Umabot na sa 6,058 aftershocks ang naitala ng PHIVOLCS hanggang Lunes ng umaga, Hunyo 15, isang linggo matapos ang magnitude 7.8 na offshore na lindol na yumanig sa Sarangani at iba pang bahagi ng Mindanao.
Ayon sa ahensya, ang mga aftershock ay may lakas na mula magnitude 1.2 hanggang 6.4.
Patuloy namang binabantayan ng mga awtoridad ang sitwasyon habang isinasagawa ang mga hakbang para sa kaligtasan at pagbangon ng mga apektadong komunidad.
Bahagyang tataas ang singil sa kuryente ng Meralco sa paparating na billing ng Hunyo 2026.
Ayon sa Meralco, madaragdagan kinse sentimos kada kilowatt-hour ang singil sa kuryente dahil sa pagtaas ng generation charge.
Sinabi pa ng kumpanya na dulot ito ng serye ng yellow at red alerts na naitala sa Luzon Grid noong buwan ng Mayo.
Dahil dito, tinatayang may dagdag na trenta pesos sa bill ng mga bahay na kumo-konsumo ng 200 kilowatt-hours; habang aabot naman sa kwarenta’y-singko pesos ang dagdag-singil sa mga bahay na aabot sa 300 kilowatt-hours ang konsumo.
Inaasahang nasa sisenta pesos ang dagdag-bayarin ng mga bahay na gumagamit ng 400 kilowatt-hours; habang sitenta’y kwatro sentimos naman sa mga bahay na aabot sa 500 kilowatt-hours ang konsumo.
Inaasahang mararamdaman ng mga customer ang nasabing pagtaas sa kanilang billing ngayong buwan ng Hunyo.—sa panulat ni Anjo Riñon
Pormal na ring nagsampa ng cyber libel complaint sa Office of the City Prosecutor sa Marawi City si Lanao del Sur Rep. at House Trial Spokesperson Zia Alonto Adiong laban kay Atty. Levito Baligod at sa mga binansagang “18 Maleta Boys” ni dating Cong. Zaldy Co.
Ginawa ang paghahain ng reklamo bunsod umano ng kontrobersyal na paghahatid ng mga maletang puno ng pera sa Marawi City.
Batay sa dokumentong natanggap ng National Prosecution Service ng Department of Justice sa Marawi City, ibinatay ang inihain na kaso ni Adiong sa Article 355 ng Revised Penal Code kaugnay ng Republic Act 10175 o Cybercrime Prevention Act of 2012.
Binigyang-diin ni Adiong na dapat managot ang sinumang gumagawa ng maling impormasyon at walang basehang paratang, lalo na kung ito ay ipinapakalat sa online platforms.
Aniya, malinaw na nagpapakalat lamang ng mali at malisyosong mga paratang ang mga respondent.
Nilinaw ni Adiong na kailanman, hindi niya personal na nakita o nakausap ang 18 bag man at hindi siya tumatanggap ng anumang maleta na may lamang pera mula kaninoman.
Dagdag pa ng mambabatas, ang akusasyon laban sa kanya ay nagdulot ng kahihiyan at “severe mental anguish” o pagkasira sa kanyang reputasyon.
Aabot naman sa P25 million ang kabuuang danyos na hinihingi ni Adiong kasabay ng paggiit na ang mga paratang na nag-uugnay sa kanya sa umano’y mga maletang may lamang pera ay mga “gawa-gawang kwento” na nakasira sa kanyang reputasyon at pangalan.
Sa ngayon, hinihintay pa ang susunod na hakbang ng piskalya kaugnay sa reklamong inihain at ang posibleng pagsusumite ng mga kontra-salaysay ng mga respondent.| via Geli Mendez (Patrol 30)
Pormal nang ipinakilala ng House Prosecution Panel ang unang batch ng private prosecutors na kanilang magiging katuwang para sa nalalapit na impeachment trial laban kay Vice President Sara Duterte.
Pinangunahan ni House Lead Prosecutor at Batangas Rep. Gerville Luistro ang pag-aanunsyo ng listahan ng mga pribadong abogado na boluntaryo at pro bono’ng tutulong sa kanila.
Kabilang sa mga ipinakilala ay mga nagmula sa Pecabar Law, partikular sina:
Sa bahagi naman ng Kapunan and Castillo Law, ipinakilala sina Atty. Lorna Patajo-Capunan,
At ang pinakahuli ay nagmula sa Sapayan Lim Alvares & Ligutan (SALIGAL) Firm na si Atty. Amando Virgil Ligutan, na legal counsel rin ng mga complainant sa ikatlong impeachment complaint laban sa Bise Presidente.
Ayon kay Luistro, posible pang madagdagan ang bilang o batch ng private prosecutors at hindi sila sigurado kung ilan ang madadagdag dahil marami aniya ang nais mag-volunteer bilang mga private prosecutor.
Aniya, mas tiwala ngayon ang House Prosecution Panel sa presensya ng private prosecutors tungo sa transparency at accountability.
Handa aniya ang mga private prosecutor na tulungan ang House Prosecution Team at suportahan ang mandato ng Konstitusyon. | via Geli Mendez (Patrol 30)
Isinailalim na sa State of Calamity ang bayan ng Alabel sa Sarangani dahil sa matinding pinsala dulot ng magnitude 7.8 na lindol na tumama sa lalawigan nitong Lunes ng umaga.
