HEADLINES

Nakatakdang ilabas ng National Vaccination Operations Center (NVOC)sa susunod na linggo ang guidelines para sa pagbabakuna sa mga menor de edad.

Ayon kay Health Undersecretary Myrna Cabotaje, sa ngayon ay binabalangkas pa nila ang mga paiiraling patakaran para dito.

Aniya, uunahin sa pagbabakuna ang metro manila dahil lagpas na sa 50% ng A2 priority group o mga senior citizen ang nabakunahan na konta COVID-19.

Sinabi pa ni Cabotaje na sa sandaling matapos ang test run sa NCR ay sunod namang babakunahan ang mga bata sa iba pang mga lugar.—sa panulat ni Hya Ludivico

Gagamitin bilang pilot center sa pagbabakuna sa kabataan  ang limang ospital sa NCR.

Ito ayon kay Vaccine Czar Carlito Galvez Jr., makaraang salubungin ang halos 400,000 doses ng government procured na Pfizer vaccines kagabi.

Aniya, kabilang sa mga ospital na gagamitin ay ang Philippine General Hospital, heart center, at mga children’s hospital.

Incremental ang sistemang paiiralin sa pagbabakuna sa mga bata kung saan sisimulan muna ito sa edad 15-17 anyos at pagkatpos ay ibababa ito sa edad 12-14.—sa panulat ni Hya Ludivico

Dumarami ang mga batang tinatamaan ng COVID-19 sa Puerto Princesa.

Ayon kay Incident Management Team Commander Dr. Dean Palanca simula ng tumaas ngayong buwan ang aktibong kaso ng COVID-19 sa syudad ay dumami rin ang mga batang dinapuan ng COVID-19 at mayroong pneumonia.

Sinabi pa ni Palanca na kung sakaling mayroong delta variant sa lungsod ay posibleng mabilis din mahahawaan ng virus ang mga bata.—sa panulat ni Hya Ludivico

Inabisuhan na ng MMDA ang mga motorista sa posibleng pagbigat ng daloy ng trapiko sa España Boulevard sa Maynila, simula bukas, Oktubre 1 hanggang 6.

Ayon sa MMDA, isasailalim ng DPWH sa repair ang nasabing kalsada mula Extremadura hanggang M. Dela Fuente streets.

Hindi naman isasara sa daloy ng trapiko ang mga nasabing kalsada dahil uutay-utayin ang pag-repair sa mga naturang kalsada.

Pinayuhan ng MMDA ang mga motorista na dumaan na lamang muna sa mga alternatibong ruta upang makaiwas sa abala. —sa panulat ni Drew Nacino

Ibinunyag ng National Security Council o NSC mayroon pa ring Chinese vessels sa West Philippine Sea.

Sa budget deliberations sa kamara, kinumpirma ni Muntinlupa Rep. Ruffy Biazon na nasa 150 pang barko ng China ang nananatili sa pinag-aagawang karagatan.

Si Biazon ang sponsor ng 2022 proposed budget ng NSC, na kanyang dinepensahan sa isinagawang interpelasyon ni Gabriela Partylist Rep. Arlene Brosas.

Ayon sa kinatawan ng lungsod, umaaligid ang mga Chinese maritime vessels at nangingisda pero binabantayan naman sila ng Philippine Coast Guard at navy.

Bagaman tinatawag na maritime militia, wala anyang nakikitang armas mula sa mga nasabing barko na pawang civilian vessel.

Inihayag din ni Biazon na inirekomenda ng NSC ang deployment ng mga Filipino civilian vessel bilang patunay sa karapatan ng Pilipinas sa West Philippine Sea.—sa panulat ni Drew Nacino

Posibleng bumaba sa 5,000 hangang 6,000 kaso ng COVID-19 kada araw ang maitatala sa bansa pagdating ng buwan ng disyembre.

Ayon kay OCTA Research Fellow Dr. Guido David nakikita nilang patapos na ang surge ng COVID infections sa NCR, Calabarzon, Central Luzon, Cebu, at iba pang lugar.

