HEADLINES

Tiniyak ng lokal na pamahalaan ng Quezon City na makakatanggap ng ayuda ang mga residenteng apektado ng krisis bunsod ng pandemiya.

Sa tulong ng Kalingang Kyusi sa Negosyo’ Program ng pamahalaang lokal ay mabibigyan ng tulong pinansyal ang aabot sa 114  na residente sa lungsod.

Ayon kay Quezon City Mayor Joy Belmonte, layunin ng programa na matulungang makabangon ang mga negosyong lubhang naapektuhan bunsod ng COVID-19 pandemic.—sa panulat ni Angelica Doctolero

Nagbigay ng reaksiyon si Blue Ribbon Committee Chairman Senator Richard Gordon kaugnay sa naging pahayag ni Pangulong Rodrigo Duterte sa kaniyang naging Talk to the People.

Sa naging pahayag ng Pangulo, nais niyang iutos sa mga militar ang pagbabantay sa May 2022 national election para sa malinis, tahimik at maayos na pagboto ng mga botante.

Ayon kay Gordon, hindi tamang gamitin o makialam ang mga sundalo sa pagdaraos sa darating na eleksiyon.

Sinabi pa ni Gordon na tungkulin lamang ng mga mililitar na protektahan at ipaglaban ang bansa laban sa external threat.—sa panulat ni Angelica Doctolero

Nanawagan sa pamahalaan ang Office of the Vice President na pabilisin ang pagbabakuna sa mga lalawigan sa bansa.

Ayon kay Vice President Leni Robredo, dapat na matutukan din ang kaso sa mga lalawigan dahil mas kulang ang kanilang kagamitan lalo na pagdating sa pagbabakuna.

Hirap din ang mga LGUs sa pagsasagawa ng swab test dahil kulang ang kanilang mga gamit at hindi sapat ang mga health workers dahilan para mapilitan silang bumiyahe para sa resulta ng mga swab test sa kanilang lugar.

Aniya, dapat na mas palakasin pa ng gobyerno ang pagbabakuna partikular sa mga rehiyon na mabagal ang paghahatid ng mga bakuna.—sa panulat ni Angelica Doctolero

Inaprubahan na ng Land Transportation Franchising and Regulatory Board o LTFRB ang pagbiyahe ng karagdagang mga shuttle service at public utility vehicles sa pampublikong lugar.

Aabot sa 11 shuttle at 55 na mga jeep ang pinayagang umarangkada sa 519  na mga ruta sa Metro Manila

Nilinaw naman ng LTFRB na pawang mga road worthy public vehicles lamang ang maaaring makabiyahe sa gitna ng granular lockdown.—sa panulat ni Angelica Doctolero

Dalawang linggo nang walang natatanggap na suplay ng COVID-19 vaccine ang Puerto Galera sa Oriental Mindoro dahilan para matigil ang bakunahan ng first dose doon.

Ayon kay Puerto Galera Mayor Rocky Ilagan, halos lumuhod na siya sa Department Of Health para sa suplay ng bakuna dahil tanging laman ng kanilang ultra low temperature freezer sa ngayon ay mga bakunang nakalaan para sa second dose.

Iginiit ni Ilagan na kailangan nilang mabakunahan ang economic frontliners dahil sa turismo nakasalalay ang kabuhayan ng mga residente.

Aniya, sumulat na sila sa DOH para sa dagdag na bakuna.

Aminado naman ang Department Of Health-Mimaropa na mabagal ang pagdating ng bakuna sa kanilang lugar.

Nangako ang Regional Director ng DOH-Mimaropa na magpapadala ng bakuna sa susunod na linggo sa Puerto Galera.—sa panulat ni Hya Ludivico

Tinamaan ng COVID-19 ang 12 mongha sa Carmel of Mary, Star of the Sea Monastery sa Tanay, Rizal .

Ayon kay Carmelite Monastery Spiritual Adviser Fr. Miguel Condes, ilan sa mga ito ay asymptomatic, habang ang ilan naman ay nakararanas ng mild symptoms.

