Iginiit ni dating House Speaker at Leyte Representative Martin Romualdez na hindi siya kailanman humingi ng espesyal na pagtrato matapos banggitin ni Pangulong Ferdinand Marcos Jr., sa kaniyang SONA 2026 ang nalalapit na pagsasampa ng mga kaso laban sa kaniya kaugnay ng umano’y anomalya sa flood control project.
Ayon kay Romualdez, bagama’t masakit para sa kanilang pamilya ang pahayag ng Pangulo, iginagalang niya ito at handa siyang dumaan sa tamang proseso.
Aniya, wala siyang nilabag na batas at nakahanda siyang patunayan ang kaniyang pagiging inosente sa pamamagitan ng ebidensya.
Kaugnay nito, kabilang sa mga nahaharap sa kaso sa isyu ng flood control projects sina Senador Jinggoy Estrada, dating Senador Bong Revilla, at dating DPWH Secretary Manuel Bonoan.
Samantala, pinag-aaralan na ng Ombudsman na gawing state witness si Bonoan sa naturang kaso. | Sa panulat ni Reabelle Medina
