Judith Estrada-Larino

Maglalaan ng pondo ang Kamara sa ilalim ng panukalang 2021 national budget para ipambili ng bakuna kontra coronavirus disease 2019 (COVID-19).

Tiniyak ito ni House Speaker Alan Peter Cayetano dahil masyado aniyang conservative ang P4.3-T national budget na planong isumite ng ehekutibo sa kongreso.

Sinabi ni Cayetano na maaari namang tawagin nila ang pondo sa ilalim ng panukalang 2021 national budget bilang COVID-19 related programs upang kung hindi pa rin maging available ang bakuna ay maaaring gamitin ang pera para sa testing o pagbili ng medical supplies.

Sa ganitong paraan aniya ay hindi na kailangan pang bumalik ang ehekutibo sa kongreso para humingi ng dagdag na pondo.

Bukod sa vaccine funds ipinabatid ni Cayetano na nais din nilang maisama sa pambansang pondo para sa susunod na taon ang economic stimulus appropriation upang matulungan ang mga apektadong sektor na makabangon sa epekto ng pandemya.

Ang mga nasabing appropriations ay dagdag sa magiging laman ng Bayanihan 2 o planong We Recover As One Law.

Panatilihin ang enhanced community quarantine (ECQ) sa Cebu City.

Ito ang payo ni health expert na si Dr. Tony Leachon kasunod nang patuloy na pagtaas ng kaso ng coronavirus disease 2019 (COVID-19)  sa lungsod bukod sa kulang pa ang testing kit at maging ang testing capacity nito at maging ng buong lalawigan.

Sinabi sa DWIZ ni Leachon na sa mga panahong naka ECQ pa rin ang Cebu City at buong lalawigan dapat maibigay ang kinakailangang supply ng test kits, paramihin ang testing centers, kaagad punuin ang mga kinakailangang bilang ng mga doktor at nurses at kaagad ding mai-isolate ang mga magpopositibo sa COVID-19.

Pagkatapos nito binigyang diin ni Leachon na dapat mahigpit na mabantayan ang naitatalang arawang kaso ng COVID-19 sa buong lalawigan partikular sa Cebu City sa loob ng dalawang linggo.

Papalo sa mahigit 60,000 ang kaso ng coronavirus disease 2019 (COVID-19) sa bansa hanggang sa July 31.

Ito ang pagtaya ng UP experts na nagsabi ring posibleng umakyat sa 1,300 ang death toll sa COVID-19 sa katapusan ng susunod na buwan.

Ang nasabing grupo ay binubuo nina UP mathematics professor Dr. Guido David, UP political Science Assistant Professors Ranjit Rye at Maria Patricia Agbulos at biology professor Reverend Father Nicanor Austriaco ng providence college at University of Sto. Tomas.

Tinataya rin ng grupo na aabot sa 27,000 ang kaso ng COVID-19 sa Metro Manila at nasa 20,000 naman sa lalawigan ng Cebu hanggang sa July 31.

Ayon sa experts ang bilang ng araw-araw na fresh cases sa NCR ay tumaas mula 271 noong nasa ilalim pa ito ng enhanced community quarantine (ECQ) sa 396 nang ibinaba ito sa modified ECQ at pumalo na sa 583 sa ilalim ng ECQ.

Malinaw anila rito ang pagtaas ng 50% ng kaso ng COVID-19 mula sa isang period patungo sa isa pa na dahil na rin sa pagtaas ng testing capacity sa bansa bagamat nananatiling stable ang positivity rate.

Inihayag ng UP experts na pataas ang positivity rate sa nakalipas na dalawang linggo na nangangahulugang mabilis ang pagkalat ng pandemya.

Binigyang diin ng UP experts na maaaring maiwasan ang pagtaas ng kaso at maging ng death toll kung mabilis na matutukoy at mapuputol ang viral transmission.