HEADLINES

Tiniyak ng Armed Forces of the Philippines o AFP ang mahigpit na pagsunod sa health protocols kontra COVID – 19 ng mga sundalo.

Ito’y kasunod ng pag-arangkada ng “Kaagapay ng mga Mandirigma ng Dagat” (KAMANDAG 5-21) exercise sa pagitan ng tropa ng Pilipinas, Amerika at Japan.

Ayon kay Philippine Marine Corps Commandant, MGen. Ariel Caculitan, nasa 242 miyembro ng Philippine Marines ang lalahok sa walong araw na war games.

Kasama nila ang 12 tauhan mula sa United States Marine Coprs gayundin ang may 25 Ground Self-Defense Pesonnel ng Japan.

Kabilang sa mga nakalatag na aktibidad sa pagsasanay ay ang Humanitarian Aid at Disaster Response na gagawin sa Zambales, Counter-Terrorism na gagawin naman sa Corregidor Island.

Gayundin ang Coastal Defense na gagawin sa Cagayan at ang panghuli ay ang Staff Integration Activity na gagawin naman sa Palawan.

Patay matapos tambangan ang konsehal ng bayan ng Liloy, Zamboanga Del Norte.

Kinilala ni Liloy Police Chief, Major Alexis Bahunsua, ang biktimang si Errnesto bihag Jr. 46 anyos, residente ng Barangay Causwagan.

Ayon kay Bahansua, minamaneho ni Bihag ang isang puting Toyota Fortuner patungong barangay communal nang gitgitin ng maroon na Toyota Innova sa highway at pinaputukan ng mga lalaking sakay nito.

Matapos nito ay bumangga naman ang sasakyan ng konsehal sa puno ng kamagong.

Nagtamo ng tama ng bala sa iba’t ibang bahagi ng katawan ang biktima at naisugod pa sa ospital pero hindi na ito nakaabot ng buhay.

Inaalam na ng pulisya ang motibo sa pamamaslang at sino ang nasa likod nito.—sa panulat ni Drew Nacino

Namemeligrong lumobo ang listahan ng mga Pinoy Cager na maglalaro sa Japan B.League.

Ito’y makaraang lumutang ang pangalan nina Christian Standhardinger ng Barangay Ginebra Gin Kings at Ian Sangalang ng Magnolia hotshots sa mga pini-pirata ng ilang Japanese team.

Ayon sa ilang source, nakikipag-ugnayan na umano ang ilang Japanese basketball squad upang makuha ang serbisyo ng dalawang bigman.

Magtatapos na ang kontrata ni Standhardinger sa Ginebra sa Disyembre pero wala nang magiging problema para sa Filipino-American Cager sakaling matuloy ito sa Japan B.League.

Matatapos na rin ang kontrata ni Sangalang sa Magnolia kaya’t walang magiging hadlang sakaling matuloy ito sa Japan.

Kasalukuyang naglalaro sa B.League ang magkakapatid na sina Thirdy at kiefer Ravena; Javi at Juan Gomez De Liaño; Kobe Paras, Bobby Ray Parks Junior, Kemark Carino at Dwight Ramos.—sa panulat ni Drew Nacino

Sinertipikahan na bilang urgent ni Pangulong Rodrigo Duterte ang P5 trilyon 2022 national budget na kasalukuyang sumasailalim sa deliberasyon ng kongreso.

Ang panukalang pondo ay nakapaloob sa house bill 10153 o an Act Appropriating funds for the operation of the government of the Philippines from Enero 1 to Disyembre 31, 2022.

Sa ipinarating na mensahe sa gitna ng plenary session sa kamara, inihayag ng Pangulo na mahalagang maipasa ang nasabing panukalang batas upang magampanan ng gobyerno ang mandato nito.

Dahil sa certification, mas mabilis na matatalakay ng kongreso ang bill nang hindi na kailangang umabot ng tatlong araw kaya’t kailangang tapusin ito bago mag-adjourn, bukas.—sa panulat ni Drew Nacino

Inanunsiyo ng Maynilad na maaaring mabigyan ng anim na buwang installment ang kanilang mga customer na hirap paring makapagbayad ng kanilang bill sa gitna ng pandemiya.

Nabatid na bibigyan ng Maynilad ang mga kumukunsumo ng 50% down  kung saan, maaring bayaran ang kanilang mga bill sa loob ng tatlong buwan.

Sakaling umapela ang mga customer ay maaari pa nila itong gawing 30% down na babayaran naman sa loob ng tatlong buwan.

Ayon kay Maynilad Spokesperson Zmel Grabillo, pag-uusapan pa ng ahensya na gawing anim na buwan ang installment sa bill ng mga consumer.—sa panulat ni Hya Ludivico