Judith Estrada-Larino

Marami pang mga empleyado ng PhilHealth at Bureau of Immigration (BI) ang masisibak sa trabaho sa susunod na buwan.

Tiniyak ito ng Pangulong Rodrigo Duterte kasunod pa rin aniya ng malawakang korapsyon sa ahensya.

Binigyang diin ng pangulo na marami ang mawawalan ng trabaho, matatanggal sa gobyerno, makakasuan at makukulong.

Ikinadismaya ng pangulo ang ‘pastillas’ scheme sa Immigration kung saan nagbabayad ng pera ang Chinese nationals para ilegal na makapasok sa bansa.

Pinag-iinitan din ng pangulo ang P15-bilyong anomalya sa PhilHealth.

Una nang binasa ng pangulo ang pangalan ng 21 opisyal ng PhilHealth na sinuspinde habang 44 naman mula sa Immigration.

Pinatitiyak ng Pangulong Rodrigo Duterte kay Labor Secretary Silvestre Bello III na maibibigay ang benepisyo ng mga manggagawa bago sumapit ang mismong araw ng Pasko.

Tinukoy ng pangulo ang dagdag na P2-bilyong pondo na inaprubahan sa ilalim ng Bayanihan 2 para sa mga manggagawa na hindi nakasama sa mga naunang social amelioration program (SAP) ng gobyerno na naapektuhan ng coronavirus disease 2019 (COVID-19) pandemic.

Nais ng pangulo na matiyak na mayroong maipanggagastos man lang ang bawat pamilya sa Pasko.

Sinabi ng pangulo na sadyang mahirap ang buhay ngayon kaya’t mahalagang may mahawakan man lamang kahit na kaunting pera ang mga manggagawa bago mag-Pasko.

Tiniyak naman ni Bello sa pangulo na nakakasa na ang pamamahagi nila ng pondo para sa mga benepisyo at pinakamaagang mapasisimulan ito sa ika-15 o ika-20 ng Nobyembre.

Sinabi ni Bello na bago pa man sumapit ang Pasko ay tiyak na naipamahagi na nila ang pondo.

Sa ilalim ng Bayanihan 2, may kabuuang P13-bilyon na pondo ang Department of Labor and Employment (DOLE) para sa kanilang COVID-19 Adjustment Measure Program (CAMP), Tulong Panghanapbuhay sa Ating Disadvantaged / Displaced Workers (TUPAD) at AKAP Program o one-time financial assistance para sa mga Overseas Filipino Workers.

Lumakas pa ang Tropical Storm ‘Rolly’ habang kumikilos papalabas ng bansa.

Ang sentro ng Bagyong Rolly ay pinakahuling namataan sa layong 540 kilometers kanluran ng Iba, Zambales.

Taglay ng Bagyong Rolly ang pinakamalakas na hanging umaabot sa 75 kilometers per hour (kph) malapit  sa gitna at may pagbugso na umaabot sa 90kph.

Ang Bagyong Rolly ay kumikilos sa bilis na 15kph sa direksyong pa kanluran, timog-kanluran.

Wala nang magiging direktang epekto ang Bagyong Rolly sa alinmang bahagi ng bansa.

Samantala, nananatiling mabagal at halos stationary ang Bagyong Siony na pinakahuling namataan sa layong 565 kilometers silangan ng Basco, Batanes.

Lumakas pa ang Bagyong Siony na taglay ang pinakamalakas na hanging umaabot sa 85kph malapit sa gitna at may pagbugso na umaabot sa 10kph.

Kumikilos ang Bagyong Siony sa direksyong silangan, hilagang-silangan.

Ayon sa PAGASA , may posibilidad pa ring tumama ang Bagyong Siony sa kalupaan ng Batanes-Babuyan Islands area sa Biyernes.

Sa susunod na 24-oras  hanggang 36-oras ay inaasahang lalakas pa ang Bagyong Siony na maaaring umabot sa severe tropical storm category.

Walang Pilipinong nadamay sa mga insidente ng pamamaril sa Vienna, Austria.