Sa isang social media post, inanunsyo ng Alabel Information Office ang resolusyon ng Sangguniang Bayan, at hinimok ang mga residente na manatiling alerto habang nagpapatuloy ang assessment at response operations.
Bukod dito, nagdeklara na rin ng State of Calamity si Glan, Sarangani Vice Mayor James Yap Junior.
Ang deklarasyon ng State of Calamity ang magbibigay daan upang agad na maipalabas ang disaster response funds at nagbibigay ng emergency powers sa lokal na pamahalaan na makatutulong sa pagtugon sa pangangailangan ng mga residente. – mula sa panulat Reianne Antiquina
Pinag-uusapan na ng Pilipinas at Egypt ang pagpapalawak ng ugnayang pangkalakalan upang mapalakas ang ekonomiya ng dalawang bansa.
Ayon kay trade secretary Maria Christina Roque, kabilang sa mga produktong pinag-aaralan para sa posibleng kasunduan ang bulak mula Egypt at mga produktong agrikultural tulad ng gulay.
Naganap din ang pagpupulong ni Secretary Roque kay Egyptian Ambassador Nader Zaki upang talakayin ang mga paghahanda sa pagbisita ni Egyptian foreign minister Badr Abdelatty kaugnay sa posibleng business roundtable.
Layunin ng Pilipinas at Egypt na palakasin pa ang economic engagement at magbukas ng mas maraming oportunidad para sa kalakalan at pamumuhunan. - mula sa panulat ni Jordan Gutierrez
Ibinunyag ni senador Bam Aquino na malapit nang makumpleto ng Majority Bloc ni acting Senate President Sherwin Gatchalian ang kinakailangang 13 boto upang ligal na mahalal bilang bagong senate president.
Ayon kay senador Aquino, posibleng mabuo ang kanilang bilang sa oras na magsagawa ng special session ang senado ngayong buwan.
Matatandaang nagsimula ang tunggalian sa liderato ng senado nitong nakaraang linggo sa pagitan nina Acting SP Gatchalian at Senate President Alan Peter Cayetano.
Bagaman nagsagawa ng sesyon nitong June 3 na dinaluhan ni senador Francis Escudero, mula sa pag-boycott ng dating majority bloc, hindi pa rin nakapag-halal ng bagong senate president dahil 12 lamang ang miyembro ng kampo ni acting SP Gatchalian. - mula sa panulat ni Jordan Gutierrez
Itinakda na ng Senate Impeachment Court ang Pre-Trial Conference sa impeachment case laban kay Vice President Sara Duterte sa Hunyo 18.
Batay ito sa abiso na inilabas ng impeachment court kahapon, Hunyo 9, kung saan tatayo bilang presiding officer si Acting Senate President Sherwin Gatchalian.
Pinadadalo naman ng Senate Court si VP Sara at ang public prosecutors ng Kamara sa nasabing pre-trial, alas-9 ng umaga sa Claro M. Recto room ng Senado.
Tatalakayin sa isasagawang conference ang mga issue tulad ng stipulation of facts, simplification of issues, listahan ng testigo, at schedule mismo ng paglilitis. – mula sa panulat ni Jordan Gutierrez
Pinalawig ng Bureau of Internal Revenue ang deadline para sa tax filing, payment, at submission para sa mga taxpayer sa mga lugar na apektado ng malakas na lindol sa Mindanao.
Sa ilalim ng Memorandum Circular No. 62-2026, saklaw ng pinalawig na deadline ang mga nakarehistro sa Revenue District Office 11 o General Santos City, at Sarangani, at RDO 12 o South Cotabato. Nakasaad din sa memorandum na iniurong sa June 30 ang lahat ng deadline na nakatakda mula June 8 hanggang 29.
Ayon sa BIR, hindi papatawan ng penalties, surcharge, at interes ang mga taxpayer basta’t makasusunod sila sa pinalawig na petsa. Layunin ng hakbang na mabigyan ng sapat na panahon ang mga indibidwal at negosyo habang nagpapatuloy ang recovery efforts sa mga naturang lugar. – mula sa panulat ni Reianne Antiquina
Tiniyak ng Department of Energy (DOE) na nananatiling “stable” at sapat ang suplay ng langis sa Southern Mindanao kasunod ng magnitude 7.8 na lindol na yumanig sa rehiyon nitong Hunyo 8.
Ayon kay energy secretary Sharon Garin, walang dahilan ang publiko para magpanic-buying o mag-imbak ng labis na suplay ng gasolina at iba pang produktong petrolyo.
Nakikipag-ugnayan na rin anya ang ahensya sa mga kumpanya ng langis at mga lokal na pamahalaan upang mapabilis ang pagbabalik-operasyon ng mga pasilidad na naapektuhan ng lindol.
Batay sa pagsusuri ng DOE, halos lahat ng pangunahing bulk terminals, depots, storage facilities, at LPG refilling plants sa Regions 11 at 12 ay nananatiling operational.
Sa kabuuang 3,298 na gas stations sa Regions 9, 11, at 12, 47 lamang ang pansamantalang sarado dahil sa minor structural damage, pagkawala ng kuryente, o patuloy na safety evaluations.