaapela siya sa National Government partikular kay vaccine czar Carlito Galvez Jr. na bigyan ng dagdag na alokasyon ng COVID-19 vaccine, ang LGUs na nasa labas ng NCR matapos nitong ihayag na sa katapusan ng Oktubre ay makatatanggap  ang bansa ng nasa 100M doses ng bakuna.

Ayon pa kay Binay, kung sinasabi ng gobyerno na natugunan na ang problema sa suplay ng bakuna ang susunod na hakbang ay kung paano ito ipamamahagi sa mga probinsya

Hindi aniya makatwirang bubuksan na ang bakunahan sa general population at handa na ding bakunahan ang mga menor de edad, subalit marami pa ring mga probinsya ang nahihirapang makatanggap ng bakuna para sa mga kabilang sa A1 hanggang A3  priority groups–-mula sa ulat ni Cely Bueno (Patrol 19)

Nasabi at nagawa na ng Pangulong Rodrigo Duterte ang kanyang punto hinggil sa transaksyon ng Pharmally Pharmaceutical Corporation sa gobyerno kaya’t mas mabuting hayaan na niyang magpatuloy ang imbestigasyon.

Ayon ito kay Senador Francis Tolentino matapos ihayag na nais niyang hikayatin ang Pangulong Duterte na tigilan na ang pagtatanggol sa mga kaibigang nauugnay sa multi-bilyong pisong kontrata ng gobyerno sa pharmally corporation.

Gayunman, nilinaw ni Tolenito na hindi dapat ituring na tolerance o pagkunsinti sa katiwalian at pagtutol sa imbestigasyon ang pagdepensa ng Pangulo sa itinuturing niyang mga kaibigan na pagpapakita lamang kung ano ang ibig sabihin ng pagkakaibigan na maituturing namang human nature.

Sa harap naman palitan ng batikos ng Pangulo at ilang senador na nag-iimbestiga sa isyu, sinabi ni Tolentino na dapat pahalagahan ang separation of powers ng ehekutibo at lehislatura at dapat mag-respetuhan ang isat isa.—mula sa ulat ni Cely Bueno (Patrol 19)

Higit na mananaig ang boses ng nakararami at ng Diyos sa susunod na eleksyon kapag mas maraming Pilipino ang makaboboto.

Binigyang-diin ito ni senate committee on electoral reforms chair  Imee Marcos matapos matuwa sa pag-apruba ng Comelec En Banc sa resolusyong nagpapalawig sa voter registration mula Oktubre 9 hanggang 31.

Sinabi ni Marcos na ngayong sigurado na ang pagpapalawig ng voter registration, asahan nang maitatala ang pinakamalaking bilang ng mga botante na lalahok sa 2022 elections kahit pa may pandemya—mula sa ulat ni Patrol 19, Cely Bueno

Usap-usapan ngayon ang paglipat sa Kapuso network ni Kim Atienza.

Bagama’t wala pang kumpirmasyon sa Kapamilya host, nagkuwento si Kuya Kim tungkol sa unang araw ng taping ng kaniyang bagong programa kung saan siya ang host.

Hindi nito binanggit kung anong klaseng programa at anong istasyon, ngunit kasabay nito ang mga larawan at video na kumalat sa social media kung saan may shooting ng tila isang OBB sa compound ng GMA-7.

Makikita sa video ang isang nakasakay ng motorsiklo na may outfit na leather jacket, pants at boots.

Sa caption ng nag-post ng video, at sinabi nito na kung si Atom Araullo ay naka-kotse noong grand welcome sa GMA, naka-motor naman ang peg ni Kuya Kim!

Kasado na ang pagsisimula ng Mobile Number Portability Act o MNPA bukas, Setyembre 30.

Ibig sabihin nito ay puwede nang magpalit ng service provider kahit hindi magpalit ng lumang cellphone number.

Kaugnay nito, nagpaalala si Sen. Sherwin Gatchalian, author ng batas, sa mga telecommunication company na ingatan ang mga personal na impormasyon ng mga mobile subscribers.

Dapat aniyang tiyakin ang cybersecurity at maglatag ng sapat na mekanismo para sa kapakanan ng mga konsyumer na magpapalit ng service provider.

Prayoridad sa pagbabakuna kontra COVID-19 sa mga bata ang mayroong comorbities.

Ito ang inanunsyo ng Department of Health sa pagsisimula ng pagbabakuna sa mga batang edad 12 hanggang 17.

Mapapabilang umano ang mga batang ito sa priority group A3 sa oras na mabakunahan na ang target na populasyon ng mga senior citizen at maging sapat na ang suplay ng bakuna.

Una rito, inaprubahan ni Pangulong Rodrigo Duterte ang pagbabakuna sa general population at mga kabataan simula sa Oktubre.

Nangulelat ang Pilipinas sa COVID-19 resilience ranking batay sa ulat ng bloomberg nitong Setyembre.

Sa 33 bansa na kasama sa listahan, nasa huli o nasa 53rd ang puwesto ng Pilipinas na may score na 40.2.

Nalaglag pa ito mula sa ika-52 puwesto na nakuha noong Hunyo.

Samantala, nanguna naman sa COVID-19 resilience ranking ang Ireland na may score na 79.4.

Sinundan ito ng Spain, Netherlands, Finland at Denmark.