Judith Estrada-Larino

Pinalawig pa ang modified general community quarantine (MGCQ) sa lalawigan ng Maguindanao.

Kasabay na rin ito nang pagpapalabas ng bagong memorandum noong ika-31 ng Oktubre, batay sa direktiba ni Inter-Agency Task Force (IATF) chair at Maguindanao Governor Bai Mariam Sangki Mangudadatu.

Kabilang sa nilalaman ng panuntunan ang pagpapatuloy ng ‘no movement Sunday’, bukod pa sa pagpapatupad ng minimum health protocols kontra coronavirus disease 2019 (COVID-19).

Kaugnay nito, patuloy pa rin ang pagtutok ng provincial government para ma contain ang COVID-19 sa probinsya.

Samantala, nagbigay na rin ng vitamins, gamot at iba pang tulong ang provincial government sa mga police trainees na kinapitan ng COVID-19.

Una nang nagpositibo sa COVID-19 ang 180 police trainees at tatlong enlisted personnel na nasa Notre Dame, Parang, naka-isolate at inaasahang ngayong linggo ay magtatapos ang quarantine ng police trainees.

Maayos na rin ang sitwasyon ng Iligan City Vice Mayor Jemar Vera Cruz na nagpositibo sa COVID-19.

Nananatiling walang suplay ng kuryente at walang network signal sa Catanduanes matapos itong tamaan ng Bagyong Rolly.

Ito, ayon sa National Disaster Risk Reduction and Management Council (NDRRMC), ay kaya’t hirap silang makakuha ng datos sa pinsala ng Bagyong Rolly sa Catanduanes kung saan pawang satellite at radio communications ang nagagawa.

Limitado rin at tinitipid anito ang paggamit ng enerhiya doon.

Pinaghahanda ng PAGASA ang siyam (9) na bayan sa lalawigan ng Isabela sa posibleng epekto ng pagpapakawala ng tubig mula sa Magat Dam matapos bumuhos ang ulan dulot ng Bagyong Rolly.

Kabilang sa mga bayang ito, ayon kay Engineer Maximo Peralta, Assistant Weather Services Chief ng Hydrometeorology Division, ang ramon, San Mateo, Aurora, Cabatuna, Luna, Reina Mercedes, Naguilian, Burgos at Gamu na pawa aniyang malapit sa Magat River.

Sinabi ni Peralta na isang gate lamang ng Magat Dam ang bubuksan na maglalabas ng tubig ng hanggang 2-metro.

Kailangan aniyang magbukas ng gates ng Magat Dam kapag may bagyo dahil mabilis tumaas ang tubig dito.

Water level ng mga dams sa Luzon

Nadagdagan ang antas ng tubig sa Angat Dam at iba pang dam sa Luzon sa nakalipas na magdamag.

Ayon sa hydrometeorology division ng PAGASA, nasa 201.78 meters ang water level sa Angat Dam kaninang alas-6 ng umaga kumpara sa 200.67 meters kahapon.

Nadagdagan din ang antas ng tubig sa Ipo Dam gayundin sa Ambuklao, Binga, San Roque, Magat at Caliraya dams.

Nabawasan naman ang water level sa La Mesa Dam, samantalang nananatili ang antas ng tubig sa Pantabangan Dam.

Pumapalo sa mahigit 1,700 pamilya mula sa Batangas City ang inilikas ng hatinggabi dahil sa pananalasa ng Bagyong Rolly.

Kabilang sa mga pamilyang inilikas, ayon kay Marie Villena-Lualhati, Public Information Chief ng Batangas City, ay mula sa Tierra Verde Subdivision, Barangay Pallocan West; Sitio Gitna, Barangay San Isidro at Sitio Takad, Barangay Libjo.

Tumaas ang baha sa lugar dahil sa walang humpay na pag-ulan kaya’t marami ang sinagip mula na sa ikalawang palapag ng kanilang mga bahay at maging sa kanilang bubungan.

Nabugbog ng Bagyong Rolly ang lalawigan ng Albay.

Ayon ito mismo kay Albay Governor Al Francis Bichara, kung saan anim na ang naitalang nasawi sa kanilang lalawigan.

Sinabi sa DWIZ ni Bichara na mas marami pa ang napinsalang kababayan niya kung hindi sila nagsagawa ng mandatory evacuation matapos umapaw ang mga dike at naging problema rin ang lahar mula sa Bulkang Mayon.

Kung hindi kami nag-mandatory [evacuation], mas maraming mamamatay. Bumigay ‘yung mga dike, umapaw ‘yung tubig talaga,” ani Bichara.

Ipinabatid ni Bichara na ang mga bayan ng Tiwi at Tabako ang labis na naapektuhan ng Bagyong Rolly samantalang 150 kabahayan ang nalubog sa lahar sa bayan ng Guinobatan.

Doon sa Tiwi, Tabako, talagang landfall, e, nagdaan. Syempre malakas ang impact ng bagyo… Doon sa Guinobatan, 150 houses ang talagang nalubog sa lahar,” ani Bichara. —sa panayam ng Santos at Lima sa 882