HEADLINES

Apat pang lugar sa Quezon City ang isinailalim sa special concern lockdown dahil sa pagdami ng COVID-19 cases.

Ang mga ito ay ang Bansalangin Street, sa Barangay Bungad; Molave Street sa Barangay Payatas at road 1 sa Barangay Bagong Pag-asa at Luzon Avenue, Barangay Old Balara.

Tatagal ang “special concern lockdown” ng dalawang linggo o simula Setyembre 28 hanggang Oktubre 11.

Umabot na sa 580 ang positibong kaso ng COVID-19 sa Barangay old Balara at Payatas.

Tanging mga Authorized Persons Outside of Residence ang papayagang umalis sa kanilang mga bahay pero kailangan silang magpakita ng negatibong resulta ng swab test habang mamamahagi ng food packs at essential kits sa mga apektadong pamilya.—sa panulat ni Drew Nacino

Patuloy na bumibilis ang fixed broadband internet speed sa bansa sa loob ng 15 sunod na buwan.

Batay ito sa Ookla speedtest global index report na bumilis pa ang internet services sa Pilipinas.

Bumilis ang fixed broadband internet sa 72.56 mbps noong Agosto mula sa 71.1 mbps noong Hulyo 2021.

Katumbas ito ng month-to-month improvement na 1.95% para sa fixed broadband at 817.31% improvement simula nang mag-umpisa ang Duterte administration noong Hulyo 2016.

Lumabas din sa report na bumilis sa 33.77 mbps ang average download speed sa mobile mula sa 33.69 mbps.

Mula sa 180 bansa, nasa 63^rd rank ang Pilipinas sa fixed broadband speed habang 73^rd mula sa 140  bansa pagdating sa mobile.—sa panulat ni Drew Nacino

Pansamantalang sarado ang mga pribado at pampublikong sementeryo maging ang mga kolumbaryo sa lungsod ng Maynila simula Oktubre 29 hanggang Nobyembre 3.

Ito’y matapos lagdaan ni Manila Mayor Francisco “Isko Moreno” Domagoso ang Executive Order no.33 na nag-uutos sa pagsasara ng Manila North Cemetery, Manila South Cemetery, Manila Muslim cemetery at ang mga kolumbaryo sa undas.

Alinsunod sa kautusan, papayagan ang libing at cremation para sa mga namatay na walang kaugnayan sa COVID-19 sa mga nasabing panahon basta’t susunod sa minimum health protocols tulad ng social distancing.

Kabilang sa mga inatasan upang tiyakin ang kaayusan at kaligtasan sa mga sementeryo ang Manila Health Department, the Manila Disaster Risk Reduction and Management Office katuwang ang Manila Police District.

Maaari namang maharap sa revocation ng Mayor’s at business permit ang lalabag sa naturang kautusan.—sa panulat ni Drew Nacino

Handa na ang Presidential Security Group sa pagtiyak sa kaligtasan at seguridad ni Pangulong Rodrigo Duterte sa gitna ng posibleng paghahain nito ng Certificate Of Candidacy (COC) mula Oktubre 1 hanggang 8.

Ayon kay Presidential Security Group Chief, Col. Randolph Cabangbang, wala pa silang natatanggap na anumang abiso sa magiging aktibidad ni Pangulong Duterte para sa susunod na mga araw pero nakahanda sila sa lahat ng kaganapan.

Una nang inihayag ng COMELEC na papayagan ang mga kandidato para sa may 2022 national elections na magdala ng isang kasama sa paghahain ng kanilang COC.

Gayunman, iginiit ni Cabangbang na ang hindi maaaring saklawin ang Pangulo ng naturang panuntunan sakaling ituloy nito ang kanyang paghahain ng COC.—sa panulat ni Drew Nacino

Umapela ang mga business at labor leader kay Pangulong Rodrigo Duterte na agad maglabas ng Executive Order na magpapaliban sa pagtataas sa monthly Social Security System (SSS) contributions ng mga manggagawa at employer.

Sa Setyembre 27 joint letter, inihayag ng mga grupo na ang pagpapalabas ng EO ay kailangan para payagan ang mga micro, small and medium enterprise na ipagpatuloy ang kanilang negosyo at makapagbigay ng hanapbuhay sa gitna ng COVID-19 pandemic.

Ang liham ay nilagdaan ng Philippine Chamber of Commerce and Industry, Employers Confederation of the Philippines, Philippine Exporters Confederation, Trade Union Congress of the Philippines; Federation of free workers, sentro ng mga nagkakaisa at progresibong manggagawa, partido manggagawa, Federation of Filipino-Chinese Chamber Of Commerce and Industry, Makati Business Club, at Management Association of the Philippines.

Iginiit ng mga grupo na ang Republic Act 11548 na nilagdaan noong Mayo ay nagbibigay ng kapangyarihan ang Pangulo na ipagpaliban ang nakatakdang pagtataas ng SSS premium contributions para sa tagal ng deklarasyon ng State of Calamity.

