HEADLINES

Nakatakdang bilhin ng pamahalaan ang tatlong bagong C-130 plane sa mula sa ibang bansa.

Ito ay matapos hilingin ng Philippine Air Force na isama sa budget ang pagbili ng mga eroplano na ginagamit para sa pagresponde ng pamahalaan sa mga problema ng bansa.

Ang tatlong brand new C-130 cargo plane ay malaking tulong sa pagresponde sa mga kalamidad gayundin sa pag-uwi ng mga Overseas Filipino Worker sakaling ipasundo ng pamahalaan.—sa panulat ni Angelica Doctolero

Aprubado na ni Pangulong Rodrigo Duterte hiling ng Commission on Higher Education na payagan ang limitadong face to face classes para sa limang iba pang degree programs sa kolehiyo.

Epektibo ang limitadong face to face classes sa mga lugar na nasa ilalim ng modified general community quarantine.

Sa kasalukuyan, tanging health sciences at medicine ang pinapayagan ng gobyerno na magsagawa ng klase.

Ayon kay CHED Chairman Prospero De Vera III, pinayagan ng pangulo ang engineering and technology programs; hospitality o hotel and restaurant management; tourism o travel management; marine engineering at marine transportation.

Batay anya sa kanilang iprinesentang ebidensya sa IATF ay maliit na porsyento lamang ng mga estudyante at guro sa mga nasabing kurso ang dinapuan ng COVID-19 dahil sa mahigpit na protocols. —sa panulat ni Drew Nacino

Halos 800 mga pamilya mula sa Barangay Tananzang at Barangay Palavilla sa Lutayan, Sultan Kudarat ang naapektuhan ng pananalasa ng flash flood.

Ayon kay Lutayan Municipal Disaster Risk Reduction Officer Al Ryan Limbo, tumagal ng higit tatlong oras ang naranasang pagbaha sa lugar.

Karamihan aniya sa mga pamilya ay agad na nakabalik sa kanilang mga tahanan maliban sa 12 pamilya na nasa evacuation pa rin matapos mapinsala ang kanilang mga bahay.

Wala namanng napaulat na nasaktan o namatay dahil sa naganap na flash flood.—sa panulat ni Hya Ludivico

Kinumpirma ng DOH-Sorsogon na mayroong naitalang walong kaso ng delta variant sa lalawigan.

Nabatid na lima dito ay aktibong kaso habang ang tatlo naman ay gumaling na.

Bukod sa nasabing variant ay may naitala ring pitong kaso ng beta variant at limang Alpha variant.

Ayon sa datos ng DOH-Bicol, umabot na sa 78 kaso ng delta variant ang naitala sa rehiyon, 70 beta variant at 35 Alpha variant.

Sinabi naman ng kagawaran na ang mga datos ay batay sa mga specimen na naisumite sa Philippine Genome Center o PGC at hindi pa umano ito ang kabuuang variants of concern na umiikot na sa rehiyon.—sa panulat ni Hya Ludivico

Bukas ang ilang gobernador na luwagan na ang restrictions sa domestic air travel ng mga biyaherong fully vaccinated na laban sa COVID-19.

Iginiit ni Presidential Adviser for Entrepreneurship Joey Concepcion na kailangan nang simulan ang pagbubukas sa mga tourism site kung kaya’t nakipag-ugnayan na sila sa iba’t ibang lokal na opisyal.

Aniya, masyadong magastos ang RT-PCR tests kaya’t nakikiusap silang tanggalin na ito bilang requirement sa mga pasaherong fully vaccinated.

Ang mga pasahero namang hindi pa bakunado ay kinakailangan pa ring magpakita ng negative RT-PCR test result.

Maliban dito ay, hiniling din ni Concepcion sa Inter Agency Task Force na bawasan na ang quarantine period sa international travelers mula sa North America gayundin sa vaccinated overseas workers.

