Magsasampa ng bagong diplomatic protest ang Pilipinas laban sa China.
Ito ayon sa DFA ay dahil sa anito’y panananatili pa rin sa West Philippine Sea ng 150 Chinese vessels sa vicinity ng Iroquois reef.
Pinakilos na rin ni DFA Secretary Teddy Boy Locsin ang paghahain ng protesta laban sa anito’y incessant at unlawful restriction ng China sa mga mangingisdang Pilipino sa Bajo de Masinloc.
Dagdag na mahigit 1.2 milyong bakuna mula sa moderna ang dumating sa Pilipinas.
Alas diyes ng umaga nang lumapag sa NAIA ang panibagong supply ng moderna vaccines sakay ng China Airlines Flight.
Mahigit 800,000 doses ng moderna vaccines ay mapapasakamay ng gobyerno at makukuha naman ng pribadong sektor ang mahigit 300,000 doses.
Ipinabatid ni Vaccine Czar Carlito Galvez, Jr. na ipapadala ang bahagi ng bagong dating na moderna vaccines sa regions 3, 4a, 7, 11, 12 at iba pang lugar na nakapagtala ng mataas na kaso ng COVID-19.—sa ulat ni Raoul Esperas (Patrol 45)
Tumaas ang bilang ng mga Pilipinong walang trabaho noong Agosto 2021 sa gitna nang ipinatupad na mahigpit na lockdown kontra COVID-19.
Ayon sa PSA o Philippine Statistics Authority, nasa 3.88 million ang pinoy adults na walang trabaho o katumbas na 8.1 percent unemployment rate para sa nakalipas na buwan.
Sinabi ni PSA Chief Claire Dennis Mapa, na asahan na ang pagsirit ng mga pilipinong walang trabaho noong Agosto dahil sa muling pagpapairal ng ECQ sa metro manila.
Nasa 3.07 million ang jobless pinoys noong buwan ng Hulyo kung kailan nasa 6.9 percent ang unemployment rate.
Inilatag na para sa Plenary Debates ng Senate Subcommittee on Finance and Committee on Health ang panukala kaugnay sa pag-iisyu ng COVID-19 vaccine at health passport.
Batay sa Senate Bill 2422, pinakikilos ang Local Government Units na mag-isyu ng libreng vaccine at health passport kung saan nakasaad ang basic personal information ng binakunahan kontra COVID-19.
Nakalagay din sa card ang brand ng bakuna, kailan at saan ibinakuna, sino ang nagbakuna at ang petsa at resulta ng mga rt-pcr test.
Pangangasiwaan ng DOH ang central database kung saan mabe-verify ang authenticity ng vaccine passport na magagamit sa non-essential domestic travel, local checkpoints, quarantine exemptions o mas maikling quarantine time, business establishments at international travel na kailangang lakarin ng bureau of quarantine at department of foreign affairs.
Sinabi ni senador Pia Cayetano, sponsor ng panukala na hindi naman bago ang pag-iisyu ng vaccine passport na mayruon na sa canada, china, united arab emirates at sa mga bansa sa european union at nagagamit sa pagpasok sa mga museum, teatro, gym, cultural sites at mga kainan.—sa ulat ni Cely Bueno (Partol 19)
Pathetic narrative na puno ng kasinungalingan at malinaw na diversionary tactic.
Ito ang reaksyon ni Senador Risa Hontiveros sa alegasyon ng abogado ni Pharmally Pharmaceutical Corporation Officer Linconn Ong na binayaran o sinuhulan ng kanyang tanggapan ang lumapit sa kanilang warehouse man ng Pharmally na nagsabing pinalitan nila ang expiry date o production date ng face shields.
Sinabi ni Hontiveros na hindi nila papayagan ang paninira at pambababoy sa katotohanan na ginagawa ni Atty. Ferdinand Topacio na posibleng kasuhan nila.
Iginiit ni Hontiveros na nais ng kampo ni Ong na ilihis ang atensyon ng publiko matapos nilang isiwalat ang nagpapalakas pa sa iregularidad sa transaksyon ng Pharmally sa gobyerno.—sa ulat ni Cely Bueno (Patrol 19)
Isang COVID19 patient ang lumabag sa quarantine protocols sa Calamba, Laguna.
Ayon sa ulat, dinala ng naturang pasyente ang kanyang manganganak na misis sa isang ospital.
Sinabi naman ng opisyal ng barangay na nagbigay sila ng contact ng ambulansya upang tawagan ng mga ito sakaling manganak ang babae.
Sinamahan naman ng mga otoridad pabalik sa kanilang tahanan ang lalaki at hinigpitan ang pagbabantay upang matiyak na hindi ito makakalabas.
Dumipensa naman ang pasyente at sinabing hindi niya naman ginustong lumabas ng bahay at aniya’y hindi niya maaaring pabayaan ang kanyang mag-ina.
Isang taga-Cebu ang nanalo ng mahigit 36 milyong pisong jackpot sa regular lotto 6/42 draw ng Philippine Charity Sweepstakes Office o PCSO nitong martes.
Ayon kay PCSO General Manager Royina Garma, nahulaan ng bettor ang six-digit winning combination na 10-06-02-09-18-29 na may katumbas na jackpot na 36,829,296.20 pesos.
Pinayuhan naman nito ang naturang mananaya na magtungo sa main office ng PCSO sa Mandaluyong City at ipakita ang kanyang winning ticket at dalawang valid id’s upang makuha ang premyo.—sa panulat ni Hya Ludivico
Nasamsam ng Bureau of Plant Industry o BPI ang 1,000 bags ng bombay onions, 400 bags ng red onions, at 600 kahon ng carrots sa Port Dangay sa Oriental Mindoro.
Kasama rin sa mga nasabat ang ilang kahon ng cream cheese at pasas.
Sinabi ni BPI Director George Culaste na galing ang mga ito sa Batangas at itinawid sa Mindoro.
Nakatakda sanang ibyahe ang mga ito patungong iloilo ngunit walang maipakitang dokumento ang driver at pahinante ng van kaya’t kinumpiska ang mga produkto.
Nakasulat sa mga kahon ang “Product of China”, ngunit ayon kay Culaste ay hindi pa tiyak kung smuggled ang mga ito.—sa panulat ni Hyacinth Ludivico
Nagpositibo sa covid-19 ang ilang naka-assign sa pagbabakuna sa Naga City.
Ayon kay City Health Officer Dr. Butch Borja, kabilang ito sa problemang kinahaharap nila ngayon kung kaya’t sinisikap nila na hindi na lumala pa ang sitwasyon.
Napuna kasi ng lokal na pamahalaan ang sistema ng pagbabakuna sa mega vaccination facility Jesse M. Robredo o JMR coliseum.
Minsan umano ay magulo ang pila dahil nagkakahalo ang mga tatanggap ng first dose at second dose kaya’t tumatagal ang pila.
Nangako naman si Incident Management Team Commander Renne Gumba na aayusin ang sistema sa naturang pasilidad.—sa panulat ni Hyacinth Ludivico
Dumating sa Pilipinas ang halos 400,000 doses ng Pfizer-biontech COVID-19 vaccine.
Lumapag ang eroplang may dala ng 391,950 doses ng Pfizer vaccines sa Ninoy Aquino International Airport Terminal 3 dakong 10p.m nitong miyerkules.
Ayon kay Vaccine Czar Secretary Carlito Galvez Jr., ipapamahagi ang naturang bakuna sa region 3 at 4.
Sa ngayon aabot na sa halos 70 milyong doses ng bakuna ang dumating sa bansa.—sa panulat ni Hya Ludivico