Judith Estrada-Larino

Tinawag na insensitive ni Supreme Court Associate Justice Marvic Leonen ang kumalat sa social media na litrato ng pagdiriwang ng kaarawan ni NCRPO Chief Major General Debold Sinas.

Sinabi ni Leonen na ang mga party ay maituturing na mass gatherings na mahigpit na ipinagbabawal sa ilalim ng social distancing rules.

Ayon kay Leonen isang private retirement ceremony sa pamamagitan ng teleconferencing ang isinagawa nila para kay Justice Andres Reyes, Jr. na 40 taong nagsilbi sa gobyerno.

Higit pa aniya rito ang deserve ni Reyes subalit ang ginawa nila ay yung nararapat lamang sa gitna na rin nang pagsasakripisyo ng taumbayan.

Nag-sorry na si NCRPO Chief Major General Debold Sinas sa idinaos na birthday party niya.

Kasunod na rin ito nang pagkalat sa social media ng mga litrato sa mismong birthday party ni Sinas sa kabila nang umiiral na enhanced community quarantine.

Ayon kay Sinas sobrang saya lamang niya sa ibinigay na mañanita o salubong sa kaniyang birthday subalit sumunod naman sila sa lahat ng mga dapat gawin base na rin sa anti COVID-19 measures na ipinatutupad ng gobyerno.

Ipinabatid pa ni Sinas na ilang kumalat na litrato sa social media ay edited at kinuha sa mga lumang post.

Binawi ng gobyerno ang pag-aalis ng community quarantine sa mga lugar na itinuturing na low risk sa COVID-19.

Nilinaw ni DILG Secretary Eduardo Año na ilalagay ang low risk areas sa modified general community quarantine (MGCQ) dahil maraming local chief executives, governors at mayors ang nagpetisyon at sinabing hindi pa sila handang tanggalin ang community quarantine sa kani-kanilang mga lugar.

Ayon kay Año maglalabas sila ng guidelines kung paano ipatutupad ng local government units ang modified GCQ upang magkaroon ng kapangyarihan ang mga ito na matigil ang pagkalat ng virus sa mga lugar na mayroon pa.

Kapag wala aniyang quarantine ay asahan na ang posibleng pagkakaruon ng second o third wave ng COVID-19.

Posibleng lumakas pa ang bagyong Ambo sa Biyernes.

Ayon sa PAGASA ang bagyong Ambo ay inaasahang tatawid sa paligid ng Ocampo, Camarines Sur sa Biyernes ng umaga.

Sinabi ng PAGASA na malaki ang posibilidad na mas lumakas pa ang bagyong Ambo kung saan ang signal number 1 ay nakataas na sa Northern Samar.

Hindi pa rin kontrolado ang transmission ng COVID-19 sa kabila ng mga pagbabago sa implementasyon ng community quarantine sa iba’t-ibang lugar.

Nilinaw ito ni Health Undersecretary Maria Rosario Vergeire kaya’t kailangang magpatupad ng minimum health standards bagamat mayroong ilang lugar na natukoy bilang low risk.

Sinabi ni Vergeire na ang adjustments ng ibang lugar mula enhanced community quarantine (ECQ) patungong general at modified ECQ ay mayroon pa ring kaakibat na panuntunan para matiyak na ligtas ang mga tao mula sa pagkalat ng sakit

Iniiwasan kasi aniya ng gobyerno ang sinasabing second wave o muling pagbulusok ng mga tinamaan ng COVID-19.

Kabilang sa tinutukoy na minimum health standards ng DOH ang pagpapalakas ng resistensya tulad ng malusog na pisikal at mental na katawan, pagpapababa ng transmission sa pamamagitan ng paghuhugas ng kamay, cough etiquette, pag-disinfect ng paligid, pagbabawas ng contact tulad ng social distancing at pagpapababa ng infection sa pamamagitan ng isolation at pag-gamot sa mga tatamaan ng sakit.

Tinututukan na ng gobyerno ang plano para higit na matugunan ang influx o pagbuhos ng mga umuuwing OFW’s na stranded sa Metro Manila dahil nasa enhanced community quarantine (ECQ).

Ayon kay Secretary Carlito Galvez, Jr. COVID-19 Response Chief Implementer sa pinakahuling datos nila, nasa 20,000 OFW’s ang nananatili sa quarantine facilities sa Metro Manila.

Bukod dito sinabi ni Galvez na pinag-aaralan na rin nila kung ano nang gagawin para makauwi na ang mga locally stranded individuals sa kani-kanilang mga probinsya.

Samantala inirekomenda rin ni Galvez ang hinay-hinay o gradual lifting ng ECQ para maiwasan ang muling pagdami ng mga kaso ng COVID-19.

Kailangan aniyang ituon ng gobyerno ang atensyon sa mga carrier ng COVID-19 para magtagumpay ang gobyerno na mapigilan ang pagkalat ng deadly virus.