Magugunitang itinaas ang SSS monthly contributions ng 13% sa pagsisimula ng taon, kumpara sa kasalukuyang 12% contribution na kinukuha mula sa sahod ng mga manggagawa.—sa panulat ni Drew Nacino

Target ng gobyerno na magbakuna ng 800k hanggang isang milyong COVID-19 vaccines kada araw sa Oktubre.

Ito ang inihayag ni Health Undersecretary Myrna Cabotaje bunsod ng mataas na supply ng bakuna sa susunod na buwan.

Ayon kay Cabotaje, uunahin nila ang mga kabataang may comorbidities na edad 12 hanggang 17 bukod pa ito sa pagbabakuna sa general public.

Magugunitang umabot sa 700,000 ang pinakamataas na bilang ng naiturok na bakuna sa isang araw.

Sa ngayon ay lampas na sa 20 milyong indibidwal naka-kumpleto ng bakunasa bansa.—sa panulat ni Drew Nacino

Doble kayod na ngayon ang Pambansang Pulisya para siguruhing magiging maayos, tapat at mapayapa ang nalalapit na Eleksyon sa susunod na taon.

Ito’y ayon kay PNP Chief P/Gen. Guillermo Eleazar ay kasunod ng pagpapalawig ng voters registration hanggang sa katapusan ng Oktubre.

Ayon kay Eleazar, ang pagnanais ng publiko na lumahok sa halalan ang nagbibigay sa kanila ng dahilan para lalo pang paigtingin ang pagbibigay seguridad sa panahong ito.

Kabilang na riyan ang pinaigting na kampaniya ng AFP at PNP kontra loose firearms at paglansag sa mga private armed group na siyang gagamitin ng mga pulitiko.

Kasabay nito, pinaalalahanan ni Eleazar ang mga pulis na tiyaking masusunod ang minimum health protocols sa voters registration gayundin sa filing ng Certificates Of Candidacy.

Magsisimula ang paghahain ng kandidatura sa Oktubre 1 ng taong ito at magtatapos naman hanggang sa Oktubre 8.—ulat mula kay Jaymark Dagala (Patrol 9)

Maayos ang trato ng senado kay Pharmaly Pharmaceutical Corporation director Linconn Ong.

Tiniyak ito ni senate sergeant at arms Rene Samonte at sa katunayan ay pinapayagan nila si Ong na lumabas ng senate building para maglakad, mag-ehersisyo at magpa-araw tuwing umaga.

Pinapayagan din aniya ng senado si Ong na mabisita ng kanyang pamilya, abogado, medical personnel at pari o religious leaders.

Ipinabatid ni Samonte na kahapon ay binisita si Ong ng kanyang may bahay gayundin ng kanyang abogadong si Atty. Rico Kapunan.

Gayunman, itinigil ng senate blue ribbon committee ang pribilehiyo ni Ong na gumamit ng cellphone bagama’t hinahayaan itong gumamit ng telepono sa opisina ni Samonte kapag kailangang tumawag sa kanyang asawa o sinumang gustong kausapin nito.

Tumanggi namang sagutin ni Samonte ang paratang ng isa pang abogado ni Ong na si Atty. Ferdinand Topacio na dumaranas anito ng mental at psychological torture ang kanyang kliyente sa custody ng senado.—mula sa ulat ni Patrol 19, Cely Bueno

Nakatakdang lumagda ng kasunduan ang Armed Forces of the Philippines o AFP at ang Department of Health o DOH para sa pagpapalakas ng health workforce kaugnay ng COVID-19 response.

Ayon kay AFP Surgeon General, Col. Fatima Navarro, sa ilalim ng kasunduan ay ang pagpapadala ng mga military medical personnel sa mga ospital para tumulong sa health workers na nauubos na dahil sa pagkakasakit.

Una nang ipinag-utos ni Pangulong Rodrigo Duterte sa Militar at Pulisya ang pagtulong sa mga health workers sa pamamagitan ng pagpapadala ng military doctors at nurses para alagaan ang mga pasyenteng may COVID.

May limang grupo na aniya ng AFP medical health corps ang nakakalat sa mga ospital sa Metro Manila bukod pa sa medical frontliners ng AFP na itinalaga naman sa mga swabbing at quarantine facilites.—ulat mula kay Jaymark Dagala (Patrol 9)

Bumaba na ang presyo ng kada kilo ng karneng baboy.

Ayon ito sa bantay presyo price monitoring unit ng Department of Agriculture kung saan ang kasim ay nasa 280 pesos na kada kilo mula sa dating 360 pesos noong Enero.

Ang liempo naman na dating nasa 400 pesos kada kilo ay nasa 340 pesos na ngayon.

Sinabi ng DA na ang frozen pork sa mga palengke ay 60 pesos ng mas mura ang presyo kada kilo kumpara sa fresh pork na nasa 200 pesos kada kilo para sa frozen kasim at 280 pesos sa kada kilo ng frozen liempo.

Gayunman, ipinabatid ng DA na pito lamang mula sa 100 meat stalls na nagbebenta ng frozen pork sa NCR wet markets ang mayroong chillers na requirement sa pagbebenta ng mga nasabing produkto.