Sa panukala ni Concepcion, maaaring gawing limang araw na lamang ang quarantine mula sa 10.—sa panulat ni Hya Ludivico

Sang-ayon ang ilang health experts na palawigin pa ang implementasyon ng alert level 4 status sa Metro Manila.

Ito ay kahit na gumaganda na ang datos ng COVID-19 sa rehiyon.

Ayon sa Department Of Health, nananatiling mataas ang health care utilization rate sa kamaynilaan habang high risk pa rin ang 10 siyudad dito.

Sinabi naman ni Philippine College of Physicians President Maricar Limpin na mainam na manatili sa alert level 4 ang NCR upang mapababa ng husto ang mga kaso ng COVID-19.

Umapela naman ang Metropolitan Manila Development Authority at ilang mga Alkalde sa DOH na bilisan ang pagbibigay ng datos para sa pagpapatupad ng tamang aksyon.

Pinaalalahanan naman ng mga awtoridad ang mga residente na sundin ang minimum health protocols upang alisin na ang alert level 4 sa NCR—sa panulat ni Hya Ludivico

Ipinagpaliban na ng korte suprema ang bar examinations na nakatakda sana ngayong taon.

Sa bar bulletin ni Bar Chairperson at Supreme Court Associate Justice Marvic Leonen, sa halip na tuwing Nobyembre, iniatras ang pagsasagawa ng pagsusulit sa Enero 16, 23, 30 at Pebrero 6, 2022.

Nagdesisyon ang SC na suspendihin ngayong taon ang bar exams matapos ikonsidera ang kasalukuyang sitwasyon sa bansa dahil sa COVID-19 pandemic.

Gayunman, magpapatuloy ang lahat ng preparasyon para sa gaya ng pagpili ng bar applicants ng kanilang testing venue at pag-download sa secure exam delivery program at iba pang preparatory activities.

Ang 2020-2021 bar exams ang magiging kauna-unahang digitized, localized at protoctored bar examinations sa bansa.—sa panulat ni Drew Nacino

Pinabulaanan ng Bangko Sentral ng Pilipinas (BSP) ang kumakalat na text message na ititigil na ang paggamit ng P20 bill simula sa Disyembre 31, 2021.

Nilinaw ni BSP Governor Benjamin Diokno na ligal pa rin ang paggamit ng P20 bill sa mga transaksyon kahit tinanggal na ito sa circulation o hindi na gumagawa ng mga banknote nito.

Bagaman ang P20 na papel ang pinaka-ginagamit na denominasiyon sa sirkulasyon ng pera sa bansa, dapat anyang ma-re-circulate ang mga P20 coin na itinatabi ng ilang tao sa kanilang mga para sa kanilang savings.

Disyembre 2019 nang ilabas ng BSP P20 barya kung saan nakaukit sa isang panig nito si dating Pangulong Manuel Quezon, habang ang BSP logo, Malakanyang at nilad plant sa kabila. —sa panulat ni Drew Nacino

Dapat na ring maghanda ang mga Local Government Unit sa labas ng National Capital Region sa implementasyon ng alert level system.

Ito ang ipinaalala ng Union of Local Authorities of the Philippines o ULAP upang hindi umano magkabiglaan sa oras na ipatupad din ang kahalintulad na sistema sa ibang probinsiya.

Sa laging handa public briefing, inihayag ni ulap Chairman at Quirino governor dakila Cua na kailangang ituro na agad ang bagong sistema upang maka-adapt ang mga LGU.

Magugunitang isinailalim ang Metro Manila sa pilot implementation ng alert level system simula Setyembre 16 hanggang bukas, Setyembre 30.

Sinabi naman ni National Task Force Spokesman Restituto Padilla na dapat ay magsilbing aral na umano ang naranasan noon na agarang pag-anunsyo ng alert level system nang hindi pa naihahanda ang kaukulang panuntunan dito.—sa panulat ni Drew Nacino