HEADLINES

Wala pang ebidensya na mag-uugnay kina Pangulong Rodrigo Duterte at Senator Bong Go sa Pharmally Pharmaceutical Corporation.

Ayon kay Senator Panfilo Lacson, sa ngayon ang nauugnay sa Pharmally ay si Michael Yang, ang kaibigan at dating economic adviser ng Pangulo.

Maaari anyang magkaroon ng espekulasyon sa kaugnayan ni Pangulong Duterte dahil matagal na itong kaibigan ni Yang subalit kailangan ay ebidensya na magpapatunay nito.

Gayunman, kinuwestyon ng Senador ang pagdepensa ng Pangulo sa mga taong sangkot sa kontrobersya kapag humaharap sa kanyang talk to the people.

Binatikos din ng mambabatas ang mga miyembro ng kamara na bumabanat sa imbestigasyon ng Senado at nagsagawa rin ng sariling hearing sa Pharmally upang protektahan ang interes ng Malakanyang.

Binalewala na anya ng mababang kapulungan ng Kongreso ang inter-parliamentary courtesy o ang dapat na paggalang ng Senado at kamara sa isa’t isa.—sa panulat ni Drew Nacino mula sa ulat ni Cely Ortega-Bueno (Patrol 19)

Walang magagawa ang Department of Trade and Industry sa mataas na presyo ng mga bilihin sa mga convenience store.

Ito ang inamin ni Trade Secretary Ramon Lopez sa budget hearing sa Senado kasabay ng paggiit na iba ang market system ng mga convenience store na may mataas na production cost dahil bukas 24 oras.

Ayon kay Lopez, nagbibigay din ang mga nasabing establisyimento ng convenience dahil available sa maraming lugar at sa mga residential area at hindi regulated ng DTI o saklaw ng suggested retail price.

Una nang pinuna ni Senator Imee Marcos ang doble hanggang tripleng presyo sa mga convenience store kaya’t dapat gumawa ng paraan ang DTI lalo’t marami ring mahihirap na nagtutungo sa mga convenience store.

Bilang tugon, pinayuhan naman ni Lopez, partikular ang mga nagtitipid, na pumunta na lamang sa mga supermarket upang makamura dahil 100% ang compliance ng mga ito sa SRP.—sa panulat ni Drew Nacino mula sa ulat ni Cely Ortega-Bueno (Patrol 19)

Walang nakikitang dahilan ang palasyo upang tanggihan ni Pangulong Rodrigo Duterte ang batas na naglalayong palawigin ang voter registration period para sa 2022 elections.

Ito ang tugon ni Presidential Spokesman Harry Roque sa ipinasang batas ng dalawang kapulungan ng Kongreso na “isang buwang extension” ng voter registration.

Ayon kay Roque, hindi pa nakararating sa Malakanyang papel pero wala silang nakikitang hadlang maliban na lamang sa pag-aaral ng legal department ng Office of the Executive Secretary na may legal objection.

Ang voters’ registration para sa eleksyon 2022 ay magtatapos bukas, Setyembre 30.

Bagaman tiniyak ni COMELEC Spokesman James Jimenez ang pagtalima sa ipapasang batas, mauurong naman ang schedule of activities kung palalawigin ang registration. —sa panulat ni Drew Nacino

Aprubado na sa botong 196 sa ikatlo at huling pagbasa sa kamara ang panukalang pagtatayo ng kauna-unahang Mental Health Clinic sa bansa.

Sa ilalim ng House Bill 9980, na ipinanukala ni San Jose Del Monte City, Bulacan Rep. Rida Robes, magtatayo ng isang mental health clinic na popondohan at pangangasiwaan ng pamahalaang lungsod katuwang ang Department Of Health.

Ayon kay Robes, napapanahon ang pagpasa sa naturang panukala sa gitna ng napakaraming kinakaharap na problemng may kaugnayan sa COVID-19 pandemic.