Ayon ito kay Executive Director for Strategic Communications Ivy Banzon-Abalos, batay sa report ng Embahada ng Pilipinas sa Vienna.

Pinayuhan ng Department of Foreign Affairs (DFA) ang mga Pilipino doon na sundin ang abiso ng mga otoridad na manatili lamang sa mga bahay at huwag munang lumabas.

Isa ang nasawi sa magkakahiwalay na insidente ng pamamaril sa magkakaibang lugar sa Vienna, Austria.

Unang naitala ang pag-atake malapit sa Central Synagogue kung saan isa na ang naitalang nasawi habang marami ang sugatan.

Ayon kay Interior Minister Karl Nehammer, pinaghahanap pa ng mga otoridad ang mga armadong suspek at pinapayuhan ang mga residente na manatili lamang sa loob ng kanilang mga tahanan.

Sinabi ni Nehammer na itinuturing na terror attacks ang nangyari, ilang oras bago magpairal ng partial lockdown sa lugar dahil sa tumataas na kaso ng coronavirus disease 2019 (COVID-19).

Inihayag ni Vienna Mayor Michael Ludwig na mayroong 15 katao na ginagamot sa Vienna Hospitals at pito sa kanila ang seryoso ang kondisyon.

Sa kabuuan aniya ay nakapagtala ng pag-atake sa anim na magkakahiwalay na lokasyon sa Vienna.

Mahigit P6-milyong ayuda na ang naibibigay ng Department of Social Welfare and Development (DSWD) sa mga biktima ng Bagyong Rolly sa iba’t ibang rehiyon ng bansa.

Sa report nito sa Disaster Response Operations Monitoring and Information Center, sinabi ng DSWD na ang kabuuang assistance ay nagmula hindi lamang sa kanila kundi maging sa local government units at non-government organizations.

Ayon pa sa DSWD, nasa 160,000 pamilya o mahigit 600,000 indibidwal ang naapektuhan ng Bagyong Rolly mula sa mahigit 2,000 barangay.

Halos 71,000 pamilya o 270,000 katao ang nananatili sa evacuation centers.

Sakop ng mga nabigyan ng ayuda ang mga apektadong lugar sa Bicol Region, CALABARZON, National Capital Region (NCR), MIMAROPA, Cagayan, Central Luzon, Eastern Visayas at Cordillera Administrative Region.

Pinabilis pa ng MRT Line 3 (MRT-3) ang bilis nito na nasa 50 kilometers per hour (kph) simula kaninang umaga.

Ang pinabilis na takbo ng MRT trains ay nagresulta sa 4-minuto hanggang 5-minutong paghihintay lamang na mas mabilis kumpara sa 6-minuto hanggang 6.5-minutong headway na naitala noong Oktubre.

Ayon kay MRT-3 Operations Director Michael Capati, kahapon nila sinimulan ang pagtataas ng speed ng mga tren at kanila pang oobserbahan pa para ma-improve pa ang headway.

Natutuwa naman ang mga pasahero sa nasabing hakbang ng MRT-3 management dahil tiyak na mapapabilis din ang pagdating nila sa kanilang destinasyon.

Magugunitang Huwebes noong isang liggo ay nagkasa ng trial run ang MRT-3 sa pagtatangkang makapagbiyahe sa layong 16.7-kilometers sa bilis na 50 kph —gamit ang bagong overhauled light rail vehicle.

Pinaplano ng MRT-3 na itaas pa sa 60 kph ang takbo ng mga tren sa susunod na buwan.

Patuloy ang pagpapakawala ng tubig ng tatlong dam sa Luzon.

Kasunod na rin ito nang pagtaas ng water level sa Ambuklao Dam na nasa 751. 31 meters, Binga Dam na nasa 573. 84 meters at Magat Dam na nasa 188.38 meters ang water level.

Isang gate ng Ambuklao Dam ang nakabukas, dalawang gate ng Binga Dam at isang gate naman ng Magat Dam.