Lahat ng mongha ay fully vaccinated na laban sa COVID-19 maliban sa isa na sumasailalim sa chemotherapy.

Sa ngayon ay naka-quarantine sa loob ng naturang monasteryo ang mga nagpositibong mongha.—sa panulat ni Hya Ludivico

Aprubado na ni Pangulong Rodrigo Durterte ang pagbabakuna kontra COVID-19 sa general public at sa mga kabataan sa Oktubre.

Ito ayon kay Presidential Spokesperson Harry Roque, ay alinsunod na rin sa rekomendasyon ni NTF Chief Implementer Secretary Carlito Galvez Jr.

Kaugnay nito, hinihikayat ni Roque ang mga magulang ag mga maghanda nang ipalista ang kanilang anak para sa pagsisimula ng pagbabakuna.

Una rito, tiniyak ni Pangulong Duterte na mas paiigtingin ng pamahalaan ang vaccination program nito sa susunod na buwan.—sa panulat ni Hya Ludivico

Nalansag ng pinagsanib na puwersa ng militar at pulisya ang kuta ng New People’s Army o NPA sa Brgy. Mamaclay, Gapan City sa Nueva Ecija.

Ayon kay P/Col. Fitz Macariola, Commander ng Regional Mobile Force Battalion ng Central Luzon PNP, bahagi ito ng anti-insurgency campaign ng AFP at PNP sa rehiyon.

Bagama’t walang naarestong rebelde sa lugar, nakuha naman mula sa kanilang kuta ang samu’t saring mga sangkap sa paggawa ng bomba.

Kabilang sa mga nakuha rito ang dalawang piraso ng 9 volts na baterya, 10 piraso ng Non Electric Blasting Cap, apat na Electric Blasting Cap, isang time fuze, dalawang toggle switch, anim  na resistor, dalawang crocodile clip at dalawang PVC pipe improvised landmine.—sa panulat ni Hya Ludivico mula sa ulat ni Jaymark Dagala (Patrol 9)

Kasabay ng paghahain ng Certificate Of Candidacy, magpapatupad ng one way traffic scheme sa paligid ng Cultural Center of the Philippines, sa Pasay City simula sa Biyernes, Oktubre 1.

Ito’y bilang bahagi ng May 9, 2022 national at local elections.

Ayon sa MMDA, tatagal ng walong araw ang one way traffic scheme na magsisimula ala-5 ng umaga hanggang Oktubre 8.

Kabilang sa mga apektado ang atang Dela Rama Street mula Vicente Sotto Street hanggang Buendia Avenue;Buendia mula A. Dela Rama hanggang Jalandoni Street at Jalandoni mula Buendia hanggang V. Sotto.

Pinayuhan naman ng MMDA ang mga motorista na dumaan na lamang sa mga alternatibong ruta.—sa panulat ni Drew Nacino

Mas epektibo umano ang mga lokal na pamahalaan pagdating sa COVID-19 response kaya’t dapat na lamang buwagin ang Inter-Agency Task Force o IATF.

Ito, ayon kay Senator Joel Villanueva,ang kanyang radikal na ideya upang labanan ang nakahahawang sakit.

Sa budget hearing ng DTI sa Senado, inihayag ni Villanueva na mas kabisado ng mga LGU ang sitwasyon sa kani-kanilang lugar.

Ito, rin anya, ang dahilan kaya’t mas alam ng mga LGU ang angkop na hakbang upang ma-kontrol ang hawahan ng COVID-19 at paano matutulungan ang mga apektadong  lugar at pamilya.

Gayunman, nilinaw ni Villanueva na ang kanyang panukala ay dapat magsilbi lamang “option” at upang mapalakas ang loob ng mga LGU dahil mas epektibo ang kanilang pagtugon sa pandemya kaysa sa IATF.—sa panulat ni Drew Nacino mula sa ulat ni Cely Ortega-Bueno (Patrol 19)