Judith Estrada-Larino

Hindi otomatikong maaaprubahan ang prangkisa ng ABS-CBN kapag nagsagawa ng pagdinig ang Kamara hinggil sa nangyaring pagpapasara rito.

Nilinaw ito ni House Speaker Alan Peter Cayetano sa gitna na rin ng mga panawagang madaliin ng Kamara ang pagdinig sa prangkisa ng Kapamilya network.

Subalit tiniyak ni Cayetano na mabibigyan ng pagkakataon sa pagdinig ang ABS-CBN na maibigay ang kanilang panig gayundin ang panig ng mga tutol sa muling pagbubukas ng media giant.

Hindi aniya mabibigyan ng linaw ang mga usapin sa prangkisa ng ABS-CBN kung hindi magkakaroon ng serye ng mga pagdinig.

Pinaghahanda ni Congresswoman Bernadette Herrera Dy ang gobyerno at local government units (LGU) ng pondo para sa bakuna kontra COVID-19.

Sinabi ni Herrera-Dy na dapat ay mayroong mailaang pondo para sa bakuna na kaagad maipapambili sakaling maging available na ang anumang anti COVID-19 vaccine.

Dapat aniyang full subsidize na ng gobyerno ang bakuna lalo na kung magmumula sa mga pampublikong ospital at pasilidad at kung sa pribadong pagamutan naman ay dapat partially covered ng PhilHealth.

Binigyang diin pa ni Herrera-Dy na mahalaga ang bawat oras at anumang delay para tugunan ang problema sa pandemic ay buhay ang kapalit.

Inalerto na ng DOH ang mga may-ari ng business establishments kapag ipinatupad na ang general community quarantine (GCQ) sa maraming lugar.

Sinabi ni Health Undersecretary Maria Rosario Vergeire na mahalagang maipatupad ang health protocols sa mga empleyado ng mga establishments gayundin ng mga customers tulad nang pagsusuot ng face mask, social distancing, disinfection at cough etiquette.

Pinayuhan din ni Vergeire ang employers na panatilihing malusog ang kanilang mga empleyado at dapat maging handa sa pagbibigay ng ayuda sakaling may mga empleyadong matamaan ng COVID-19.

Aprubado na ng Inter-Agency Task Force (IATF) ang panukalang halos P9-bilyong fuel subsidy para sa mga operator ng public utility vehicles (PUVs).

Ipinabatid ito ni Transportation Assistant Secretary Mark Richmund De Leon kaya’t hihingi na sila ng advise sa Department of Budget and Management (DBM) sa magiging mechanics sa para makuha ang nasabing ayuda.

Katumbas ito aniya ng 36 liters o nasa P1,200 para sa mga bus at 12 liters o P360 naman sa jeepney.

60% ng mga pribadong paaralan ang handa nang isulong ang edukasyon sa pamamagitan ng flexible learning mode sa gitna ng coronavirus disease 2019 (COVID-19) pandemic.

Ayon ito kay Noel Estrada, managing director ng Coordinating Council of Private Educational Associations (COCOPEA), base na rin sa ginawa nilang survey sa mga private schools.

Sinabi ni Estrada na hindi naman kinakailangang fully online dahil hindi naman lahat ng eskuwelahan ay mayruong kakayanan dito gayundin ang mga estudyante at mga magulang.

Binigyang diin pa ni Estrada na walang face to face o physial reporting sa mga paaralan dahil sa global health crisis.

Maraming private schools anya ang posibleng magbukas ng klase sa July o August, depende sa kahandaan ng mga guro at iba pang tauhan nila sa training sa mga bagong learning platforms.

Inamin ni Estrada na malaking hamon sa mga paaralan sa buong bansa ang flexible learning mode dahil dati ay alternative lamang.

Babayaran ng mga hindi Overseas Filipino Workers (OFW)’s  ang gastos sa kanilang  accommodation kung kailangang sumailalim sa quarantine sa mga government accredited facilities.

Ayon ito kay Presidential Spokesman Harry Roque batay na rin sa quarantine and testing procedures ng bansa para sa lahat ng mga uuwing pinoy mula sa ibang bansa at mga dayuhan.

Isasalang naman aniya ang mga uuwing Pinoy at dayuhan sa quarantine process at mayruong centralized processing ng lahat ng kinakailangang dokumento bago sumailalim sa RT-PCR tests at ma quarantine ng dalawa hanggang limang araw habang hinihintay ang resulta.

Kapag nag positibo diretso na kaagad sa ospital o temporary health facilities na pinapatakbo ng gobyerno subalit pag nag negatibo .papayagan ang Pinoy o dayuhan na magtungo na sa kanilang destinasyon at a ayudahan na lamang ng Department of Transpotation (DOTr) o Local Government Units (LGU)’s.

Inamin ng Palasyo na bigo ang Department of Health (DOH) na maabot ang target na 8,000 testing capacity kada araw simula Abril 30.

Subalit tiniyak muli ni Presidential Spokesman Harry Roque ang mahigpit na pagkilos ng gobyerno para mataasan ang testing capacity ng gobyerno kabilang ang pagtatalaga kay Secretary Vince Dizon bilang testing czar.

Sinabi ni Roque na sa ngayon ay mayruong 28 testing centers sa bansa kabilang na ang mega swabbing facilities kayat tina target na ng gobyerno ang 30,000 daily tests gamit ang PCR.

Bukod dito ipinabatid ni Roque na kumikilos na rin ang pribadong sektor sa pamamagitan ng project ark kung saan target na magamit ang isang milyong rapid test para sa kanilang mga empleyado at mga nakapaligid na negosyo.