Krystine Belen

Pinangunahan ni Pangulong Ferdinand Marcos Jr. ang paggunita sa ika-160 anibersaryo ng kapanganakan ng bayaning si Apolinario Mabini sa Apolinario Mabini Shrine sa Tanauan City, Batangas.

Sa kanyang talumpati, hinimok ni Pangulong Marcos ang mga kabataan na gawing inspirasyon at halimbawa si Mabini upang magtagumpay sa buhay.

“Ang kaniyang ipinamanang lakas ng loob ay nabubuhay sa kanila at sa maraming Pilipino na patuloy na nag-aalay ng kanilang husay at talento para sa patuloy na pag-unlad ng Pilipinas. Tinatawagan ko ang mga kabataang Pilipino ngayon na gawing inspirasyon at halimbawa ang buhay ni Apolinario Mabini upang magpunyagi sa buhay,” saad ng pangulo.

Dagdag pa niya, patunay ang tinaguriang “Dakilang Paralitiko” na may kakayahang gumawa ng pagbabago ang bawat isa, sa kabila ng iniindang kalagayan o anumang pagsubok.

Kaugnay nito, inihayag din ni Pangulong Marcos ang kanyang hangarin na maunawaan ng bagong henerasyon ang mga pilosopiyang pampulitika at panlipunan ni Mabini upang makatulong sa pagsulong ng bansa.

Halos P1 billion na halaga ng tulong pinansyal, serbisyo, loan assistance, at subsidies ang ipinamahagi ng administrasyon ni Pangulong Ferdinand Marcos Jr. sa mga magsasaka at mangingisdang apektado ng El Niño sa Palawan at Marinduque.

Batay sa ulat, umabot sa P60 million ang ibinigay na ayuda sa Palawan, habang P39.13 million naman sa Marinduque.

Mula mismo sa Office of the President, nakatanggap ng tig-P10,000 ang ilang magsasaka, mangingisda, at pamilyang nasalanta ng matinding tagtuyot.

Bukod pa rito ang tig-P10,000 na nakuha ng higit 6,000 benepisyaryo ng Ayuda sa Kapos ang Kita Program (AKAP) ng Department of Social Welfare and Development (DSWD).

Naglaan naman ng P20 million na pondo ang Agriculture Credit Policy Council (ACPC) ng Department of Agriculture (DA) para sa Survival and Recovery Program; habang P30 million para sa kanilang Agri-Negosyo Loan Program.

Sama-sama ring nagpaabot ang National Irrigation Administration (NIA), Bureau of Fisheries and Aquatic Resources (BFAR), Technical Education and Skills Development Authority (TESDA), at Department of the Interior and Local Government (DILG) ng iba’t ibang tulong at serbisyo para sa mga mamamayan ng MIMAROPA.

Nilinaw ng Philippine National Police (PNP) na walang bahid ng politika ang ginawang reassignments sa Davao City Police Office (DCPO).

Matatandaang kamakailan lang, nagkaroon ng magkakasunod na palitan ng hepe sa City Police Office ng lungsod sa loob lamang ng isang araw.

Hindi lamang isa, hindi dalawa, kundi tatlong beses na pinalitan ang hepe sa DCPO sa loob ng 24 oras.

Unang itinalaga si Col. Lito Patay upang magsilbing officer-in-charge sa DCPO. Habang nagsasagawa ng command conference, nakatanggap siya ng balita na sinibak na siya sa posisyon.

Tumagal lamang siya ng 4 na oras at 38 minuto.

Agad siyang pinalitan ni Col. Sherwin Butil, dating head ng Police Regional Office (PRO) 11 Information and Communications Technology Management Division.

Ngunit bago maupo sa kanyang pwesto, bigla siyang sinabihan tungkol sa paghirang kay Col. Hansel Marantan bilang bagong acting DCPO director.

Ilang araw lamang bago ito mangyari, 19 station commanders ng PRO-11 ang inalis sa pwesto na siyang kinondena ni Mayor Baste Duterte.

Ayon kay PNP spokesperson Police Col. Jean Fajardo, walang anumang kakaiba sa nangyaring pagtatalaga ng tatlong opisyal sa iisang araw.

Aniya, nangyayari rin ito sa PNP unit. Pinayuhan niya ang publiko na huwag ikonekta ang naturang insidente sa anumang sitwasyon sa politika.

Dagdag pa ng PNP spokesperson, walang ibang dahilan sa pagkakatalaga sa pwesto ni Col. Marantan bilang acting DCPO director bukod sa kalidad at kwalipikasyon nito.

Pinuri ng Filipino billionaire at ports tycoon na si Enrique K. Razon Jr. ang administrasyon ni Pangulong Ferdinand Marcos Jr. dahil sa pagiging kaaya-aya nito sa mga negosyante, partikular na sa sektor ng enerhiya.

Sa isang panayam, binigyang-diin ni Razon na namumuhunan silang mga negosyante dahil inaalagaan ni Pangulong Marcos ang investment environment ng bansa.

“Kaya kami nag-decide mag-invest nang malaki, kasi nakikita namin na ang policy na inilalagay ni BBM ay makakabuti sa investment environment,” saad ni Razon.

Pinabulaanan din niya ang pahayag ng mga kritiko na nawawalan na umano ng tiwala ang investors sa bansa.

Ibinahagi rin ng tinaguriang “Ports King” na mahalaga ang mga polisiya ng pangulo tungkol sa pamumuhunan.

“Ngayon, naglalagay sila ng mga policy. Dati wala, kung anu-ano na lang. Ngayon nagtatayo sila ng framework para sa tamang policy para maayos lahat ng problema,” ani Razon.