Kaugnay nito, posible rin aniyang ibaba sa alert level 1 o 2 ang Metro Manila pagsapit ng Disyembre.

Gayunman, sinabi ni David na posible naman ang surge ng Delta variant sa ibang mga rehiyon.—sa panulat ni Hya Ludivico

Nakatakda nang lagdaan ni Pangulong Rodrigo Duterte ang 19.37 kilometer Pasig River Expressway o PAREX project sa Oktubre.

Ito ang tiniyak ni Bataan 2^nd District Rep. Jose Enrique Garcia III, sponsor ng P150.7 bilyong proposed 2022 budget ng Department Of Transportation.

Ayon kay Garcia, planong simulan ang proyekto isang taon matapos lagdaan.

Inaasahangmagsisimula sa Oktubre ng susunod na taon ang konstruksiyon ng proyekto o matapos ang termino ni Pangulong Duterte.

Sa ilalim ng Parex Project na itatayo ng San Miguel Corporation o SMC, pagdurugtungin nito ang East at Western portion ng Metro Manila at babagtasin ang kahabaan ng Pasig river.

Bagaman inuulan ng batikos mula sa mga environmental group, tiniyak naman ni SMC resident Ramon Ang na magiging environment-friendly at inclusive ang Parex sa oras na matapos.—sa panulat ni Drew Nacino

Hindi pa rin kumikita ang mga negosyo na muling nagbukas at mayroong 10% dine-in capacity sa ilalim ng GCQ with alert level 4 system sa NCR, kung ang mga business owner ang tatanungin.

Aminado si Presidential Adviser for Entrepreneurship, Secretary Joey Concepcion na hindi sapat ang 10% capacity upang kumita ang mga negosyo.

Gayunman, kung ibababa sa level 3 ang alert system sa NCR, malaki ang posibilidad na mas gaganda na anya ang takbo ng negosyo.

Ito, ayon kay Concepcion, ay upang makabawi kahit paano ang mga business owners sa kanilang pagkalugi noong mga nakalipas na buwan bunsod ng ipinatupad na lockdown.

Nilinaw naman ng kalihim na kahit mababa ang capacity ay masaya na rin ang mga negosyante dahil unti-unti nang nagbabalik ang kanilang operasyon.—sa panulat ni Drew Nacino

Muling inatake ng African Swine Fever ang limang bayan dito sa region 2.

Tinukoy ng Department of Agriculture – Region 2, ang mga bayan ng Iguig, Tuao, Piat at Pamplona sa Cagayan at Diffun sa lalawigan ng Quirino.

Isa umano sa mga dahilan ang pagpasok ng meat products at mga buhay na baboy mula sa ibang rehiyon.

Ayon kay Dr. Roberto busania, regional technical Director ng DA region 2, kailangang mapigilan ang muling pagkalat ng ASF sa iba pang bayan at lungsod sa  Cagayan Valley Region.

Hindi naman anya gaanong maraming baboy ang naapektuhan na isinailalim sa culling at ibinaon sa lupa.—sa panulat ni Drew Nacino

Pinabulaanan ni Senator Risa Hontiveros na pinilit at sinuhulan niya ang isang warehouse staff ng Pharmally upang sabihin na expired ang mga PPE na binili ng gobyerno.

Ito ang tugon ni Hontiveros sa akusasyon ni Atty. Ferdinand Topacio na sinuhulan umano ng tanggapan ng Senador ang naturang staff upang tumestigo laban sa Pharmally.

Ayon sa mambabatas, ang naturang witness ang nagkusang lumapit sa kanyang tanggapan at mismong si Krizel Grace Mago ang umamin na iniutos niya na palitan ang expiration date na anya ay panloloko sa gobyerno.

Hinamon naman ni Hontiveros si Topacio na magsampa na lamang ito ng kaso sa halip na magbintang.

Iginiit ni Hontiveros na handa niyang harapin, sagutin at patunayan na hindi kailangang magbayad upang lumabas ang katotohanan.—sa panulat ni Drew Nacino mula sa ulat ni Cely Ortega -Bueno (Patrol 19)