Judith Estrada-Larino

Pinayagan na ng gobyerno ang deployment ng mga Overseas Filipino Workers (OFW)’s  maliban sa mga healthcare professionals.

Ayon kay Presidential Spokesman Harry Roque binigyan na ng go signal ang land based at sea based ofws na makapag trabaho abroad bagamat kailangang magsumite ng declaration na batid nila ang mga panganib na dulot ng coronavirusdisease 2019 (COVID-19) pandemic.

Inatasan na rin ang mga tanggapan at ahensya ng gobyerno na nag po proseso ng papeles ng mga OFW na magtayo ng green lanes para sa mabilis na deployment ng mga nasabing OFW’s.

Dinagdagan ng National Water Resources Board (NWRB) ang water allocation ng Metropolitan Waterworks and Sewerage System (MWSS) hanggang katapusan ng buwan ito.

Ayon kay NWRB Executive Director Sevillo David itinaas nila sa 48 cubic meters per second ang inilaang water supply sa MWSS simula ngayong araw na ito hanggang sa Mayo 31.

Ito aniya ay para matiyak ang tuluy tuloy na supply ng tubig mula sa Angat Dam lalo pat patuloy ang lockdown at maraming lugar ang nakapagtatala ng mataas na heat index.

Nakatakdang isyuhan ng show cause order ng Department of the Interior and Local Government (DILG) ang 43 alkalde dahil sa mabagal na pamamahagi ng emergency cash subsidy sa mga mahihirap na pamilya sa kanilang nasasakupan.

Ayon kay DILG Secretary Eduardo Año mayruon pang tatlong porsyento ng mga pamilyang beneficiary ng nasabing cash aid ang hindi pa nakakatanggap nito.

Sinabi ni Año na pagpapaliwanagin nila ang mga nasabing alkalde kung bakit hindi pa rin nabigyan ang mga lahat ng beneficiaries sa kanilang lugar gayung dalawang deadlines na ang ibinigay ng ahensya na nagtapos nitong Mayo 10.

Tuloy ang suspensyon ng mga biyahe ng ilang local airlines hanggang May 31 dahil sa patuloy na pag-iral ng modified enhanced community quarantine sa metro manila.

Ayon sa Cebu Pacific suspendido pa rin ang lahat ng kanilang domestic at international flights hanggang sa katapusan ng buwan samantalang suspendido rin ang domestic flights ng Skyjet Airlines.

Sinabi ng Cebu Pac na ang mga apektadong pasahero ay maaaring magpa-rebook ng flight ng walang charge, maaaring ilagay sa travel fund ang halaga ng ticket o kaya naman ay i-refund.

Ang mga customer anilang may naka-book na flights sa pagitan ng June 1 hanggang September 30 at puwede na ring magpa palit ng travel dates.

Samantala ipinabatid naman ng Philippine Airlines na kanselado pa rin ang mga biyahe nila patungo at mula sa Maynila, Cebu at Clark hanggang May 31.

Gayunman inihayag ng PAL na ini-evaluate pa nila ang posibilidad nang pagbiyahe sa labas ng bansa o domestic flight papunta at mula sa Davao sa pakikipag ugnayan sa mga kinauukulang ahensya ng gobyerno.

Sinabi pa ng PAL na plano nitong mag-operate ng kakaunting lingguhang flight sa maraming domestic route at ilang piling international route simula sa June 1 bagamat isinasapinal pa nila ang mga ito.

Inaprubahan na ng House Committee of the Whole ang panukalang pagbibigay ng provisional franchise sa ABS-CBN hanggang October 31, 2020.

Sa kanilang pag-convene bilang Committee of the Whole inaprubahan ng Kamara ang House Bill 6732 na ini-akda ni House Speaker Alan Peter Cayetano at 7 iba pang kongresista.

Mismong si Cayetano kasama si Deputy Speaker Dan Fernandez ang nag-sponsor ng nasabing bill sa plenaryo.

Hinahabol din ng NBI ang mga nagbabanta kay Vice President Leni Robredo sa social media

Sinabi ni Nick Suarez, PIO Chief ng NBI na mayroon silang team na tumutugis sa mga nagbabanta sa Bise Presidente bagamat hindi nito tinukoy ang estado ng mga kaso.

Ayon pa kay Suarez ang mga pagkilos nila ay batay na rin sa mandato ng ahensya na imbestigahan ang mga banta sa seguridad ng Pangulo, Pangalawang Pangulo, Senate President, House Speaker at maging ang Chief Justice ng Korte Suprema.

Una nang inaresto ng NBI ang isang 25 anyos na public school teacher sa Zambales matapos ang tweet nitong P50-M na reward sa aniya’y makakapatay sa Pangulong Rodrigo Duterte.