Inatasan ni Senador Panfilo Lacson ang Philippine National Police na iharap sa pagdinig ng Senado si PO1 Vincent Tacorda.
Si Tacorda ay nagsumite ng affidavit noong Mayo ng taong ito kung saan ibinunyag niya na inatasan sila ng kanilang Provincial Director sa Catanduanes na mag-deliver ng lima hanggang sampung patay na drug personalities upang lumabas na accomplishment ng kanilang grupo.
Ayon kay Lacson, mahalagang maiharap sa pagdinig si Tacorda upang magbigay linaw sa kanyang ibinunyag at sa pagbawing ginawa niya sa kanyang mga ibinunyag.
Binasa ni Lacson sa pagdinig ng Senado ang anya’y liham ni Tacorda kalakip ang affidavit kung saan binabawi niya ang mga nasabi niya sa una niyang affidavit laban sa PNP.
PAKINGGAN: Bahagi ng liham ni resigned PO1 Vincent Tacorda na binasa ni Senator Panfilo Lacson
Matatandaang ibinunyag ni Tacorda kung paano sila inatasan ng kanilang provincial director na pumatay ng lima hanggang sampung drug personalities upang palabasing accomplishment ng PNP sa probinsya.
Sa affidavit ni resigned PO1 Vincent Tacorda ng Virac Catanduanes, tinukoy niya ang isang PD Martirez at PO1 Bagay na nagbigay sa kanya ng kautusan na pumatay ng drug personalities.
Sinabi ni Tacorda na inamin sa kanila ng kanilang PD o Provincial Director na masisibak ito sa posisyon kapag walang napatay na drug personalities sa kanyang nasasakupan.
Ayon kay Tacorda, mistula silang isang team na may kanya kanyang papel sa pagpatay ng drug personalities.
Siya aniya ang itinalagang shooter, isang intel operative ang sumusubaybay sa target, merong sa logistics tulad ng gagamiting motorsiklo sa kanilang operasyon at iba pang gamit tulad ng folder na may nakasulat na pusher ako huwag tularan na iiwan nila sa labi ng kanilang target.
Ang affidavit ni Tarcorda ay ipinabasa ni Senador Antonio Trillanes kay Claire Fuentes, Committee Secretary ng Senate Committee on Public Order and Dangerous Drugs.
—-