Una nang inihayag ni DOH – National Health Program Head Prescila Cuevas na lumaki rin ang bilang ng mga Pilipinong dumaranas ng problema sa pag-iisip na aabot na sa halos 3.6 milyon.

Alinsunod sa bill, itatayo ang san Jose Del Monte Mental Wellness Center na magkakaloob ng mga serbisyo, kabilang ang pagbibigay ng payo, therapy, pagpapayo sa krisis at panghihimasok, pagbibigay ng gamot, pagsusuri at pamamahala at group therapy. —sa panulat ni Drew Nacino

Naglabas na ang liberal party ng initial list ng mga planong patakbuhin sa 2022 national elections.

Ito’y matapos ang inilunsad na National Executive Council meeting ng partido liberal.

Pasok sa inisyal na listahan sina Senators Francis “Kiko” Pangilinan, Leila De Lima at dating Senador Bam Aquino.

Ine-endorso na rin ng LP ang kandidatura ng kanilang “guest” senatorial candidates na sina Senador Risa Hontiveros mula sa Akbayan Party-List at Human Rights Lawyer Chel Diokno.

Gayunman, hindi pa naglalabas ng opisyal na plano si Aquino habang una nang nagdeklara si Diokno ng kanyang intensyong kumandidato muli sa pagka-Senador.—sa panulat ni Drew Nacino

Dagdag gastos na naman ang sasalubong sa mga consumer sa unang araw ng Oktubre dahil sa taas presyo sa Liquefied Petroleum Gas o LPG.

Asahan na sa Biyernes, ang P5 hanggang P6 na dagdag sa kada kilo ng LPG o P55 hanggang P66 sa kada regular na tangke.

Ayon kay Arnel Ty, Pangulo ng Regasco na kilalang supplier ng lpg, wala silang kontrol sa presyo ng lpg dahil iniimport pa ito.

Sa ngayon ay nasa $108 ang inilobo ng presyo sa international contract price ng LPG na pinakamataas na sa loob nang limang taon.

Pinayuhan naman ng Department Of Energy ang mga lpg manufacturers na hati-hatiin na lamang ang taas-presyo upang mabawasan angpasakit ng mga consumer.—sa panulat ni Drew Nacino

Bumaba sa 13,846 ang karagdagang COVID-19 cases na naitala ng DOH kahapon kaya’t sumampa na sa 2,522,965 ang total cases.

Sumadsad naman sa 132,139 ang active cases habang nasa 39,980 ang naitalang recoveries kaya’t sumirit sa 2,353,140 ang lahat ng gumaling.

Nadagdagan naman ng 91 ang mga namatay kaya’t umakat na sa 37,686 ang total death toll.

Samantala, pitong laboratoryo ang hindi nakapagsumite ng datos sa COVID-19 document repository system.—sa panulat ni Drew Nacino

Inihayag ni Pangulong Rodrigo Duterte na isa sa malaking tulong sa pagbalik normal sa sitwasyon ng bansa ay ang pakikipagtulungan ng publiko sa pagbabakuna.

Ayon sa Pangulo, mas mabilis maibabalik sa normal ang sitwasyon ng bansa kung lahat ng Pilipino ay fully vaccinated na.

Malaking tulong din ito sa pag-angat o pagbalik ng ekonomiya ng bansa matapos bumagsak dahil sa pandemiya.

Aminado naman si Pangulong Duterte na maaaring abutin pa ng ilang taon bago bumalik sa normal ang pamumuhay ng mga tao sa bansa.—sa panulat ni Angelica Doctolero

Nagbigay ng tatlong buwang palugit ang Meralco sa mga consumer na hindi pa nakakabayad ng bill sa kanilang kuryente sa gitna ng ipinatupad na granular lockdown.

Ayon sa Meralco, maaring gawing hulugan ang pagbayad sa mga bill na natengga at hindi nabayaran ng mga consumer bunsod ng COVID-19 pandemic.

Nilinaw din ng Meralco na hindi sila magpuputol ng kuryente sa mga lugar na nasa ilalim ng granular lockdown.—sa panulat ni Angelica Doctolero